Daily news
Шекеринска во Бугарија: Нова енергија во одбранбените односи помеѓу двете земји
Македонија и Бугарија се пример за добрососедство и соработка што ја зацврстува безбедноста на целиот регион. Бугарија недвосмислено ја поддржува Македонија на патот кон ЕУ и НАТО и ќе помогне во остварувањето на стратешките цели на Македонија, беше речено на средбите на министерката за одбрана, Радмила Шекеринска, со бугарскиот премиер Бојко Борисов и со бугарскиот министер за одбрана, Красимир Каракачанов, во Софија.
Официјалната посета на Бугарија министерката Шекеринска ја почна со средба со бугарскиот премиер Борисов, кој рече дека со преземањето на претседателствувањето со Европската Унија, Бугарија ќе ѝ ја даде целата поддршка на Република Македонија во нејзиниот евроинтегративен процес.
На средбата во бугарското МО министрите Шекеринска и Каракачанов изразија задоволство од продлабочувањето на соработката во одбраната.
Министерката Шекеринска рече дека последните месеци покажаа дека постои силна политичка волја за конкретна соработка, реални позитивни и пријателски односи меѓу двете земји и една нова клима на соработка.
„Потпишувањето на договорот за пријателство, добрососедство и соработка помеѓу Македонија и Бугарија ги интензивира контактите во сите области. Ние сме особено задоволни бидејќи како две пријателски земји презедовме чекори за издигнување на одбранбената соработка на едно повисоко ниво“, рече таа. Изрази очекување дека во следниот период ќе се дефинираат конкретни активности во доменот на соработката на двете армии, со фокус на заедничката обука на специјалните сили.
Министерката истакна и дека претстојната седницата меѓу двете влади во Струмица ќе покаже дека соработката се продлабочува.
„Локалните избори потврдија дека граѓаните се зрели и сакаат да видат решенија. За нас е важен не само резултатот на изборите туку и извештајот на ОБСЕ, кој покажа дека вербата во процесот е вратена. Ние сме фокусирани на реформите кои можат да ни помогнат на патот кон НАТО и ЕУ и на тој пат сакаме да ги искористиме вашето искуство“, порача министерката на состанокот.
Министерот Каракачанов изрази задоволство што со Владата на премиерот Заев од 1 август до денес контактите меѓу Бугарија и Македонија се поинтензивни отколку во последните 20 години. Истакна дека политиката на Бугарија за членство на Македонија во НАТО и во ЕУ е јасна, а таа е – категорична поддршка. Министерот Каракачанов изрази надеж дека договорот за добрососедство набргу ќе го ратификуваат и двата парламента. „Покажуваме дека на Балканот две земји може да најдат заеднички јазик за напредок и на двете држави. Министерот изрази задоволство од развојот на соработката во одбраната, односно интензивната соработка на работните групи и преносот на искуства во контекст на НАТО.
Двајцата министри денеска потпишаа два билатерални документа – изјавата за намери за развој на соработката меѓу двете воени воздухопловства и аранжманот за соработка за лабораториски анализи на горивата и специјалните течности.
Во рамките на посетата министерката Шекеринска ќе го посети и Националниот воен команден центар на бугарската армија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.