Daily news
Јункер: Во оваа фаза ниту една земја од Западен Балкан не ги исполнува условите
Во оваа фаза ниту една од земјите од Западен Балкан не ги исполнува сите услови за влез во ЕУ. Ова го изјави претседателот на Европската комисија, Жан-Клод Јункер, и додаде дека постои огромен напредок кај земјите од овој блок.
„ЕУ останува силно посветена на европските изгледи за нашите партнери од Западен Балкан. Ние ќе се потрудиме да работиме на ова и да ја видиме истата желба кај нашите партнери. Тие се подготвени да ги исполнат реформите што се потребни за пристапување во ЕУ. Кога ја презедов функцијата, реков дека ниту една држава од Западен Балкан нема да може да пристапи во ЕУ до крајот на мандатот во оваа Комисија, а тоа ги растажи нашите пријатели. Потоа морав да ги образложам моите намери и да го забрзам пристапот на овие партнерства, да видам каков ќе биде кандидатскиот статус и кога ќе се случи пристапувањето, а тоа ќе се реализира ако на крајот на 2025 година бидат исполнети сите услови“, рече Јункер.
Тој уште еднаш го повтори ставот дека сите што сакаат да пристапат во ЕУ мора претходно да изнајдат решение за билатералните и територијални конфликти.
„Ние мораме да ја прифатиме комплексноста на овој регион, ЕУ е голем пазар со многу позитивни ефекти за економијата, а исто така и вредности што не треба да исчезнат од нашиот опсег. Набргу ќе има самит на земјите од Западен Балкан и ЕУ во Софија, каде што ќе разговараме за проширување и пристапување. Сепак, главна тема на самитот ќе бидат проблемите на миграцијата и ќе мораме да ѝ посветиме поголемо внимание на економската ситуација во регионот. Ќе треба да зборуваме за поврзаноста на регионот“, рече Јункер.
Тој ги пофали резултатите на бугарското претседателство и рече дека Бугарите треба да се гордеат на начините на кои нивните лидери го водат претседателството. Според Јункер, Балканот е неделив дел од Европа и неговото вклучување во заедничкиот европски простор на безбедност и економски развој е од стратешко значење за трајната стабилност на целата Европска Унија.
Обраќањето на Јункер следуваше во рамките на работниот состанок со премиерот на Република Бугарија, Бојко Борисов, како премиер на земја претседавач со ЕУ, заедно со шефовите на држави и влади од Западен Балкан, што се одржа во Софија. На состанокот присуствуваа и високата претставничката за надворешна и безбедносна политика на ЕУ, Федерика Могерини, и еврокомесарот за проширување на ЕУ, Јоханес Хан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.