Mинистерот за земјоделство, шумарство и водостопанство, Трајан Димковски, заедно со директорот на Агенцијата за финансиска поддршка во земјоделството и руралниот развој, Николче Бабовски, беа во посета на селото Дихово од каде што ги известија сите одгледувачи на овци дека денеска ќе се изврши исплата на субвенции за обележани грла.

На сметките на 3.213 сточари, одгледувачи на овци, ќе бидат исплатени 607.032.300 денари, а, како што информираат од ресорното министерство, пред точно една недела беа исплатени субвенциите наменети за одгледувачите на говеда.

„На сите сточари им благодарам за активниот придонес за развојот на сточарското производство и се надевам дека средствата од субвенциите ќе ги инвестираат во набавка на нови грла, набавка на потребна опрема за производство и сè она што им е потребно за да го развиваат сточарството“, изјави министерот Димковски.

Во следниот период, според календарот за исплата, ќе продолжи исплатата на субвенциите за останатите мерки од Програмата за финансиска поддршка, односно ќе следуваат исплати на субвенциите за одгледувачите на кози, свињи и пчели.

Денеска министерот за земјоделство, шумарство и водостопанство, Трајан Димковски, заедно со директорот на Агенцијата за финансиска поддршка во земјоделството и руралниот развој, Николче Бабовски, беа на увид во активностите на проектот што се реализира од Програмата за рурален развој, проект за реконструкција на патот од село Кажани до село Моловишта – Битола.

„Оваа Влада, преку Програмата за рурален развој обезбеди финансиска поддршка во висина од 38 милиони евра, за општините да можат да инвестираат во подобрување на инфраструктурата во руралните средини. За овој зафат, Владата обезбеди средства во износ од 16,3 милиони денари по склучен договор и истите се обезбедени од Програмата за рурален развој. Сите овие проекти кои веќе се реализираат на терен, се само потврда на мерките кои оваа Влада ги презема за подобрување на условите за живот во руралните средини“, изјави министерот Димковски.

Покрај овој проект, во општина Битола се реализираат и други шест проекти одобрени од страна на Агенцијата за финансиска поддршка во земјоделството и руралниот развој, односно Битола ќе се поддржи со вкупен грант од 38 милиони денари.

„За првпат по цели 40 години патот Кажани – Маловиште ќе се прошири и ќе се реконструира со што значително ќе се подобри протокот на добра и услуги, ќе се зголеми и безбеденоста во сообраќајот, а ќе се овозможи развој на руралниот туроизам бидејќи селото Млаовиште е единствено населено место во склоп на Националниот парк Пелистер“, изјави директорот Бабовски.

Вкупната сума на кредитирањето на ЕБОР изнесува 5 милиони евра за Шпаркасе банка Македонија, наменети за поддршка на кредитирањето на домаќинствата заедно со мерки за енергетска ефикасност.

Кредитот во износ од 2 милиони евра од ЕБОР за Шпаркасе Банка Македонија, ќе ги поддржи инвестициите во еколошки технологии со високи перформанси, наменети за зградите во приватна сопственост, вклучувајќи и објекти за домување во Северна Македонија.

Шпаркасе Банка Македонија ќе ги пласира средствата на физички лица-корисници на кредитите кои планираат да инвестираат во технологии, материјали и решенија за подобрување на енергетската ефикасност. Финансирањето на ЕБОР е преку Програмата за финансирање на зелена економија (Green Economy Financing Facility – GEFF).

Зградите во Северна Македонија имаат итна потреба од реновирање и воведување на изолација, со што се очекува да ги намалат трошоците и да се подобри удобноста на живеење. Ова е трета кредитна линија преку GEFF за Шпаркасе Банка Македонија, со која се задоволува растечката побарувачка за овој финансиски продукт.

Дополнително на ова, ЕБОР одобри €3 милиони од кредитната линија за хипотекарни кредити на Шпаркасе Банка Македонија, за натамошно приватно кредитирање на потребите на домаќинствата. Ова е вториот хипотекарен кредит на ЕБОР кон оваа банка. Првиот беше потпишан во 2017 година и беше целосно пласиран на пазарот во земјата. Финансирањето на хипотеките, во комбинација со кредитот за подобрување на заштедите на енергија кај домаќинствата, ќе помогне во проширување на кредитирањето во резиденцијалниот сектор.

GEFF во Северна Македонија е дел од Програмата за Западен Балкан (Green Economy Financing Facility – GEFF) во износ од €85 милиони, одобрена во 2017 година, како заедничка иницијатива на Европската Унија (ЕУ), Австриското Федерално Министерство за Финансии и земјите кориснички на средствата од Инвестициска програма за поддршка на Западен Балкан ( Western Balkans Investment Framework – WBIF).

Иницијативата работи под покровителство на Регионалната програма за енергетска ефикасност за Западен Балкан (Regional Energy Efficiency Programme for the Western Balkans – REEP Plus), финансирана од ЕУ, и имплементирана во партнерство со Европскиот Секретаријат за енергетика. Со оваа програма се обезбедува поддршка на политиките за хармонизација на законодавството и регулативите на енергетската ефикасност кај зградите на домување во земјата, со релевантните европски директиви.

ЕБОР е главен институционален инвеститор во Северна Македонија и до денес има инвестирано над €2 милијарди во 129 проекти во земјата. Поддршката на зелената енергија е приоритет за ЕБОР, бидејќи се справува со еден од најважните предизвици во земјата.