Вицепремиерот за европски прашања и Национален ИПА координатор, Бојан Маричиќ, денеска ја потпиша Финансиската спогодба за ИПАРД 3 програмата и во своето излагање рече дека суштинска за македонското земјоделство.

ИПАРД е успешна приказна која веќе подолго време ја имаме и дека потпишувањето на оваа спогодба е само нејзино продолжување и уште поголемо развивање.

– ИПАРД 2 беше доволно силна и успешна приказна, а ИПАРД 3 ќе биде ветувачка приказна, приказна што ветува многу за македонскиот земјоделец и гаранција дека Северна Македонија ќе продолжи да биде најдобар корисник на ИПАРД програмите во регионот, рече Маричиќ.

Покрај на Секретаријатот за европски прашања, вицепремиерот им честита на сите засегнати страни во спроведувањето на ИПАРД програмата, на Министерството за земјоделство, шумарство и водостопанство, Министерството за финансии и на Платежната агенција која има клучна улога во спроведувањето на овие европски неповратни средства, преку кои се зајакнува земјоделскиот сектор и се приближуваме кон стандардите утврдени со заедничката земјоделска политика на ЕУ.

– Со финансиската спогодба се обезбедија 97 милиони евра за македонското земјоделство за мерки од ИПАРД III програмата и тоа за: Инвестиции во физички средства на земјоделски стопанства, за преработка и маркетинг на земјоделски и рибни производи, за диверзификација на фармите и развој на бизнисот и за техничка помош, објасни вицепремиерот Маричиќ.

Недостигот на работна сила и преминот кон обновливи извори на енергија долгорочно ќе биде товар за германската економија, предупреди шефот на економскиот Институт „Ифо“ оценувајќи дека цената на струјата во Германија во иднина ќе биде повисока отколку во другите земји. Германската економија во иднина ќе расте побавно, предупреди Клеменс Фуест во интервју за новинската агенција ДПА.

„Недостигот во снабдувањето со електрична енергија во Германија беше грешка“, рече Фуест мислејќи на затворањето на нуклеарните централи и намаленото снабдување со руски гас поради војната во Украина. Хемиските компании сè почесто предупредуваат дека поради високите трошоци за енергија, може да бидат принудени да преселат дел од своето производство во странство.

„Овие планови треба да се сфатат сериозно“, рече Фуест додавајќи дека подоброто снабдување со енергија ќе го ублажи проблемот. Тој, сепак, смета дека владата не треба да ги ограничува цените на струјата. „Очекувам дека цената на струјата во Германија во иднина да биде повисока отколку во другите земји“, рече Фуест.

Според него, најголем товар за економијата е недостигот на работна сила во многу сектори, што ќе го попречи растот во наредните години. Можни решенија се новиот закон за привлекување квалификувана работна сила од странство и подобрена грижа за децата, предлага тој.

Оперативниот директор на Грин Машинс, ќерка фирма на велешки БРАКО, Ангел Анѓушев, на бизнис форумот кој се одржа во Тирана во рамките на Берлинскиот процес, порача дека државите од Западен Балкан очекуваат економска помош и поддршка од ЕУ, но нагласи и дека самите земји треба да вложат во зајакнување на сопствениот економски сектор.

„Сите ние, властите и стопанството, во секоја од земјите, треба да погледнеме прво во нашата сопствена земја, што можеме ние самите да направиме за себе пред да погледнеме што ЕУ би можела да ни помогне.

Компании во регионот, немаат добра средина за раст, немаат доволно буџетска поддршка за инвестирање во технолошки напредни производи и постои реален недостаток на транспарентни и конкурентни процедури за јавни набавки од државните и локалните институции.

Да го дадеме приоритетот на локалниот развој и да создадеме погодна средина за раст токму овде во Западен Балкан“, потенцираше Анѓушев во своето излагање пред присутните министри за економија и финансии од регионот на Западен Балкан.

Во рамките на Берлинскиот процес, со кој оваа година претседава Република Албанија, Министерството за финансии и економија на земјата домаќин, заедно со Коморскиот инвестициски форум на Западен Балкан (КИФ), беа домаќини на бизнис форумот кој се одржа во Тирана и ги претстави достигнувањата и предизвиците на патот на регионот кон единствениот пазар на ЕУ.

(ПР)