Економија
Близу 20 отсто од населението на Балканот живее на работ на сиромаштија

Близу 20 проценти од населението на земјите на Балканскиот полуостров живее на работ на сиромаштија. Ова го покажува анализата на Еуростат за сиромаштија и нееднаквоста на приходите на 28-те земји од Европската унија за 2015 година, пренесуваат во четвртокот медиумите.
Во осум земји од Европската унија луѓето живеат во значително повисок степен на ризик од сиромаштија во споредба со побогатите партнери од заедницата, резимира европската статистика. Во осум држави, како во Романија, на ризик од сиромаштија се изложени 25.4 отсто од луѓето, во Латвија (22,5 проценти), Литванија (22 отсто), во Шпанија (22 проценти), во Бугарија (22 отсто), во Естонија (21,6 проценти), во Грција ( 21.4 проценти) и во Хрватска (20 отсто).
Населението на уште неколку земји на Балканот, кои сепак се надвор од Европската унија, исто така живеат со зголемени индикатори за ризик од сиромаштија. Меѓу нив се Србија (25.4 проценти), Турција (23 отсто) и Македонија (21.5 проценти).
Најнизок процент на загрозени од сиромаштија во ЕУ е регистриран во Чешка и Исланд – по 9.6 проценти, Холандија (11,6 проценти) и Норвешка (12 отсто).
Еден од секои осум пензионери во Европската унија бил изложен на ризик од сиромаштија во 2015 година, се посочува во анализата. Највисок е процентот на сиромашните пензионери во Естонија (40 отсто), во Латвија (36 проценти), во Бугарија (30 отсто) и во Литванија (27.6 проценти)./крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.