Економија
Бочварски: Наша цел е да создаваме услови на континуитет на градежна експанзија во земјата

Визијата за европска и просперитетна Македонија со модерна и квалитетна инфраструктура е невозможна без соработка и поддршка од стручната и академската фела. Развојот на градежниот сектор е од особено значење за развојот на државата, особено што поддржува други 25 стопански гранки, истакна министерот за транспорт и врски, Благој Бочварски, обраќајќи се на 20. меѓународен симпозиум на Друштвото на градежните конструктори на Македонија.
Тој ја потенцира важноста на стручната јавност во креирањето модерна и квалитетна инфраструктура, во која е почнат процес на употреба на нови стандардизирани норми и методи.
„Повеќе од четири децении постоење на ова друштво е само по себе показател колку е значајна нашата професија. Велам нашата бидејќи и јас сум дел од оваа струка и знам колкав е придонесот во создавањето трајни вредности во општеството. И затоа нашите програмски цели е да создаваме услови на континуитет на градежната експанзија во земјата, но притоа мора да понудиме нови знаења, нови стандардизирани норми и методи, кои ќе ги приспособиме на домашната легислатива. Сакам да истакнам дека ја реализираме најголемата инвестициска политика во изградба и модернизација на инфраструктурата во Северна Македонија. Исто така, ја почнавме најголемата реформата во градежната дејност преку која обезбедуваме високо ниво на професионалност и стандардизација на прописите и нормите“, истакна Бочварски.
Тој го потенцира значењето на ервокодовите како нови правила за работа во градежниот сектор, кои треба да почнат да се применуваат од септември в година.
Додаде дека Министерството за транспорт и врски е во крајна фаза во изработка на нов закон за градење, кој ќе понуди нов развој на градежната дејност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Цената на златото достигна рекордно високо ниво

Цената на златото се зголеми за 0,22 проценти утрово, достигнувајќи рекордно високо ниво од 3.184 евра (3.755 долари) за унца во 9:30 часот наутро по средноевропско време.
Цената на златото се движеше помеѓу 2.150 евра (2.536,91 долари) и 3.184 евра (3.755 долари) за унца во текот на изминатите 12 месеци, што е зголемување од 42,8 проценти. Пазарните очекувања за понатамошно намалување на каматните стапки од страна на Федералните резерви на САД (ФЕД) силно влијаеја врз цените на стоките, особено златото.
По инсистирањето на американскиот претседател Доналд Трамп, ФЕД ги намали каматните стапки за 0,25 процентни поени минатата недела. Пазарите очекуваат уште едно намалување на стапките на следните состаноци на ФЕД во октомври и декември.
Претседателот на Федералните резерви, Џером Пауел, на прес-конференцијата објасни дека каматните стапки се намалени поради слабоста на пазарот на трудот, но исто така предупреди дека инфлацијата е сè уште висока и дека се очекува дополнително да се зголеми поради воведувањето на царини.
Економија
Мицкоски на средба со претседателот на Стопанската комора на Дубаи

Премиерот, Христијан Мицкоски, денеска во Владата имаше средба со претставници од бизнис заедницата и Мохамед Али Рашед Лута претседател и главен извршен директор на Стопанска комора на Дубаи.
На средбата премиерот Мицкоски информираше дека приоритет на Владата е економската стабилизација на земјата, односно како што рече тој да донесеме што е можно повеќе странски, директни инвестиции и секако да ги подржи домашните директни инвеститори.
„Прво би сакал да ве информирам дека во текот на изминатите четири квартали, дојдовме до раст на нашиот домашен производ од нас 3%. Оваа Влада беше избрана пред околу 15 месеци и од самиот почеток нашиот најголем приоритет е економската стабилизација на земјата. Би сакале да се претставиме како Влада којашто е ориентирана кон бизнисот, којашто сака да ги поддржува деловните и бизнис можностите. Да донесе што е можно повеќе странски, директни инвестиции и секако да ги подржи домашните директни инвеститори.
Доколку го анализираме европскиот пазар, додаде тој, тогаш може да заклучиме дека имаме неверојатно достигнување, затоа што, како што кажа, европскиот пазар се соочува со огромни предизвици, особено кога станува збор за автомобилската индустрија.
Мохамед Али Рашед Лута претседател и главен извршен директор на Стопанска комора на Дубаи на средбата истакна:
„Растечката соработка меѓу Дубаи и Северна Македонија ја одразува нашата заедничка амбиција да изградиме отпорни економии и да поттикнеме одржлив развој. Трговијата меѓу нашите пазари достигна вкупно 495 милиони американски долари во текот на изминатите пет години, нагласувајќи го долгорочниот тренд на позитивен ангажман и растечки можности. Овој моментум се одразува и во растечкото присуство на македонските компании во Дубаи во различни сектори.“
Тој додаде дека Стопанската комора на Дубаи останува посветена на зајакнување на врските меѓу нашите деловни заедници и промовирање на инвестициски текови што ги унапредуваат нашите заеднички приоритети.
„Гледаме значаен потенцијал во ова партнерство и сме решени да осигуриме дека ќе донесе опипливи резултати преку проширена трговија и подлабока соработка за обликување на долгорочен просперитет на двата пазара“, рече Мохамед Али Рашед Лута.
Економија
Славески на конференција во Женева: Монетарната политика e претпазлива во согласност со предизвиците

„Монетарната политика и во иднина ќе биде претпазлива согласно предизвиците од неизвесностa поврзана со домашното и надворешното окружување. Народната банка и натаму проактивно ќе ги следи состојбите и ќе биде подготвена да ги искористи сите расположливи инструменти и да преземе соодветни мерки за одржување на стабилноста на девизниот курс на денарот во однос на еврото и за обезбедување на ценовната стабилност“. Ова го истакна гувернерот на Народната банка, Трајко Славески, кој учествува на панел-дискусија на 13-тата годишна конференција во организација на Институтот за меѓународни и развојни студии во Женева, на којашто присуствуваат и вицегувернерката Ана Митреска и главната економистка Анета Крстевска.
Гувернерот Славески посочи дека во изминатите години светот се соочи со неколку последователни кризи, а македонската економија како мала транзициска економија, се соочи со повеќе шокови со кои успешно се справи задржувајќи ја макроекономската стабилност како резултат на институционалниот капацитет на централната банка.
„И во претстојниот период, особено важни ќе бидат широкиот монетарен инструментариум и силната координација со другите макроекономски политики заради натамошно закотвување на инфлациските очекувања и за обезбедување одржлив економски раст“, нагласи гувернерот Славески.
Тој додаде дека, и покрај очекувањата за постепено намалување на инфлацијата, и натаму има бројни ризици поврзани со динамиката на цените на услугите, при што ја посочи координацијата помеѓу монетарната и фискалната политика како најважна во сегашниот економски контекст.
„Структурните предизвици, како што се процесите на деглобализација, непредвидливите трговски тензии, демографските промени, како и технолошкиот напредок со посебен акцент на вештачката интелигенција, и натаму ќе влијаат врз потенцијалниот економски раст и инфлацијата. За да се приспособиме кон овие околности, потребен е проактивен пристап и структурни реформи коишто ќе обезбедат отпорност на економијата и ќе придонесат за ублажување на инфлациските притисоци на подолг рок“, заклучи гувернерот Славески, нагласувајќи дека централните банки внимателно ги следат случувањата во светот и се подготвени навремено да реагираат.