Економија
Бочварски: Овозможуваме пристоен дом за 47 социјални семејства од Дебар

Четириесет и седум социјално загрозени семејства во општина Дебар ќе добијат сопствен дом во новата социјална зграда, изјави министерот за транспорт и врски Благој Бочварски, кој денеска заедно со заменик-министерот за транспорт и врски Беким Реџепи, директорот на АД за стопанисување со станбен и деловен простор Зоран Ѓоргијев, во придружба на градоначалникот Дука, извршија увид во изградбата на социјалната зграда.
Зградата има 2 ламели со вкупно 47 станбени единици, инвестиција вредна повеќе од 1 милион евра.
„Денеска сме тука, во Дебар, да извршиме увид во изградбата на социјалната зграда која има 47 станови и кои ќе бидат дом за исто толку социјално ранливи семејства од општина Дебар. Инвестицијата е над 1 милион евра, но грижата кон овие категории граѓани нема цена, работиме силно за да обезбедиме кров над глава за секој граѓанин во земјата. Фокус ставаме на станбено социјалната политика и тоа најдобро го покажавме со распишување на јавните повици за распределба на социјалните згради во Пробиштип, Виница и во Свети Николе“ – изјави министерот Бочварски.
Министерот Бочварски истакна дека во завршна фаза е целосната реконструкција на патот Маврови Анови до Жировница како единствена патна врска до Дебар. Исто така, потенцираше дека со силно темпо се работи и на изградбата на новиот патен правец од Дебар до Кичево, со што го поврзуваме дебарскиот регион со Коридор 8.
„Ова е добар пример како централната власт во координација со локалната со конкретни проекти им помага на граѓаните. Со Општина Дебар имаме и други заеднички проекти што ги реализираме како проектите за рехабилитација на локалната патна мрежа, што се приоритет за општината. И во ова време на енергетска криза инвестираме силно во сите општини и помагаме во нивниот понатамошен развој“ – изјави заменик-министерот за транспорт и врски, Беким Реџепи.
Директорот на АД за стопанисување со станбен и деловен простор истакна дека зградата ќе се изгради до крајот на наредната година.
„Објектот се состои од приземје и пет ката, со вкупно 47 станбени единици од кои на приземјето се предвидени четири станови за лица со посебни потреби. Во моментот се изведуваат ѕидарски работи и се вградува надворешна ПВЦ-столарија, се работи на водоинсталатерски и електротехнички инсталации. Вкупната инвестиција е над 1 милион евра и очекуваме градбата да заврши до крајот на следната година“ – изјави директорот Зоран Ѓоргијев.
„Општина Дебар ги детектираше социјално ранливите семејства. До сега преку преку буџетот на општината ги плаќавме месечните кирии со што ги згрижувавме овие семејства, но еве со оваа социјална зграда конечно ќе може да им обезбеди постојан кров над глава“, изјави градоначалникот на Дебар, Хекуран Дука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Манасиевски: Македонија ќе стане транзитен центар за гас и нето извозник на струја

„Од држава што увезуваше струја и беше енергетски слепо црево, сега стануваме транзитен центар за гас и иднина на извоз на енергија – ова е енергетиката со ВМРО-ДПМНЕ,“ порача денеска Валентин Манасиевски.
Манасиевски го презентираше прегледот на првата година работа на Владата предводена од ВМРО-ДПМНЕ во секторот енергетика, потенцирајќи дека е направен радикален пресврт по, како што рече, „седум години застој и злоупотреби“.
Тој најави дека преку новите гасни интерконектори со Грција и Србија, Македонија ќе стане клучна транзитна точка за пренос на природен гас кон Србија и Средна Европа. Станува збор за гас од ТАП гасоводот и од терминалот во Александропулис, кој ќе поминува низ земјава со капацитет до 3 милијарди нормални метри кубни годишно.
„Ова значи гаранција за енергетска диверзификација на целиот регион и значително зголемување на употребата на неруски гас – американски, азербејџански и друг“, изјави Манасиевски.
„Само за една година поставивме темели за Македонија од нето увозник да стане нето извозник на електрична енергија. Следуваат големи проекти за производство на струја – фотоволтаици, хидро, ветро и нови инвестиции,“ рече Манасиевски.
Тој посочи дека новиот Закон за енергетика го поставува секторот на стабилни нозе, а новиот услов за батериски системи кај фотоволтаичните централи ќе овозможи поефикасна и стабилна мрежа.
Дополнително, тој информираше дека е инсталиран нов 400kV трансформатор во Битола 2, со што се гарантира стабилноста на југозападниот дел од државата. Концесискиот надомест за рудниците, пак, е зголемен два и пол пати, што директно го полни буџетот на државата.
„Одговорна власт значи повеќе пари за државата, не за партиски џебови“, истакна Манасиевски.
Економија
Трет ден хаос со „МојДДВ“, граѓаните револтирани, не можат да скенираат фискални сметки

Апликацијата „МојДДВ“ не функционира веќе трет ден, а револтирани граѓани масовно пријавуваат дека не можат да ги скенираат фискалните сметки и да го остварат своето право на поврат на ДДВ.
Проблемите со апликацијата започнаа уште пред неколку дена, а Управата за јавни приходи (УЈП) вчера официјално потврди дека станува збор за технички проблем и увери дека се работи на негово отстранување.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција“, велат од УЈП.
Од институцијата не прецизираат кога „МојДДВ“ ќе проработи, а засега корисниците се оставени да чекаат, со надеж дека нема да изгубат право на поврат на средства.
Во меѓувреме, на социјалните мрежи се појавуваат реакции од граѓани кои се жалат дека изгубиле време обидувајќи се безуспешно да ја користат апликацијата. Многумина бараат одговорност и транспарентност од институциите, но и посочуваат дека слични прекини во работата на апликацијата се случуваат сè почесто.
Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.