Економија
(Видео) Анѓушев: Одговорноста да се имплементираат целите за одржлив развој е на Владата
Најдоброто е да создадете општество во кое ќе има правда за сите и добри услови за сите. Тоа е и целта на исполнувањето на овие цели за одржлив развој, дали е возможно, сигурно е, а дали е лесно, секако не е лесно. Одговорноста да се постигне тоа им припадна на тие што ја презеле одговорноста да ја водат оваа држава на сегашната влада и на сите следни влади, истакна заменик-претседателот на Владата за економски прашања, Кочо Анѓушев, на церемонијата за доделување на наградите „Предводници на целите за одржлив развој“, што се одржа првпат во нашата земја како дел од проектот „Градење меѓуресорски партнерства за одржлив развој“.
Проектот е спроведен од организациите „Конект“, „Агора“ и „Нетворк Бугарија“, а е поддржан од УНИЦЕФ и Делегацијата на Европската Унија.
„Агендата 2030 изгледа амбициозно и би било добро да биде остварена колку што е можно побргу, а целосно до 2030 година. Затоа, Владата во своите програмски определби постави најголем дел од целите на агендата, како целта број 7, која во голем дел е исполнета, а се однесува на енергетиката и енергетската ефикасност за што се веќе донесени законите и се исполнети целите. Но, тука остануваат целите во делот на правдата, пристапот до образованието, инклузивниот одржлив економски раст, што значи добра и еднаква благосостојба за сите жители во едно општество“, објасни Анѓушев.
На неодамнешната седница на Националниот совет за одржлив развој, со кој претседава вицепремиерот, Владата донесе стратегија за реализација на 5 приоритетни цели од 17 општи цели за одржлив развој, како и 169 специфични цели, чија реализација се следи преку 243 глобални индикатори.
Петте цели на кои се фокусира Владата се: цел 1 – да се стави крај на сиромаштијата во сите форми, насекаде; цел 4 – да се обезбеди инклузивно и правично квалитетно образование и да се промовираат можности за доживотно учење за сите; цел 8 – да се промовира инклузивен и одржлив економски пораст, целосно и продуктивно вработување и достојни работни места за сите; цел 13 – да се преземат итни дејства за борба против климатските промени и нивните влијанија и цел 16 – да се промовираат мирни и инклузивни општества за одржлив развој, да се обезбеди пристап до правда за сите и да се изградат ефективни отчетни и инклузивни институции на сите нивоа.
Анѓушев особено го истакна и се осврна на придонес на компаниите предводници кон исполнување на целите за одржлив развој, како и на нивната улога во создавањето просперитетна иднина за државата.
„Целите за одржлив развој не може да се исполнат ако се насочиме само на едно нешто, само на образование или само кон социјалната политика, туку треба да биде сеопфатно. Затоа, централно место во сето ова имаат и компаниите затоа што се тие работодавци и тие треба да бидат општествено одговорни и да целат кон тоа заедно со заедницата да градат подобро општество. Затоа, сакам да ги поздравам и да им честитам на компаниите што учествуваат во исполнувањето на целите за одржлив развој за добиените награди, компании што биле социјално одговорни и придонеле за нашето општество да биде подобро и да сме еден чекор поблиску кон остварување на целите за одржлив развој“, потенцира вицепремиерот.
Тој нагласи дека целите за одржлив развој се визија за создавање иднина на светско ниво и нудат можност за воспоставување нова димензија на бизнис-секторот. Усвоени во 2015 година од 193 држави во Обединетите нации, меѓу кои е и нашата земја, тие може да ја обликуваат новата ера на компаниите што се посветени и отворени за нови предизвици, заклучи вицепремиерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Меморандум за соработка во полето на гасниот сектор помеѓу Македонија и Србија: ќе се испитува можноста за развој на нова директна врска меѓу двата системи за гас
Министерство за енергетика, рударство и минерални суровини на Република Северна Македонија склучи Меморандум за соработка во полето на гасниот сектор со Министерството за рударство и енергетика на Република Србија, во просториите на Владата.
Гасниот интерконектор Северна Македонија – Србија е означен како Водечки проект за енергетиски мрежи во рамки на ЕУСАИР (EU Strategy for the Adriatic and Ionian Region) со што ќе се обезбеди сигурност во снабдувањето за регионот на Југоисточна Европа и ЕУ по пат на имплементација на проектите од Јужниот гасен коридор на ЕУ и Трансбалканскиот гасен прстен, преку диверзификација на рутите и изворите за снабдување со гас.
Со меморандумот се предвидува испитување на можноста за развој на нова директна врска меѓу двата системи за гас. Во рок од 9 месеци ќе се изработи Физибилити студија и Студија за оценка на влијание на проектот врз животната и социјалната средина за новата гасна интерконекција помеѓу државите.
Врз основа на резултатите од техничките и пазарни истражување и земајќи ја во предвид постојната инфраструктура за пренос на гас кај двете страни, Страните ќе ги анализираат и ќе превземат соодветни одлуки за реализација на проектот и координирање на понатамошни дејствија.
Економија
Зголемување на цената на горивата
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 1,81% во однос на одлуката од 30.9.2024 година.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 1,00 ден/лит.
Малопродажната цена на Екстра лесното масло за домаќинство на (ЕЛ-1) се зголемува за 1,50 ден/лит.
Малопродажната цена на Мазутот М-1 НС се зголемува за 1,108 ден/кг и сега ќе изнесува 42,780 ден/кг.
Економија
Претседателката на ММФ: Живееме во свет на бавен економски раст и високи долгови
Меѓународниот монетарен фонд може да им помогне на земјите да се приспособат на бавниот економски раст и високиот долг бидејќи ова е светот во кој моментно живееме, изјави денеска претседателката на Меѓународниот монетарен фонд (ММФ), Кристалина Георгиева, на конференцијата за одржливост во Хамбург.
Според неа, тоа значи дека реформите што придонесуваат за раст, подобрување на инвестициската клима и напредок на пазарот на трудот треба безмилосно да се одложат.
„Меѓународниот монетарен фонд може да им помогне на своите членки да ги спроведат неопходните реформи, со што овие земји ќе имаат потенцијал да го зголемат растот на БДП во текот на четири години за осум отсто“, додаде Георгиева, пренесува „Танјуг“.
Конференцијата беше отворена со говорот на германскиот канцелар, Олаф Шолц.