Економија
(Видео) Георгиевска: Со речиси две милијарди денари ќе има поддршка за плати за 60.000 вработени

Преку финансиската поддршка за исплата на плати изминатиов период во државата се спасени стотици илјади работни места и се помогнаа илјадници домашни претпријатија, истакнуваат од СДСМ.
Од таму потенцираат дека со петтиот пакет економски мерки, Владата предводена од СДСМ продолжува со вистинска грижа за работниците и за економијата.
„Спас на работните места и градење стабилна, развојна економија се приоритетите од кои се водиме како државничка и одговорна партија. Токму затоа првата мерка од петтиот пакет е финансиска поддршка за исплата на плати за февруари и март 2021 година во вредност од 1 милијарда и 920 милиони денари“, потенцираат од СДСМ.
Објаснуваат дека поддршката и овој пат ќе биде скалеста и ќе изнесува од 14.500 до 21.776 денари за месечна плата за вработен во зависност од тоа која компанија колкав пад на приходи имала во текот на ноември и декември 2020 и јануари 2021 година во споредба со ноември и декември 2019 и јануари 2020 година.
Со оваа мерка, според информациите од владејачката партија, ќе бидат опфатени 60.000 вработени.
Од таму нудат уште една алтернатива. На компаниите ќе им биде на располагање и мерката број два, односно кредити со 0 % камати преку Развојната банка на Северна Македонија за компаниите од дејностите туризам, занаетчиство, угостителство, транспорт, индустрија за организација на настани, приватните здравствени установи, како и за самостојните вршители на дејност.
„Во зависност од вкупниот обем на работа и зголемената добивка, компаниите ќе имаат можност да добијат скалесто неповратен дел од 30 до 50 % од самиот кредит, а за реализација на оваа мерка предвидени се 615 милиони денари, односно 10 милиони евра“, истакнуваат од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Укинувањето на царините за стоките од САД не е само трговска одлука, туку и дипломатски чекор, вели Стојанова

Со новите измени и дополнувања на законот за царински тарифи, Собранието ќе даде зелено светло на планот на Владата, да се намалат царински давачки на голем број суровини и репроматеријали кои што се користат во домашната индустрија и енергетика, изјави Дафина Стојаноска, пратеничка од ВМРО-ДПМНЕ.
„Списокот со околу 70 производи кој е составен на транспарентен и инклузивен начин, во соработка со стопанската комора, вклучува намалување до 50% на царинските стапки кои важат во ЕУ, како и укинување на царините за увоз од САД. Овие измени ќе значат пониски трошоци за домашното производство, а со тоа, зголемена конкурентност на странските пазари, нови инвестиции и повеќе вработувања“, рече таа.
Укинувањето на царини за стоките со потекло од Соединетите Американски Држави, пак, додаде Стојаноска, не е само трговска одлука, туку и дипломатски чекор, со кој што испраќаме сигнал за зголемена подготвеност за соработка со нашите стратешки партнери и поддршка за слободната трговија.
„Со оваа законска измена македонските компании ќе станат поконкурентни, ќе се намалат цените за производство и ќе се зголеми извозот со што директно ќе влијае на раст на економијата. Ова е само еден чекор од поширокиот План за економски раст. Клучна измена со која се посветуваме на економијата во пракса, а не само на хартија“, рече Стојаноска.
Економија
Цените на нафтата го забележаа најголемиот скок во последните неколку години поради стравот од војна

Глобалните цени на нафтата пораснаа за повеќе од четири проценти, забележувајќи го најголемиот дневен процентен пораст од март 2022 година, поради стравувањата дека потенцијалното проширување на конфликтот на Блискиот Исток би можело да предизвика големи прекини во снабдувањето со енергија.
Цената на „Брент“, меѓународниот референтен стандард, се зголеми за 4,3 проценти на 72,40 долари за барел, додека американската референтна нафта „West Texas Intermediate“ (WTI) скокна за пет проценти на 71,40 долари за барел.
Според Ројтерс, ова се најголемите еднодневни скокови за двете референтни цени на нафтата од март 2022 година, кога започна војната во Украина.
„Остриот пораст на цените на „Брент“ ги одразува не само тековните ризици за снабдување, туку и растечкото чувство дека потенцијалната ескалација на конфликтот би можела да трае, за разлика од претходните краткотрајни епизоди меѓу Израел и Иран“, рече Ахмад Асири, истражувачки стратег во „Пеперстоун“.
Нервозата на пазарите дополнително се потврдува со движењата на американските берзи, пренесува Танјуг.
Економија
Инспекторите секојдневно се на терен, угостителите и трговците да издаваат фискални сметки

Управата за јавни приходи ги потсетува сите угостители, трговци и вршители на дејност на законската обврска да го регистрираат готовинскиот промет преку одобрен фискален систем и да издаваат фискални сметки за секоја наплатена стока или услуга.
„Покрај тоа, деловните субјекти се должни да го евидентираат остварениот промет и да го уплатат кај носителот на платниот промет, најдоцна наредниот ден по денот на реализација на прометот. Оваа обврска важи за сите кои вршат готовински промет, без разлика дали се обврзници за ДДВ или не, како и без оглед на тоа дали дејноста е постојана или сезонска“, велат од УЈП.
Од таму додаваат дека активностите се дел од мерките кои Управата за јавни приходи ги презема заради зајакнување на даночната усогласеност и обезбедување еднаков третман на сите даночни обврзници.
„Работењето во согласност со законските прописи придонесува за создавање транспарентно деловно опкружување, фер конкуренција и заштита на интересите на граѓаните и државата. Непочитувањето на законската обврска и нерегистрирање на готовинскиот промет, согласно ЗРГП повлекува санкции и тоа изрекување глоби и затворање на деловните објекти“, велат од УЈП.