Економија
(Видео) Славески: Нивото на корупција може да остави катастрофални последици по економијата и образованието
Oд вчерашните изјави на Љупчо Николовски гледаме дека сме добиле висок владин функционер не за борба, туку за забошотување на корупцијата, рече на прес-конференција Трајко Славески од ВМРО-ДПМНЕ, во врска со светскиот индекс за корупција што вчера го објави „Транспаренси интернешнл“.
„Не пораснала корупцијата, ќе каже Николовски, туку пораснала перцепцијата за неа! Па тоа е единствениот начин за мерење на нелегалните активности за злоупотреба на моќта во лична корист. Ова е како да кажете дека не се зголемила недовербата во власта кај граѓаните, туку само се намалил нејзиниот рејтинг“, објасни Славески.
Според него, како и обично, СДСМ причината за дебаклот на полето на спречување на корупцијата и овој пат ја бара во опозицијата и ја лоцира во некои, како што кажа, наводни остатоци во сферата на судството.
„Владеењето на правото е важен елемент за имиџот на една земја на планот на корупцијата, но индексот за кој зборуваме се формира и врз основа на други показатели кои се темелат на анкетни истражувања со бизнисмени, домашни и странски, и релевантни експерти, од разни области за корупцијата во доменот на обезбедување лиценци и дозволи; корупција кај јавните набавки; во областа на образованието и здравството и сл“, додаде тој.
Славески во своето обраќање предупреди на катастрофалните последици од високото ниво на корупција по економскиот раст во една земја.
„Инвеститорите соочени со корупција од страна на носителите на власта се воздржуваат од инвестиции и ширење на постојните бизниси, што го намалува долгорочниот потенцијал за раст на економијата, а со тоа и повисок животен стандард на граѓаните“, посочи претставникот на ВМРО-ДПМНЕ.
Тој подвлече дека високото ниво на корупција, исто така, не е погодно тло за поамбициозни реформи во образованието.
„Корупцијата негативно влијае врз мотивацијата на луѓето за инвестирање во својот човечки капитал, а во драстична форма го поттикнува иселувањето на младите, со што се губи есенцијална супстанца за просперитет на економијата и општеството на долг рок“, рече Славески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.