Економија
(Видео) Со полиција сметководителите ги спречија колегите да влезат на седницата, тензично во хотелот „Порта“

Со полиција и приватно обезбедување сметководителите спречија некои од своите колеги од Институтот на сметководители и овластени сметководители (ИСОС) да влезат на денешната седница на собранието. Иако се членови на Институтот, тие не добиле покани, па обвинуваат дека и денешната седница е продолжение на низата скандали со непотизам, нетранспарентно работење и финансиски криминали што го тресат Институтот. Атмосферата во хотелот „Порта“ беше тензична, голема екипа полицајци го следеа обидот на сметководителите да влезат на седницата, а приватно обезбедување, пак, не дозволуваше никој да се доближи до вратата зад која почна седницата.
„Во изминатите две години, ИСОС, наместо да ја врши функцијата за која е создаден – за унапредување на сметководствената професија во Република Македонија, во своето работење се соочува со сериозни неправилности, непотизам и нетранспарентност во изборот на органите на ИСОС, финансиски криминал и слично, нешта за кои Министерството за финансии веќе реагира и по чии забелешки требаше да се постапи. Но, наместо почитување на записникот, работата на Институтот целосно се блокира. Се одржа скандалозното собрание на 3 мај, каде што ниту еден став на подружниците не беше исполнет, спротивно на Статутот на ИСО, а намерата и за денешното нелегитимно закажано собрание е иста, зад затворени врати и под притисоци и манипулации да се изгласаат одлуки и акти за исполнување нечии лични интереси. Затоа, денес, стоиме тука, во знак на протест и незадоволство, го повикуваме Министерството за финансии како надлежен орган да им даде привремена мерка на сите акти што денес ќе се изгласаат сè до записникот од инспекцискиот надзор“, рече Сандра Андреева во име на сметководителие на кои не им беше дозволен влез на седницата.
Сметководителите бараат Министерството за финансии да направи инспекциски надзор за законитоста на денешното собрание и итно да интервенира во темелна промена на Законот за сметководствените работи поради неговата очигледна нефункционалност.
Собранието беше затворено и за медиумите. Иако обезбедувањето дозволи новинарските екипи да влезат на седницата, Маја Георгиевска, која претседаваше, ја прекина седницата и побара новинарите да излезат за да може да продолжи. Нејзините помошници најавија дека ќе испратат соопштение за медиумите во текот на денот.
Неофицијално, на дневен ред на денешната седница има три точки, односно разгледување на записникот од претходниот состанок, разгледување на моментната состојба во еснафот, идентификација на проблемите и предлози за надминување и точката разно. И на оваа седница нема точка самораспуштање на сите тела според насоките од подружниците и избор на сосема ново раководство на Институтот за надминување на утврдените неправилности – непотизам, финансиски криминал и нетранспарентно работење. Институтот нема претседател оти во мај Ленче Папазоска си поднесе оставка, а нов претседател не е избран. Во исто време кога таа поднесе оставка, Управата за финансиска полиција против неа поднесе кривична пријава оти од сметката на Институтот префрлала пари што завршувале на сметки на физички лица што не извршиле никакви услуги за Институтот. Кривична пријава до Основното јавно обвинителство поднесе Управата и против С.М., овластено лице во Стопанската интересна заедница Национален комитет на Интернационална стопанска комора во Република Македонија (ИСК Македонија), кое помагало во извлекувањето на парите од сметката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
МЗШВ: Во четвртиот квартал од 2025 година ќе биде објавен јавниот повик за претприемачите во прехранбената индустрија

Министерството за земјоделство, шумарство и водостопанство ја информира јавноста дека во четвртиот квартал од оваа година ќе биде објавен Јавниот повик 02/2025 за користење на средства од ИПАРД Програмата 2021-2027, мерка 3 – „Инвестиции во основни средства за преработка и маркетинг на земјоделски и рибни производи”.
Оваа мерка претставува исклучителна можност за македонските претприемачи во прехранбената индустрија да ги унапредат своите капацитети и да станат поконкурентни на домашниот и меѓународниот пазар.
Мерката 3 – „Инвестиции во основни средства за преработка и маркетинг на земјоделски и рибни производи”од ИПАРД Програмата овозможува финансиска поддршка за модернизација на преработувачките капацитети, инвестиции за преработка и маркетинг на земјоделски и рибни производи, како и усогласување со европските стандарди. Преку оваа мерка се поддржува зголемувањето на конкурентноста на земјоделското производство и земјоделско-прехранбениот сектор во целина.
Средствата за оваа мерка се обезбедени преку Инструментот за претпристапна помош за рурален развој на Европската Унија (ИПАРД Програмата за периодот 2021 – 2027 година).
Министерството ги повикува сите заинтересирани да започнат со навремена подготовка на потребната документација и да ги следат официјалните објави на Агенцијата за финансиска поддршка во земјоделството и руралниот развој.
Економија
Издадени првите лиценци за батериски систем за складирање на електрична енергија од обновливи извори

Регулаторната комисија за енергетика, водни услуги и услуги за управување со комунален отпад (РКЕ) ги издаде првите лиценци за батериски систем за складирање на електрична енергија од обновливи извори на компанијата ЕНЕРГО СОЛАР СИСТЕМИ.
Станува збор за два батериски системи со вкупна инсталирана моќност од 2 600 kW, што се инсталирани во склоп на две различни фотонапонски електроцентрали кои се веќе изградени и во функција.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава. Во РКЕ очекуваме голем број сопственици на ФЕЦ да поднесат барање за инсталирање на “сториџи“, но исто така очекуваме интерес да појават и компании кои би биле самостојни оператори на складишта само со батериски системи. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар. Истите можат да даваат услуги на операторот на електропреносниот систем за балансирање на истиот, како и одржување на одредени параметри на мрежата во пропишани граници. Складирањето на енергија во периоди кога има вишок и нејзино користење во периоди кога потребите од електричната енергија се зголемуваат се очекува дека ќе влијае и врз намалување на вкупните трошоци во системот.“ посочи Марко Бислимоски, претседател на РКЕ.
Условите, постапката и потребната документација за добивање на лиценца за складирање на електрична енергија се уредена во Законот за енергетика и Правилникот за лиценци, .
Економија
Владата усвои измени: Се укинува ослободувањето од ДДВ за онлајн пратки во вредност до 22 евра

Со цел зајакнување на домашната економија, поддршка на локалните компании и создавање нови работни места, Владата усвои измени и дополнувања на Законот за данок на додадена вредност, со кои се укинува ослободувањето од ДДВ за онлајн пратки во вредност до 22 евра. Законските измени веќе се во собраниска процедура, а нивното спроведување се очекува да има директни позитивни ефекти врз економијата и работењето на домашните компании.
Со оваа мерка, околу 4 милиони денари месечно, колку што во одредени периоди изнесува прометот кон странските онлајн платформи, ќе се пренасочат кон домашното стопанство. Овие средства ќе придонесат за развој на локалните компании, отворање нови работни места и исплата на повисоки плати на вработените.
Ова претставува значаен чекор во заштита и поддршка на домашната економија, особено во услови на зголемена глобализација и дигитална трговија.
Дополнително, измените ќе помогнат во намалување на сивата економија, имајќи предвид дека досегашниот систем овозможуваше злоупотреби – односно увоз на стоки ослободени од данок кои понатаму се продаваат на домашниот пазар.
Со оваа измена, државата испраќа јасен сигнал на поддршка за домашните компании кои создаваат додадена вредност и вработуваат граѓани во земјата, велат од Министерството за финансии.