„Денеска, по барање на земјоделците, сум во Кочанскиот Регион, поточно во општина Зрновци. Потенцираат и укажуваат дека проблемите со наводнувањето се алармантни.Се наоѓаме на самото место каде што поминува левиот магистрален канал, каде што треба да се покрие земјоделската површина од 3 илјади хектари за наводнување и тоа со укажување на земјоделците веќе втора година овој канал е нефункционален. Малку е нелогично и несфатливо додека Љупчо Николовски организира скапи коктели во Министерството за неговото „успешно“ менаџирање со својот шеф Зоран Заев, земјоделците ронат солзи и мака мачат како да ги наводнат површините“, изјави Цветан Трипуновски, член на ИК на ВМРО-ДПМНЕ.

Според него, земјоделците ги информирале дека без наводнување на оваа површина, практично е невозможно да се одгледуваат земјоделските култури. Повеќето не ги обработиле, а оние што го имаат земено под закуп земјоделското земјиште, практично го откажуваат бидејќи негрижата на АД „Водостопанство“, Николовски и Зоран Заев, кои ветуваа во предизборието во 2016 година дека ќе донесат живот за земјоделците, гледаме дека на самото место не е така.

„Денеска сме во Кочани, ситуацијата е алармантна. Меѓутоа, ако се навратиме назад, ќе видиме дека и минатата година немаше земјоделски сектор, немаше гранка во која земјоделците не претрпеа огромни штети. Дали тоа беа градинарите, дали во моментот беа производителите на праска во Росоман, дали тоа беа производителите на слива во Малешевијата, дали беа производителите на пченица, бостан итн.? Немаше земјоделска гранка, немаше село каде што не наидоа на негрижата од Љупчо Николовски и Зоран Заев.

Од оваа средба апелираме до Зоран Заев и до неговиот министер во заминување, Николовски, но и до новиот министер, итно да се фатат за работа и да ги санираат овие проблеми бидејќи проблемот со наводнувањето не трпи. Вода мора да има кога е најпотребно. Водата, ако стигне во август, ќе стигне предоцна, само земјоделците дополнително ќе ги обременат со фактури што треба да ги платат за нешто што не го добиле како услуга. Ако не се способни, нека си заминат од своите позиции. ВМРО-ДПМНЕ има и план, стратегија и визија како да го санира она што го направи СДСМ бидејќи земјоделците заслужуваат партнер. Земјоделците заслужуваат иднина, кои произведуваат здрав и земјоделски производ. Ако не се способни, нека ги отстапат местата. ВМРО-ДПМНЕ ќе ја формира новата влада и ќе покаже како навистина треба да се работи во интерес на македонскиот земјоделец“, додаде тој.