Економија
Заев: За загадувањето обезбедени се неколкукратно повеќе средства од сите претходни буџети
За борбата против аерозагадувањето обезбедуваме неколкукратно повеќе пари од кои било буџети претходно, рече премиерот Заев во дебатата за буџетот 2020 на националниот радиодифузен сервис и додаде дека има дополнителни 100 милиони денари во владината програма во Генерален секретаријат каде директно се спроведува политиката за борба против аерозагадувањето.
Тој истакна дека и во буџетите на повеќе министерства се предвидени еколошки програми, во кои влегува и аерозагадувањето и дека вкупно станува збор за над 15 милиони евра за борба против загадениот воздух.
„Ние од ЕСМ определивме 40 милиони евра за инверторите, ако се имплементираат 10-те милиони, ќе продолжиме понатаму без штедење. Ако успееме да ги имплементираме и реализираме, ќе сториме сè за да продолжиме со овие мерки. На 166-тата седница на Владата донесовме одлука да може да почне кампањата за информирање на граѓаните како да аплицираат за инверторите и кој има право да аплицира“, информираше премиерот Заев по однос на средствата што се предвидени во буџетот за идната година наменети за борба против аерозагадувањето.
Премиерот Заев подвлече дека продолжува инвестирањето во гасоводната мрежа, за гасоводот што поминува покрај Скопје, Тетово и Гостивар, а идната година ќе се продолжи трасата кон Кичево и ќе се инвестира во мрежата директно до градовите. Како што истакна премиерот, сите овие активности претставуваат индиректно инвестирање во борбата против аерозагадувањето, нагласувајќи дека ако почнеше гасификацијата да се гради порано, наместо градбите во „Скопје 2014“, резултатите во однос на борбата со загадувањето ќе беа подобри.
Заев нагласи дека во мерки за справување со аерозагадувањето спаѓа и зголемената поддршка за производството електрична енергија од обновливи извори, како и промената на сите филтри во градинките, училиштата, промената на системите на греење каде има гас, како Струмица, Куманово, Чаир, затворот „Скопје“.
„Сето ова се ставки кои ги плаќаат различни министерства. Правиме дополнителни анализи за актуелностите во многу земји, како што е решавањето на проблемот со температурните разлики кои предизвикуваат задржување на талогот над котлините. Работиме, и иако се чини дека веднаш граѓаните не можат да ги видат резултатите, фокусирани сме на тоа“, посочи премиерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.