Економија
(Интервју) Томе Неновски: Имаме зачмаена економија, а нe чека болен период
Не очекува тешка зима и тешка наредна година. Според многу укажувања, следната година може да биде и потешка на економски план отколку сегашната, истакнува во интервју за „Макфакс“ универзитетскиот професор Томе Неновски.
Ме плаши, вели тој, што ние немаме стратегија за да се соочиме со предизвикот на светската економија и со предизвикот на домашната економија која со папочна врвка е поврзана со светската економија.
„Не чека болен период и не треба да покажуваме лажен оптимизам и да криеме дека ова што се случува ќе биде краткотрајно и дека ќе го надминеме. Не. Ќе имаме проблеми, но прашањето е како ќе се соочиме, со кој ентузијазам, со кои мерки и со каква ефикасност ќе ги применуваме тие мерки за да излеземе од оваа зачмаеност“, потенцира Неновски.
На прашањето дали парите што деновиве ЕУ и ги додели на Македонија како финансиска помош би помогнале во санирање на штетите во економијата, Неновски објаснува дека нам ни требаат многу повеќе пари од тоа што го најави Урсула Фон дер Лаен, претседателката на ЕК.
„Во ситуација кога имаме зачмаена економија и растечка инфлација, тие средства ќе бидат недоволни. Дотолку повеќе што таа помош ќе биде насочена за зголемување на енергетската ефикасност на земјата. Нема да биде насочена кон намалување на сиромаштијата или потикнување на БДП или за намалување на инфлацијата“, додава универзитетскиот професор.
Очекува дека двоцифрената, галопирачка инфлација, ќе расте и ќе го надмине прагот од 20 проценти.
Позитивно ја оценува најавата за спроведување на владините антрикризни мерки, но изразува скепса во делот на нивното применување.
„Мерките на хартија се одлични но кога ќе се применат и како ќе се применат? Искуството вели дека голем дел од тие пари, попатно кога се движат, некаде исчезнуваат. Народот има скептичност. Довербата на населението кон институциите на системот е се помала“, потенцира Неновски.
За состојбата со јавниот долг, сиромаштијата, потребата од нови задолжувања, извештајот на Светска Банка, приоритетите на кои власта треба да се насочи за ублажување на тешката состојба во економијата, во интервју за „Макфакс“, универзитетскиот професор, Томе Неновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.