Економија
Маск планира да отпушти три четвртини од вработените на „Твитер“, се шират документи

Вработените на „Твитер“ се огласија на социјалните мрежи стравувајќи дека ќе бидат отпуштени откога се појавија документи што покажуваат дека Илон Маск планира да ја намали својата работна сила за 75 отсто.
Корпоративните документи до кои дојде „Вашингтон пост“ откриваат дека милијардерот им рекол на потенцијалните инвеститори во договорот вреден 44 милијарди долари дека планира да намали три четвртини од своите 7.500 работници.
Тоа ќе ја остави компанијата само со скелет-персонал од нешто повеќе од 2.000 вработени, што, според експертите, ќе ѝ отежне на компанијата за социјални медиуми да го отфрли она што го гледа како дезинформација.
Elon Musk vows to fire 75 PERCENT of Twitter’s workforce https://t.co/e3OAm13LN6 pic.twitter.com/BWZhLdckZl
— Daily Mail Online (@MailOnline) October 20, 2022
Сега голем број вработени изразуваат стравување дека би можеле да бидат меѓу повеќе од 5.000 отпуштени работници од компанијата кога Маск (51) ќе ја преземе функцијата. Атрик Чапла, менаџерот за производи, праша дали „сите ќе одат и ќе почнат нов ‘Твитер’ заедно“.
Мет Вокер, дизајнер на производи за „Твитер“, во меѓувреме им се обрати на Маск и поранешниот извршен директор Џек Дорси во серија твитови во четвртокот вечерта пишувајќи: „Секоја одлука што ја донесе Џек нè доведе до оваа точка“.
Компанијата потроши огромни 1,5 милијарда долари на вработените минатата година и сакаше да ја намали таа сума за речиси 800 милиони долари. Менаџментот исто така планира да направи големи намалувања на својата инфраструктура ослободувајќи се од центрите за податоци што ја одржуваат страницата да работи за повеќе од 200 милиони корисници дневно.
Директорите на „Твитер“, сепак, негираа какви било отпуштања, при што генералниот советник Шон Еџет им порача на вработените да очекуваат „тони јавни шпекулации“ со затворањето на договорот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Славески со ИФЦ: соработка за унапредување на дигиталните финансии и финансиската вклученост

Гувернерот на Народната банка, Трајко Славески, ја оствари својата прва средба со претставникот на Меѓународната финансиска корпорација (ИФЦ) во земјава, Висар Перани. На средбата се разговараше за можностите за соработка меѓу Народната банка и ИФЦ во повеќе области, вклучително и во рамките на проектот на ИФЦ насочен кон унапредување на дигиталните финансиски услуги и поттикнување на финансиската вклученост во регионот.
Проектот се спроведува во контекст на стратегиските определби на ИФЦ за создавање напреден и одржлив дигитален финансиски екосистем, заради поддршка на иновациите, градење капацитети кај давателите на финансиските услуги и за развој на конкурентна и сеопфатна околина.
Во текот на разговорот, беше истакната важната улога на Народната банка во дигиталната трансформација на финансискиот систем преку современа регулатива и активности што ја поттикнуваат иновацијата. Посебен акцент беше ставен на новата правна рамка во платежната сфера, којашто овозможи отворање на пазарот за нови даватели на услуги и поттикнување на финтек-иновациите.
Гувернерот Славески ја нагласи подготвеноста на Народната банка за унапредување на соработката со ИФЦ, особено во делот на поддршката за давателите на платежните услуги во натамошната интеграција со платните системи на Европската Унија, по членството во СЕПА, како и во развојот на инстант плаќањата и подготовката на новата среднорочна стратегија за развој на платниот систем.
Претставниците на ИФЦ го нагласија значењето на усогласувањето на регулативните рамки со меѓународните стандарди и поттикнувањето партнерства помеѓу банките, финтек-фирмите и приватниот сектор.
Средбата претставува важен чекор кон унапредувањето на партнерските односи меѓу Народната банка и ИФЦ, заради зајакнување на финансискиот екосистем и промовирање на финансиската вклученост, велат од НБРМ.
Економија
Дурмиши за новата потрошувачка кошничка: ќе служи за градење политики поврзани со минималната плата и ќе се усогласи со европските стандарди

На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Економија
Трипуновски: Откупните цени за пиперката се зголемени – прва класа ќе се откупува по 45 денари за килограм

Откупните цени за пиперката се зголемени – прва класа ќе се откупува по 45 денари за килограм, изјави министерот за земјоделство, шумарство и водостопанство, Цветан Трипуновски.
„На состанокот се договорија откупните цени по класи за пиперката. За прва класа откупната цена на пиперката изнесува 45 денари, за прва-втора класа е 35 денари, за втора класа откупната цена изнесува 20 денари, а за трета класа откупната цена ќе биде 15 денари”, појасни министерот.
Тој посочи дека тоа се почетните цени со кои што ќе започне откупот на пиперката за реколтата 2025 година.
„Пиперката во Македонија се одгледува во два региони – струмичкиот и прилепскиот регион. Бербата треба да биде во договорен период за да не се соочиме со зголемена количина на берба на пиперка во текот на денот и да имаме застој во откупот”, додаде министерот Трипуновски.
Министерот истакна дека оваа година откупните цени за пиперката се зголемени во однос на минатата година.
„Текот на откупот ќе го следиме преку Државниот инспекторат за земјоделство. Како Министерство стоиме на располагање, а трендот на зголемување на земјоделското производство треба да продолжи и понатаму”, посочи тој.