Економија
Москва губи 160 милиони евра дневно, но сепак заработува пари

Ограничувањето на цените и ембаргото на Европската унија за поголемиот дел од руската нафта ги намалија приходите на Москва од фосилните горива. Но, Кремљ сè уште заработува значителни пари за финансирање на војната во Украина бидејќи лимитот од 60 долари за барел беше „премногу мек“, велат аналитичарите.
Комбинацијата од ограничувањата на Г7 – главниte демократии и забраната на ЕУ ја чини Русија околу 160 милиони евра (171,9 милиони американски долари) дневно, соопшти Хелсинкискиот Центар за истражување на енергија и чист воздух во студијата за првите недели од санкциите, што стапи на сила на 5 декември.
Бројките покажуваат дека Русија сè уште зема 640 милиони евра дневно од фосилни горива, што е помалку од 1 милијарда евра дневно од март до мај 2022 година, веднаш откако ја нападна Украина на 24 февруари.
Русија би изгубила дополнителни 120 милиони дневно почнувајќи од 5 февруари, доколку ЕУ го забрани увозот на рафинирани нафтени деривати како што е дизел горивото, од кои Русија е главен снабдувач. Тоа би ја намалило заработката на Москва на 520 милиони евра дневно до февруари.
Центарот објави дека Русија успеала да генерира 3,1 милијарди евра приход од испораките на нафта под плафонската цена, собирајќи 2 милијарди евра даночни приходи. Намалувањето на ограничувањето на 25-35 долари за барел речиси целосно ќе ги елиминира даночните приходи со приближување на цената многу поблиску до цената на производството во Русија.
Сегашната граница е над пазарната цена на руската нафта и останува во опсегот на она што и е потребно на Москва за да го балансира својот буџет.
Западните влади се мачеа да најдат начин да ги намалат приходите од фосилни горива кои се главниот извор на финансирање на буџетот на руската влада и нејзината војна против Украина. Првите санкции главно избегнуваа блокирање на испораките на нафта и природен гас, бидејќи Европската унија беше во голема мера зависна од руските фосилни горива за да ја управува својата економија и затоа што вртоглавото покачување на цените на енергијата на почетокот на војната поттикна голем скок на инфлацијата во Европа и во САД.
Намалувањето на границата може да има непредвидливи ефекти бидејќи претседателот Владимир Путин рече дека Русија нема да продава нафта на земјите што ја почитуваат границата, но таа закана не се оствари бидејќи ограничувањето е над пазарната цена.
Сепак, нафтените пазари сега се помалку фокусирани на потенцијалната загуба на руската нафта отколку на слабата побарувачка поради глобалното економско забавување, а цените паднаа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Oд полноќ поскап дизел и поевтин бензин

Регулаторната комисија за енергетика донесе Одлука со која се врши намалување на малопродажните цени на нафтените деривати во просек за 0,73% во однос на одлуката од 30.6.2025 година.
Референтните цени на нафтените деривати на светскиот пазар во споредба со претходната пресметка бележат намалување кај бензините во просек за 2,502%, кај дизелот зголемувањето е во просек за 2,230%, кај екстра лесното масло зголемувањето е во просек за 2,494% и кај мазутот зголемување во просек за околу 1,000% поради што во структурата на цените на нафтените деривати е извршено соодветно прилагодување.
Курсот на денарот во однос на доларот во изминатиот период по кој беа формирани цените со претходната пресметка е понизок за 1,2765% %
Од 8.7.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 74,00 (денари/литар)
– Моторен бензин – ЕУРОСУПЕР БС – 98 – 76,00 (денари/литар)
– Дизел гориво – ЕУРОДИЗЕЛ БС (Д-Е V) – 70,00 (денари/литар)
– Масло за горење – Екстра лесно 1 (ЕЛ-1) – 69,50 (денари/литар)
– Мазут М-1 НС – 39,409 (денари/килограм)
Малопродажната цена на ЕУРОДИЗЕЛ (Д-Е V) се зголемува за 0,50 ден/лит.
Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,50 ден/лит.
Малопродажната цена на Екстра лесното масло за домаќинство на (ЕЛ-1) не се менува.
Малопродажната цена на Мазутот М-1 НС, се намалува за 0,174 ден/кг.
Напоменуваме дека ова се максималните цени на нафтените деривати од 00:01 часот на 8.7.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.
Економија
Мицкоски: Подаваме рака на домашните и на странските инвеститори не само декларативно, туку суштински

Премиерот Христијан Мицкоски истакна дека Владата води активна и отворена политика кон привлекување инвестиции и градење економски развој базиран на стабилност, доверба и поддршка за стопанството.
На средба со Советот за странски инвестиции, составен од претставници на водечки компании кои веќе имаат присуство во земјава, Мицкоски посочи дека Македонија се наоѓа во нова фаза на економска консолидација и раст.
„Подаваме рака и на домашните и на странските инвеститори. Не само декларативно, туку суштински, низ институционална поддршка, предвидливи правила и директна комуникација. Проблемите ги решаваме заедно,“ изјави премиерот.
Тој истакна дека во првиот квартал од 2025 година, реалниот раст на БДП изнесува 3,2 отсто, а извозот во периодот јануари–мај е зголемен за 3,15 отсто, додека увозот бележи раст од само 1 отсто. Индустриското производство во мај бележи раст од 9,4 отсто во однос на истиот месец лани.
Дополнително, трговскиот дефицит е намален за околу 80 милиони долари во април и мај, што претставува намалување од 13 проценти. Мицкоски потсети и дека минатата година бил постигнат рекорд со странски директни инвестиции во износ од 1,255 милијарди евра.
„Ова е поинаква слика од онаа која ја затекнавме. Некогашната влада не се бореше за инвестиции – се бореше за провизии,“ рече тој, обвинувајќи ги претходниците за економски застој и изгубени можности.
Премиерот најави активни разговори за нови инвестиции во автомобилската индустрија, ИТ секторот, логистиката и агро-преработката, како и можни царински олеснувања за извоз на македонски производи на американскиот пазар.
Економија
Здравковски: Ребалансот на буџетот носи повеќе пари за плати, пензии, образование и здравство

Пратеникот Игор Здравковски од пратеничката група на ВМРО-ДПМНЕ денеска изјави дека со почнувањето на амандманската расправа за ребалансот на буџетот, Владата демонстрира зголемена финансиска дисциплина, раст на приходите и пренасочување на средства кон клучни сектори.
„Со ребалансот обезбедуваме 800 милиони повеќе за плати, 2,5 милијарди повеќе за пензии, 300 милиони денари дополнително за капитални инвестиции,“ рече Здравковски.
Тој нагласи дека значителни средства се наменуваат и за младите, образованието и инфраструктурата.
„Во образованието ќе се слеат 2 милијарди денари за изградба и рехабилитација на кампуси, студентски домови и училишта,“ додаде тој, притоа потенцирајќи дека проектот „Купи куќа за млади“ добива „дури 111% повеќе средства“.
Во делот на јавниот транспорт и инфраструктурата, според Здравковски, се предвидуваат дополнителни 307 милиони денари за локални патишта и зголемени средства за железничка инфраструктура. Исто така, за здравствени установи се одвојуваат 237 милиони денари за изградба, реконструкција, модернизација и дигитализација.
Осврнувајќи се на амандманите од опозицијата, Здравковски изјави дека тие се резултат на „безидејност или едноставно, хронично незнаење“, бидејќи предлагале амандмани за проекти кои веќе биле предвидени со ребалансот.
„Опозицијата наместо да ги поддржи овие реформски чекори, тие преку амандмани се обидуваат покажат вештачка грижа за некој поен плус, па меѓу другото, предлагаат измени за локалните предизвици во Кочани, кои се таложеле во нивното седумгодишно владеење. Период кога не мрднале ниту со мал прст за да сменат нешто на подобро,“ рече тој.
На крајот, Здравковски додаде дека Владата, со поддршка од Собранието, веќе подолг период работи на решавање на проблемите на граѓаните, вклучително и во делот на социјалната политика, како што се зголемување на бројот на вработени во градинките и изградба на нови домови за стари лица.