Економија
Новиот T-Cross доби пет ѕвезди во Euro NCAP тестовите

Не може да биде подобар. Најновиот член на семејството Volkswagen сега се закити со пет ѕвезди. Новиот T-Cross извонредно се покажа во реномираниот тест за безбедност Euro NCAP (European New Assessment Programme).
Независни тестери го наградија новиот SUV со највисоките резултати во сегментот на мали возила во сите категории. Како резултат на тоа, овој иновативен модел на crossover ги исполнува најстрогите безбедносни стандарди.
Новиот T-Cross има бројни системи за помош на возачот кои доаѓаат како стандард, кои претходно беа достапни само во повисоките категории на возила. Заедно со исклучителни карактеристики при несреќата на возилото и извонредна заштита на патниците, системите ја зголемуваат безбедноста, го намалуваат ризикот од судир и ја подобруваат удобноста при возење.
T-Cross – моќноста е стандард!
Како стандард, T-Cross го има системот Front Assist, вклучувајќи мониторинг на пешаците, систем за итно сопирање, помош при возење во лента, помош при стартување на патот и проактивен систем за заштита на патниците. Вториот автоматски ги затвора прозорците и подвижниот покрив, ги прицврстува безбедносните ремени и го зголемува притисокот на сопирачките ако постои ризик од несреќа. Опремата на возилото вклучува помош за менување ленти, монитор за слепи точки и придружната сигнализација за задниот сообраќај. Системот за предупредување за возачот, помошта при паркирање и приспособливиот темпомат (ACC), како дел од кои возилото е контролирано со радарски сензор за автоматско сопирање и забрзување, се опционално достапни.
Euro NCAP повторно ги создава најчестите сценарија за несреќи како дел од сеопфатните процедури за тестирање. T-Cross ги заврши сите категории за оценување со најдобар резултат, понекогаш дури и во сите категории. Како резултат на тоа, возилото постигна неверојатни 97 проценти за почит во категоријата „Заштита на возрасни патници“. Само многу малку возила ја имаат постигнато оваа вредност, покажувајќи дека малите спортски автомобили можат да бидат безбедни како поголемите модели.
Високиот рејтинг за сигурност на децата од 86 проценти подвлекува колку е T-Cross соодветен за семејството. Активните системи за поддршка постигнаа рејтинг од 80 проценти, далеку подобар од претходниот стандард во оваа категорија на возила. Покрај опремата за пасивна заштита, возилото, исто така, има и активен Front Assist за да се грижи за безбедноста на пешаците и велосипедистите. Со 81 процент возилото постигна многу високи резултати во рамките на моментално валидните сценарија за оценување во оваа категорија.
Комбинацијата на сите индивидуални рејтинзи резултира со целосна евалуација на пет ѕвезди! Најдобар резултат за T-Cross.
Како резултат на тоа, новиот мал SUV покажува дека во Volkswagen безбедноста е најважна!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Oд полноќ поскап дизел и поевтин бензин

Регулаторната комисија за енергетика донесе Одлука со која се врши намалување на малопродажните цени на нафтените деривати во просек за 0,73% во однос на одлуката од 30.6.2025 година.
Референтните цени на нафтените деривати на светскиот пазар во споредба со претходната пресметка бележат намалување кај бензините во просек за 2,502%, кај дизелот зголемувањето е во просек за 2,230%, кај екстра лесното масло зголемувањето е во просек за 2,494% и кај мазутот зголемување во просек за околу 1,000% поради што во структурата на цените на нафтените деривати е извршено соодветно прилагодување.
Курсот на денарот во однос на доларот во изминатиот период по кој беа формирани цените со претходната пресметка е понизок за 1,2765% %
Од 8.7.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 74,00 (денари/литар)
– Моторен бензин – ЕУРОСУПЕР БС – 98 – 76,00 (денари/литар)
– Дизел гориво – ЕУРОДИЗЕЛ БС (Д-Е V) – 70,00 (денари/литар)
– Масло за горење – Екстра лесно 1 (ЕЛ-1) – 69,50 (денари/литар)
– Мазут М-1 НС – 39,409 (денари/килограм)
Малопродажната цена на ЕУРОДИЗЕЛ (Д-Е V) се зголемува за 0,50 ден/лит.
Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,50 ден/лит.
Малопродажната цена на Екстра лесното масло за домаќинство на (ЕЛ-1) не се менува.
Малопродажната цена на Мазутот М-1 НС, се намалува за 0,174 ден/кг.
Напоменуваме дека ова се максималните цени на нафтените деривати од 00:01 часот на 8.7.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.
Економија
Мицкоски: Подаваме рака на домашните и на странските инвеститори не само декларативно, туку суштински

Премиерот Христијан Мицкоски истакна дека Владата води активна и отворена политика кон привлекување инвестиции и градење економски развој базиран на стабилност, доверба и поддршка за стопанството.
На средба со Советот за странски инвестиции, составен од претставници на водечки компании кои веќе имаат присуство во земјава, Мицкоски посочи дека Македонија се наоѓа во нова фаза на економска консолидација и раст.
„Подаваме рака и на домашните и на странските инвеститори. Не само декларативно, туку суштински, низ институционална поддршка, предвидливи правила и директна комуникација. Проблемите ги решаваме заедно,“ изјави премиерот.
Тој истакна дека во првиот квартал од 2025 година, реалниот раст на БДП изнесува 3,2 отсто, а извозот во периодот јануари–мај е зголемен за 3,15 отсто, додека увозот бележи раст од само 1 отсто. Индустриското производство во мај бележи раст од 9,4 отсто во однос на истиот месец лани.
Дополнително, трговскиот дефицит е намален за околу 80 милиони долари во април и мај, што претставува намалување од 13 проценти. Мицкоски потсети и дека минатата година бил постигнат рекорд со странски директни инвестиции во износ од 1,255 милијарди евра.
„Ова е поинаква слика од онаа која ја затекнавме. Некогашната влада не се бореше за инвестиции – се бореше за провизии,“ рече тој, обвинувајќи ги претходниците за економски застој и изгубени можности.
Премиерот најави активни разговори за нови инвестиции во автомобилската индустрија, ИТ секторот, логистиката и агро-преработката, како и можни царински олеснувања за извоз на македонски производи на американскиот пазар.
Економија
Здравковски: Ребалансот на буџетот носи повеќе пари за плати, пензии, образование и здравство

Пратеникот Игор Здравковски од пратеничката група на ВМРО-ДПМНЕ денеска изјави дека со почнувањето на амандманската расправа за ребалансот на буџетот, Владата демонстрира зголемена финансиска дисциплина, раст на приходите и пренасочување на средства кон клучни сектори.
„Со ребалансот обезбедуваме 800 милиони повеќе за плати, 2,5 милијарди повеќе за пензии, 300 милиони денари дополнително за капитални инвестиции,“ рече Здравковски.
Тој нагласи дека значителни средства се наменуваат и за младите, образованието и инфраструктурата.
„Во образованието ќе се слеат 2 милијарди денари за изградба и рехабилитација на кампуси, студентски домови и училишта,“ додаде тој, притоа потенцирајќи дека проектот „Купи куќа за млади“ добива „дури 111% повеќе средства“.
Во делот на јавниот транспорт и инфраструктурата, според Здравковски, се предвидуваат дополнителни 307 милиони денари за локални патишта и зголемени средства за железничка инфраструктура. Исто така, за здравствени установи се одвојуваат 237 милиони денари за изградба, реконструкција, модернизација и дигитализација.
Осврнувајќи се на амандманите од опозицијата, Здравковски изјави дека тие се резултат на „безидејност или едноставно, хронично незнаење“, бидејќи предлагале амандмани за проекти кои веќе биле предвидени со ребалансот.
„Опозицијата наместо да ги поддржи овие реформски чекори, тие преку амандмани се обидуваат покажат вештачка грижа за некој поен плус, па меѓу другото, предлагаат измени за локалните предизвици во Кочани, кои се таложеле во нивното седумгодишно владеење. Период кога не мрднале ниту со мал прст за да сменат нешто на подобро,“ рече тој.
На крајот, Здравковски додаде дека Владата, со поддршка од Собранието, веќе подолг период работи на решавање на проблемите на граѓаните, вклучително и во делот на социјалната политика, како што се зголемување на бројот на вработени во градинките и изградба на нови домови за стари лица.