Економија
Почна пријавувањето за поврат на средства за набавени пчелни матици, нерези и назимки

Сите фармери што набавиле пчелни матици, нерези или назимки во приодот од 1 јануари до 30 септември 2019 година, од денеска ќе може да поднесуваат барања за финансиска поддршка по мерката 121 – „Инвестиции за модернизација на земјоделските стопанства“.
Право на користење на средствата по оваа мерка имаат сите земјоделски стопанства запишани во Единствениот регистар на земјоделски стопанства (ЕРЗС) во Министерството за земјоделство, шумарство и водостопанство, во согласност со Законот за земјоделството и руралниот развој.
„Mаксималната вредност на прифатливите инвестиции од корисник изнесува 600.000 денари за оние фармери што набавиле пчелни матици од одобрени одгледувачници на пчелни матици во согласност со Законот за сточарството. Поддршка од 6.500.000 денари од корисник ќе може да добијат сите фармери што набавиле педигрирани чистокрвни или хибридни свињи, нерези и назимки од увоз или од признати организации“, изјави директорот на АФПЗРР, Николче Бабовски.
Финансиската поддршка се исплаќа по принцип на кофинансирање завршени и исплатени инвестиции од страна на корисникот во висина од 50 отсто од вредноста на одобрените прифатливи трошоци за инвестиции. Кофинансирањето се зголемува во случаи кога:
– се работи за инвестиции на земјоделско стопанство, чиј носител е млад земјоделец до 55 отсто;
– за инвестиции во подрачја со ограничени можности на земјоделско производство до 60 отсто;
– за инвестиции во подрачја со ограничени можности на земјоделско производство кога носителот на инвестицијата е млад земјоделец 65 отсто;
– за инвестиции во недостапни рурални заедници 75 отсто.
Барањата се поднесуваат електронски по извршена регистрација на веб-страницата на АФПЗРР, во делот e-baranje.ipardpa.gov.mk
Барателите на финансиска поддршка потребно е да креираат електронско барање за исплата со бараните податоци и да прикачат задолжителни електронски документи (фактури или сметкопотврда, кои ги докажуваат реализираните трошоци, детаљни испратници за испорачаните матици/добиток, уредно заверени, решение за запишување земјоделско стопанство во ЕРЗС при МЗШВ не постаро од еден месеци од денот на објавување на јавниот повик, фискална сметка или налог за плаќање ПП30 со извод за плаќање или налог за плаќање ПП10 со извод за плаќање на име на доставувачот, образец на договор уредно заверен со потпис и печат.
Еден барател може да поднесе само едно барање за една мерка или најмногу две барања за користење поддршка по разни мерки земајќи ги предвид и преостанатите мерки од Програмата за финансиска поддршка на руралниот развој за 2019 година.
Барателите што ги исполниле условите за користење средства се рангираат со бодирање утврдено во Правилникот за поблиски критериуми за избор на корисници по мерките за рурален развој.
– Барањата со ист број бодови ќе се рангираат според датумот и времето на поднесување на електронското барање на e-baranje.ipardpa.gov.mk
– Барањата што не се поднесени електронски на e-baranje.ipardpa.gov.mk нема да се разгледуваат.
Корисниците на средства треба да ги имаат намирено сите финансиски обврски кон Министерството за земјоделство, шумарство и водостопанство, како и финансиските обврски кон Јaвното претпријатие за стопанисување со пасишта и воден надомест кон водостопанските претпријатија.
Барателите што биле корисници на финансиска поддршка за набавка на трактори преку ИПАРД-програмата и националните програми за финансиска поддршка на руралниот развој за претходните пет години не се прифатливи како корисници на оваа мерка.
Електронски пополнетото барање за исплата од Програмата за финансиска поддршка на руралниот развој за 2019 година, уредно заверено со потпис и печат од барателот, заедно со целокупната потребна документација во оригинал се доставуваат во затворен плик со назнака на предната страна на пликот во горниот лев агол „Не отворај“, барање за исплата и архивски број на барањето (0619-12125-XXXX/1). Барањето може да се достави по пошта или лично во писарницата на Агенцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.
Економија
Вреди: Поддршка за 200 нови зелени работни места во микро, мали и средни претпријатија

Од Вреди како коалициски партнер на Владата денеска објави историска мерка за поддршка на создавање нови работни места преку зелени инвестиции, во соработка со Министерството за економија и труд и Агенцијата за вработување.
Оваа мерка ќе овозможи вработување на 200 невработени граѓани во микро, мали и средни претпријатија, кои ќе добијат финансиска поддршка преку неповратен грант од 250.000 до 750.000 денари, во зависност од бројот на новите работни места: 250.000 денари за едно работно место, 500.000 за две и 750.000 за три.
Грантовите ќе овозможат компаниите да инвестираат во нова опрема и машини, софтвер и лиценци, како и технологии за обновлива енергија и материјали за енергетска ефикасност. На тој начин, мерката создава не само работни места, туку и зелени работни места кои придонесуваат за одржлива економија.
Јавниот повик е отворен за сите микро, мали и средни претпријатија кои ги исполнуваат законските услови, со приоритет за стратешките сектори: преработувачка индустрија, земјоделство, шумарство, водостопанство, водоснабдување и управување со отпад, градежништво и транспорт. Апликациите можат да се поднесуваат до 1 септември секој работен ден од 08:00 до 14:00 часот во Центрите за вработување низ целата земја, а сите информации се достапни на веб-страницата на Агенцијата за вработување.
„Ова е чекор кој покажува дека владата не се мери со слогани, туку со резултати. Инвестираме во вработување, развој, зелена економија и безбедна иднина за сите. Ова е промената што ја ветивме – влада која работи со срце и визија“, се наведува во соопштението.