Економија
ССК: Македонија за прв пат во глобалната платформа на жени лидери

Сојузот на стопански комори на Македонија (ССК), во соработка со Здружението на бизнис жени во Република Македонија како и Светската бизнис организација Македонија, ја презентира глобалната платформа на жени лидери од јавниот и приватниот сектор преку која за прв пат од Македонија ќе бидат вклучени еминентни жени лидери.
Глобалната платформа на жени лидери функционира во насока на размена на искуства, креирање јавни политики и хармонизација со глобалните трендови.
Платформата ги обединува светските жени лидери од пет континенти од различни области, политика, економија, дипломатија, претприемништво, новинарство. Членството во уникатната платформа е по покана на еминентните жени лидери кои со своето работење, искуство и улога како жена лидер оставиле печат на национално, регионално и интернационални ниво. Примарната цел е остварување на меѓународен дијалог за унапредување на женското лидерство и креирање на стратешки политики за економски развој, што подразбира и развој на кариера, глобално партнерсто, како и трансфер на знаење и искуства. Исто така, платформата ја нагласува инспиративната улога на жената лидер.
„Релевантни и успешни примери за жени на лидерски позиции гледаме од кандидат за претседател на Америка, жена канцелар во Германија и жена претседател во Хрватска. Тука би ја споменал и комуникацијата на претседателот на Сојуз на стопански комори на Македонија, Данела Арсовска и претседателот на Република Хрватска, Колинда Грабар Китаровиќ. Таа ја истакна својата целосна поддршка за иницијативата и за вклучување на жени од Република Македонија во платформата. Цел на платформата е хармонизација на Македонија со глобалните трендови и прифаќање на можностите за жена како иден лидер на позиција како Претседател на држава или влада“, изјави Александар Зарков, оперативен директор на Сојузот.
Платформата ќе биде промовирана на првиот светски самит на жени лидери во Македонија 2017 GLOBAL WOMEN LEADERS SUMMIT, кој ќе се одржи во Скопје на 17 и 18 февруари 2017 година, на кој ќе учествуваат над 40 панелисти еминентни жени лидери како и над 300 учесници од пет континенти, креатори на јавни политики, дипломатскиот кор, корпоративна елита, новинарство. Глобалниот самит е од огромно значење за Република Македонија./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.