Економија
ССК на средба со Бесими: Потребен е реформски, инвестициски и европски модерен буџет

Претставници на Сојузот на стопанските комори, претседателот Трајан Ангелоски, потпреседателите Горан Ѓорѓиевски, Сашо Дукоски, Ромео Костадинов, како и Драган Пехчевски, член на управниот одбор, имаа средба со министерот за финансии Фатмир Бесими. На средбата се разговараше за финансиите и структурата на буџетот за следната 2024 година, како и предлози на Комората за поповолна деловна клима во нашата држава.
На состанокот беа потенцирани финансиски прашања, на кои заеднички треба да се влијае: зголемување на ефикасноста и економичноста на јавната администрација, намалување на сивата економија, примена на е-фактура и дигитализација, реструктуирање на јавните претпријатија загубари, да се инвестира во енергетска ефикасност и обновливи извори на енергија – декарбонизација како во јавниот така и во приватниот сектор, активна изградба на инфраструктура, патна, железничка, усогласување на царините со ЕУ-тарифна регулатива, сè со цел да бидеме дел од европскиот економски простор.
Во оваа пригода се разговараше и за зголемување на платите во јавниот сектор и се потенцира ова да не биде главен приоритет во следниот период бидејќи се одразува негативно на целата економија. Воведувањето на новите даноци ја намалува предвидливоста на бизнис-секторот и претставува дополнително оптоварување како и намалување на конкурентноста.
Сојузот на стопанските комори интензивно работи и се насочува кон долгорочен економски раст, подобрување на легислативата, влијае и работи на стабилен економски раст, поврзување и можност за долгорочен развој на нови ЕУ-пазари, инвестиции во зелена технологија и обновливи извори на енергија. Потребни се уште поголема фокусираност и примена на нови мерки за создавање бизнис-клима, со која ќе се овозможи зголемување на условите за производство и стимулирање на извозот, велат од таму.
„Бизнисот втемелен на заедничко работење, тоа значи градење економија втемелена на знаење, на иновации и економија, која ќе гради партнерство со сет мерки меѓу бизнисот и државата“, истакна Ангелоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.