Економија
Тасева: Анѓушев ми се закани за објавите за „Фени“, Заев ми се извини во негово име

Вицепремиерот за економски прашања во Владата, Кочо Анѓушев, ` се заканил со тужба на Слаѓана Тасева, претседателка на „Транспаренси интернешнал – Македонија“, за објавите во кои го обвинува за оркестрирање на стечајот за „Фени“. На приемот на британскиот амбасадор синоќа, пред сведоци, до неа се приближил вицепремиерот заедно со бодигардот и арогантно и агресивно ѝ се обратил.
„Дојде да се поздрави со зборовите ‘јас сум значи најголемиот криминалец меѓу криминалците, која си ти да го објавуваш моето име? Ќе те викнам на разговор да ти ја објаснам ситуацијата во ‘Фени’. Ќе одам до крај, ќе те тужам, знаеш ли кој сум јас? Јас сум најмладиот доктор на науки’“, објасни Тасева.
Таа инцидентот вели дека не го пријавила во полиција, ниту, пак, има намера да го пријави, но агресивното однесување на вицепремиерот го пријавила кај премиерот.
„Го пријавив кај неговиот работодавец, кај премерот Зоран Заев. Тој ми се извини во негово име. Рече дека бил вознемирен поради тоа што претставките по кои постапуваме доаѓаат од ‘Кунико’. Извинување од Анѓушев за однесувањето не добив“, вели Тасева.
„Кунико рисорсис„ е компанијата што го направи долгот од над 60 милиони евра во „Фени“ и на вработените не им исплаќаше плати.
Претседателката Тасева во средата поднесе кривични пријави за злоупотреба на службена должност против стечајната судија и против стечајниот управник на „Фени“ оти нетранспарентно и незаконски го воделе стечајот за фабриката и најави дека канцелариите на „Транспареси“ од Скопје, Брисел и Берлин заеднички ќе работат на утврдување на влијанието на вицепремиерот Кочо Анѓушев врз стечајната постапка.
Сите наводи на Тасева вчера ги демантираа стечајната судијка, стечајниот управник, доверителите на „Фени“ и вицепремиерот Анѓушев. Сите тврдат дека стечајната постапка е законска, а вицепремиерот Анѓушев, пак, ја охрабри да навлезе подлабоко во истрагата и да ги истражи и причините кои довеле до стечајот.
Тасева утрово заканите ги објави на „Фејсбук“. Во објавата таа му одговара на вицепремиерот на барањето да ги истражи и причините кои довеле до стечај во „Фени“.
„Господа, криминалот и работењето пред стечајот нека го истражат и докажат институциите. Ние правиме мониторинг на тоа како се води стечајот денеска. А таму има проблем, стечајот не се води добро. И затоа има паника“, објави Тасева на „Фејсбук“.
Под нејзината објава, во коментар, агресивно однесување од Анѓушев пријави и новинарот на ТВ 24 Владимир Тевчев, кој вели дека вицепремиерот го искарал за прилозите за „Фени“ на отворањето на автопатот Демир Капија – Смоквица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.
Економија
Вреди: Поддршка за 200 нови зелени работни места во микро, мали и средни претпријатија

Од Вреди како коалициски партнер на Владата денеска објави историска мерка за поддршка на создавање нови работни места преку зелени инвестиции, во соработка со Министерството за економија и труд и Агенцијата за вработување.
Оваа мерка ќе овозможи вработување на 200 невработени граѓани во микро, мали и средни претпријатија, кои ќе добијат финансиска поддршка преку неповратен грант од 250.000 до 750.000 денари, во зависност од бројот на новите работни места: 250.000 денари за едно работно место, 500.000 за две и 750.000 за три.
Грантовите ќе овозможат компаниите да инвестираат во нова опрема и машини, софтвер и лиценци, како и технологии за обновлива енергија и материјали за енергетска ефикасност. На тој начин, мерката создава не само работни места, туку и зелени работни места кои придонесуваат за одржлива економија.
Јавниот повик е отворен за сите микро, мали и средни претпријатија кои ги исполнуваат законските услови, со приоритет за стратешките сектори: преработувачка индустрија, земјоделство, шумарство, водостопанство, водоснабдување и управување со отпад, градежништво и транспорт. Апликациите можат да се поднесуваат до 1 септември секој работен ден од 08:00 до 14:00 часот во Центрите за вработување низ целата земја, а сите информации се достапни на веб-страницата на Агенцијата за вработување.
„Ова е чекор кој покажува дека владата не се мери со слогани, туку со резултати. Инвестираме во вработување, развој, зелена економија и безбедна иднина за сите. Ова е промената што ја ветивме – влада која работи со срце и визија“, се наведува во соопштението.