Управата за јавни приходи информира за неправилностите што од почетокот на мерката поврат на 15 отсто од пресметаниот ДДВ граѓаните ги пријавуваат на бројот 198. Како што велат од таму, од 1 јули 2019 година најзабележителни се пријавите за неиздавање фискални сметки, како и за сметки што граѓаните не може да ги скенираат.

Повеќето од пријавите се однесуваат на ресторани, маркети, минимаркети, колонијални продавници, фризерски студија и друго.
Некои правни лица се пријавувани и повеќепати, а има и општини за кои граѓани тврдат дека речиси ниту едно правно лице не издава фискални сметки.
Најмногу пријави за недоследности има на територијата на Скопје и тоа најчесто во општините Аеродром, Центар, Чаир и други.

Во општина Аеродром на 198 граѓаните пријавиле неиздавање фискална сметка во продавници за храна, фризирско студио, кафе-бар и други, каде што граѓаните или не добиле фискална сметка или им била издадена невалидна.

Во општина Чаир граѓани се пожалиле дека не добиле фискална сметка во слаткарница, механичарски сервис, бутик и други.

Во повеќе делови од Скопје пријавени се недоследности при издавањето на фискалните сметки од страна на механичарски сервис, гостилница, трафика, бутик, сервис за миење автомобили и други.

Во општина Тетово граѓанин дојавил дека не му била издадена фискална сметка за купен телефон, а неколку граѓани пријавиле дека фискални сметки не издаваат бензиска пумпа, неколку маркети и кафе-барови.

Јавување за недоследности во повеќе продавници и кафе-барови пријавиле и граѓани на Крива Паланка.

Граѓаните ја известиле Управата за јавни приходи и за нерегуларности и во општина Охрид. Фискална сметка не им била издадена во ресторан и на место каде што се продавале билети на настан.

Во општина Прилеп граѓаните се соочиле со неиздавање фискални сметки во продавница за храна, како и со издавање невалидни фискални сметки од страна на минимаркет.

Во општина Свети Николе граѓаните наишле на повеќе фискални сметки што се со испрекинат бар-код поради што не може да се вчита, а фискалните сметки им биле издадени во маркет.

Бледи фискални сметки, со нечитлив бар-код, забележале и граѓаните од Битола, Куманово и од повеќе делови од Скопје за што пријавиле на 198.

Во Струмица пријавени се недоследности кај колонијал, кој според пријавата на граѓани не издава фискални сметки, како и стовариште.

Од повеќе граѓани до Управата за јавни приходи од општина Дебар стигнаа реакции за неиздавање фискални сметки од страна на кафе-барови и бутик.
На 198 граѓани пријавиле и нерегуларности при плаќање услуга во угостителски објект во Галичник.

Сè почести се јавувањата за купување производи од продавници кои своите производи ги нудат и преку интернет, најчесто облека, за што на граѓаните нарачаниот производ им се доставува без да им биде издадена фискална сметка.

Мерката поврат на 15 отсто од пресметаниот ДДВ е од корист и на граѓаните и на државата. Оваа мерка значително ќе помогне и во намалувањето на сивата економија.
Во согласност со пријавите и по службена должност Управата за јавни приходи ќе спроведе интензивни контроли со цел проверка и утврдување на фактичката состојба на терен.