На синоќешната седница на Владата беа усвоени 15 мерки за унапредување на казнената политика насочени кон извршување на директна интервенција во 160 постојни материјални закони и консолидирање околу основата и рангот на прекршоците преку нивно групирање и соодветно утврдување на висината на глобите.

На синоќешната седница на Владата беа усвоени вкупно 15 мерки за унапредување на казнената политика насочени кон извршување на директна интервенција во 160 постојни материјални закони и консолидирање околу основата и рангот на прекршоците преку нивно групирање и соодветно утврдување на висината на глобите“, изјави денеска заменик претседателот на Владата Владимир Пешевски.

Пешевски информираше дека согласно усвоените мерки, прекршоците ќе бидат поделени на три категории, односно на административни престапи со проценета незначителна опасност, престапи со проценета значителна опасност и прекршоци кои предизвикуваат тешки последици по живото и здравјето на луѓето, животните и растенијата или се насочени кон нарушување во значителна мерка на функциите на државата.

„Дел од мерките се насочени кон подобрување на функционирањето на самите инспекторати и нивната организациска поставеност, а ќе работиме и на подигање на нивото на едукација на инспекторите и транспарентност во нивната подготовка со цел да се избегне толерирањето на нелојалната конкуренција, селективноста и тенденциозноста во инспекцискиот надзор и да се подобри односот на инспекторите кон работодавачите“, рече Пешевски и додаде дека дадено е упатство до инспекторите да се однесуваат поинаку отколку до сега и да бидат попријателски настроени кон бизнис заедницата.

Вицепремиерот истакна дека за првпат ќе се воведе и мерката „укажување“, односно за прекршоците од првата категорија ќе биде укажана недоследноста на прекршителот кој ќе биде должен да се јави во инспекторатот и да биде евидентиран и едуциран како да ја отстрани таа недоследност и доколку во предвидениот рок го стори тоа нема да биде казнет.

„Сите засегнати министерства во координација со државните инспекторати и другите државни органи кои вршат инспекциски надзор ќе имаат задача до крајот на јуни оваа година да достават предлог измени на материјалните закони со доградување на критериуми и прекршочна градација согласно претходните препораки“, рече Пешевски.

„Ќе започнеме со подготовки за проектот е-инспекторати со кој изборот на фирми во кои ќе се врши надзор и инспекторите кои ќе го вршат надзорот ќе се одредуваат по електронски пат, а наодите ќе бидат објавувани на веб страната на инспекторатите“, информираше вицепремиерот и додаде дека ќе биде формирано координативно тело задолжено за надгледување и помагање во имплементацијата на насоките.

Пешевски истакна дека дел од казните ќе бидат намалени, дел ќе бидат зголемени, а дел ќе се реорганизираат со цел да се подобри на бизнис климата и се креираат еднакви можности за раст и развој на сите учесници во економските процеси.

„Позитивно искуство е фактот дека донесените мерки се направени во координација со бизнис заедницата, инспекторатот и министерствата кои имаат активен придонес во вкупните напори на Владата за подобрување на бизнис климата“, истакна Пешевски./крај/иа