Официјалниот старт на уплатата на првите игри на среќа Ново Лото 7/34 и Инстант лотарија преку лозовите Среќни тркала и Ѕвезден пат започнува утре, соопшти на денешната прес-конференција генералниот директор на Државна лотарија, Јован Сиљановски.

Официјалниот старт на уплатата на првите игри на среќа Ново Лото 7/34 и Инстант лотарија преку лозовите Среќни  тркала и Ѕвезден пат започнува утре, соопшти на денешната прес-конференција генералниот директор на Државна лотарија, Јован Сиљановски.

Тој нагласи дека првото извлекување на играта Ново Лото 7/34 ќе се емитува на ТВ Сител на 3.ти мај со почеток во 20.00 часот и се надева дека првиот среќен добитник на премијата 100.000 евра ќе биде извлечен уште истиот ден.

„Ова е сосема нов концепт на играта на среќа Лото, со систем 7 од 34 и можност за уплата на 10 комбинации, со што се приредува еден полесен начин за постигнување на добивка“ рече Сиљановски.

Тој додаде дека покрај лото, се организира и инстант лотарија, преку два инстант-лозови и тоа Среќни Тркала во соработка со „Порше“ Македонија со две премии-автомобил Голф 6 ТДИ Трендлајн и Ѕвезден Пат во соработка со Автомобиле СК, со две главни добивки- автомобил Ланча Делта.

Производите на Државната лотарија на Македонија ќе се пласираат преку индиректна продажна мрежа во веќе развиените мрежи на искусните соработници како што се „Макпетрол“, „Вестерн Унион“, „Тобако“, „Техномаркет“, „Импулс“ и други.

„Нашата индиректна продажна мрежа која ја поставивме со помош на нашите партнери е подготвена да ги прима уплатите и да врши исплата на добивки на сите граѓани кои на територијата на Македонија сакаат да учествуваат во нашите игри на среќа“, додаде Сиљановски.

Според него, за почеток комплетно се подготвени приближно 200 локации опремени со најсовремени терминали, скенери, печатачи и фискални каси поврзани со лотарискиот систем.

„За управување со лотариската опрема се одржаа обуки за персоналот, а исто така секојдневно се работи и на ширење на оваа мрежа, при што се очекува до крајот на годината да се обезбедат вкупно 400 подружници ширум земјата“ рече Сиљановски.

Тој додаде дека паричните добивки кои изнесуваат 6.000 денари ќе се исплатуваат на самите уплатни места, а сите добивки над таа вредност по утврдувањето на добивката, добитникот ќе ги добива на својата трансакциска сметка.

Инаку четири отсто од Фондот кои се издвојуваат за Буџетот на Македонија се наменети за општествени корисници, односно на хуманитарни цели./крај/ир/