Економија
Сигурен пласман на тутунот со помал квалитет, а повисоки цени

Тутунското производство годинава ќе биде зголемено за околу 30 отсто, но квалитетот ќе биде помал поради честите пролетни врнежи и болестите што го зафатија родот
Пласманот е сигурен, а производителите очекуваат повисока откупна цена за пет до осум проценти. Не е исклучена и можноста за зголемување на субвенциите кои лани изнесуваа 45 денари за предаден килограм.Ова се заклучоците од денешната прва средба на тутунарите со новиот министер за земјоделство, шумарство и водостопанство Љупчо Димовски.„Производството годинава оди во нагорна линија благодарение на производителите, но и на ресорното Министерство кое обезбедува субвенции. Родот ќе достигне до 21 милион килограми. Со оглед дека во регионот имаме најквалитетен тутун, пласманот воопшто не е проблем. Ќе настојуваме да договориме и повисоки цени. Имаме такви најави, а и договорите за откуп се склучени“, изјави по средбата Живко Тасевски, секретар на Сојузот на тутунските здруженија.Според претседателот на Сојузот Данчо Милески, зголемувањето на откупната цена до осум отсто за производителите нема да значи голема добивка зашто одгледувањето тутун е макотрпна работа.„Годинава откупувачите ги зголемија цените под наш притисок, но тоа за нас не претставува речиси ништо. Оптимална цена би била околу 170 денари за килограм, но ќе бидеме задоволни ако стигнеме до 167 денари. Се надеваме дека проценката ќе биде регуларна“, рече Милески.Тутунарите на средбата побарале да им се дозволи користење површини за расад со цел групирање на производството и намалување на трошоците.„Подготвени сме да почнеме расадно производство. Одгледувањето ќе биде главно во прилепскиот крај. Имаме сорти кои надвор ќе котираат добро зашто трговците бараат квалитетен тутун“, истакна Милески.Портпаролот на Министерството Соња Трајкова потврди дека предлогот ќе биде разгледан, а ќе се прават и калкулации за евентуално зголемување на субвенциите.„Продолжуваат работните средби со земјоделците и нивните здруженија во насока на изнаоѓање најдобри начини за подобрување на стандардот во аграрот. Дел од тутунарите сметаат дека поделбата на субвенциите не треба да биде линеарно, туку по однос на квалитетот и сортата. Во секој случај, разговорите ќе продолжат“, напомена Трајкова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Владата ветува дека за околу 2,5 милиони евра ќе се зголеми буџетот за поддршка на мали бизниси

Министерството за економија и труд бара, а Владата ќе го зголеми буџетот за поддршка на бизнисите при самовработување. За околу 2,5 милиона евра ќе се зголеми буџетот за поддршка на мали бизниси, изјави во Прилеп Марјан Ристески, заменик-министер за екномија и труд.
За проектите за самовработување од пет, буџетот ќе се зголеми на 7,5 милиона евра. Ова зашто е огромен интересот на трите огласи на Агенцијата за вработување за најатрактивната мерка во обемниот оперативен план за вработување со кој се опфатени 40 проценти млади луѓе. На огласите има околу 6 000 пријави. Наместо 1.750, државата ќе поддржи 2.600 лица кои ќе почнат свој бизнис, најави Ристески. Министерството за економија и труд на наредната владина седница ќе побара уште пари.
-Според тоа, како Министерство, како предлог, заедно со АВРМ побаравме и очекуваме од Владата прелокација на финансиски средства на наредната владина седница. Очекуваме да се издвојат нови 300 милиони денари кои ќе бидат употребени за оваа најатрактивна мерка, мерката за самовработување. Со тоа бројката би се зголемила на 2 600 лица кои би отвориле сопствен бизнис, претежно млади луѓе до 29 години, но ќе ги опфати и сите активни баратели на работа и над 29 години. Да напоменам дека оваа мерка ќе биде поддржана и со плус 160 милиони денари кои се обезбедени со ребалансот на буџетот. Или, вкупно, овие мерки ќе бидат поддржани со зголемен буџет од над 7,5 милиона евра, изјави Ристески.
Што се однесува до потрошувачката кошничка и нејзиното пресметување, како точка ќе се најде на дневен ред на Економско-социјалниот совет (ЕСС). Од тоа ќе зависи какви мерки ќе преземе Владата. Ристески се надева дека ЕСС ќе биде свикан до крајот на наредната недела.
-Досега интензивно работеше комисијата за одредување на репрезентативност, формирана пред неколку месеци. Меѓуртоа, поради летните одмори, малку беше пролонгирано, но е завршено броењето од синдикатите кои треба да добијат реперзентативност во текот на овој период и се надевам дека до крајот на наредната недела, ќе биде официјално свикан Економско-социјалниот совет со дневен ред. Една од дискусиите ќе биде стапката на инфлација, заштита на животниот стандард и можноста дали и понатаму ќе се одредуваат нови мерки или не. Ние ја следиме ситуацијата и сето тоа ќе биде и сето што ќе биде донесено ќе биде во договор на сите страни кои учествуваат во Економско-социјалниот совет, односно со еден заеднички трипартитен договор, изјави Ристески.
Економија
Исплатени 99.743.746,00 денари кон 1.865 лица за предадени јаболка

Денеска се исплатија 99.743.746,00 денари кон 1.865 лица од подмерка 1.9 за јаболка предадени кај регистрирани откупувачи или регистрирани преработувачки капацитети, од Програмата за финансиска поддршка во земјоделството за 2024 година, извести Министерството за земјоделство.
Од таму најавуваат дека продолжува поддршката кон производителите на јаболка.
Економија
УЈП со повик: Платете го веднаш достасаниот данок по ДЛД-ГДП и избегнете присилна наплата

Управата за јавни приходи ги повикува сите даночни обврзници, кои во законскиот рок не ја платиле даночната обврска по ДЛД-ГДП 2024, да го исполнат својот даночен долг.
Во согласност со евиденцијата на УЈП, 3.155 даночни обврзници ја немаат намирено разликата за доплата на данокот на личен доход утврдена во годишната даночна пријава за данокот на личен доход (ДЛД-ГДП) за 2024 година, што требаше да се исполни во законскиот рок до 30 јуни.
„Во следниот период УЈП ќе премине кон опоменување и присилна наплата на достасаните неплатени долгови по овој основ, што ќе доведе до дополнителни трошоци по основ на камата за задоцнето плаќање од 0,03 % дневно и еднократна посебна такса во постапка на присилна наплата“, информира УЈП.
Дополнителни информации се објавени на страницата на УЈП, во делот плаќање даноци на следниот линк http://www.ujp.gov.mk/mk/plakjanje.