Лимитот за кредитите од Земјоделскиот кредитен дисконтен фонд (ЗКДФ) е зголемен од 300 илјади на 500 илјади евра, соопшти Министерството за земјоделство, шумарство и водостопанство

Зголемувањето, како што се објаснува во соопштенито од страна на Министерството за земјоделие има времен карактер. Со ова решение се удоволува всушност на барањата на винарските визби, преработувачите на овошје и зеленчук, млеко месо, печурки, зачински, лековити и ароматични производи за обезбедување поволни финансиски средства за откуп на суровина од земјоделско потекло наменета за преработка, велат од ресорот земјоделие. Кредитните средства од Земјоделскиот кредитен дисконтен фонд кои што се администрираат преку Министерството за финансии по поволни услови може да ги користат земјоделските стопанства кои имаат поднесено барање за упис во регистерот на земјоделски стопанства, мали и средни претпријатија кои се занимаваат со примарно земјоделско производство, мали и средни претпријатија кои вршат преработка на примарни земјоделски производи, како и мали и средни претпријатија чија основна дејност е извоз на примарни земјоделски производи. Согласно целната група на кредитокорисници, постојат три кредитни категории: кредити за примарно земјоделско производство до 100 илајди евра, кредити за преработка на земјоделски производи  до 500 илјади евра, освен за мелничките капацитети каде што лимитот е до 200 илјади евра и кредити за извоз на земјоделски производи, исто така, до 200 илајди евра. Намената на овие средства е за основни и обртни средства за примарно земјоделско производство, за преработки на земјоделски производи и за извоз на примарни земјоделски производи. За кредити пласирани преку вклучените деловни банки, каматните стапки изнесуваат 4 отсто на годишно ниво за кредитите наменети за примарно земјоделско производство и 5 отсто на годишно ниво за  наменетите кредити за преработка или трговија.За пласираните кредити преку вклучените штедилници, каматните стапки изнесуваат 6 отстона годишно ниво за кредитите за примарно земјоделско производство и 6,5 отстоза кредитите наменети за преработка или трговија.Кредитите ќе можат да се земат преку НЛБ Тутунска банка, Инвестбанка, Комерцијална банка, Стопанска банка – Битола, Статер банка, Стопанска банка – Скопје, УНИ Банка и штедилниците Можности и ФУЛМ. За инвестициски кредити рокот на отплата е најмногу до седум години, грејс периодот до две години со исклучк и подолго, а за обртни средства до три години со една година грејс период, со исклучок и подолго. Вкупниот расположлив фонд на ликвидни средства преку ЗКДФ моментно изнесува околу пет милиони евра, а од веќе пласираните средства обновливиот фонд годишно прибира дополнителни пет милиони евра кои се ставаат на располагање на целните групи.