Економија
Добивката преполовена, профитот голем
Банкарскиот сектор ја помина ланската криза со преполовена добивка, а банките останаа најпрофитабилни компании во државата
Народна банка на Македонија информира дека вкупната нето-добивка на банките од ланското работење изнесува 27,2 милиони евра, што е за 51 процент помалку од 2008 г., а стапката на поврат на капиталот имала значаен пад и со 5,6 проценти и за првпат во последните неколку години забележала едноцифрено ниво.
И со вакви понеповолни бројки од претходните години банкарскиот систем остана стабилен. „Наодите од стрес-тестовите што ги спроведува НБРМ покажуваат дека банкарскиот сектор во Република Македонија покажува солиден степен на стабилност и на отпорност на различни хипотетички шокови„, констатира советот на НБМ.
Приходите од камати на сите банки заедно изнесуваат околу 300 милиони евра. Но, слична е и сумата на ненаплатените побарувања. Од тие причини банките многу внимателно почнуваат со оваа година, па повеќето, претежно големите, остварената добивка ја наменија за резерви.
Комерцијална банка, која меѓу првите одржа годишно акционерско собрание, обелодени добивка од 17, 5 милиони евра. Од нив 11 милиони издвои како резерва.
Од големите банки, најголем пад во профитот има Стопанска банка, која 2008 г. ја заврши со добивка од 22 милиони евра, а 2009 г. со двојно помала. И оваа банка голем дел од средствата издвои во резерви.
Тутунска банка пред оданочување прикажа добивка од 7,1 милиони евра, што е за 3,9 милиони помалку од 2008 г., а ова се образложува со издвоените резерви.
Од Охридска банка велат дека се задоволни од ланското работење, кое ги рангирало како четврта банка во државата. Оваа банка е една од малкуте што имаа експанзија во кредитирањето, па ако порастот на кредитната активност на ниво на банкарски сектор во 2009 г. беше 3,5 проценти. Охридска банка за 10 проценти го зголеми кредитирањето на населението, а на фирмите им издаде за 26 проценти повеќе кредити отколку во 2008 г. Вкупните приходи и се зголемени за 159 проценти, нето-приходите за 14, а приходите од камати за 39 проценти.
Поуспешно од 2008 г. работела и Еуростандард банка, која лани реализирала добивка од 2,8 милиони евра, за разлика од загубата во 2008 г. од 2,1 милиона евра. Оваа банка од камати спечалила 1,7 милиони евра. Не само сумите што ги ставаат во резерва, туку и начинот на кој работат во првите месеци од 2010 г., укажува на тоа дека банките и годинава ќе бидат крајно внимателни во односот со клиентите.
Од почетокот на годинава каматните стапки се неколкупати намалени, но тие се уште остануваат високи, па кредитирањето не зема замав. Според извештајот на НБМ, кредитирањето во февруари, кога првпат паднаа каматите, се зголемило за само половина процент.
Во првите три месеци како кредити за население биле пласирани само два милиона евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Почна пријавувањето за директни плаќања по програмата за финансиска поддршка во земјоделството за 2024 година
Министерството за земјоделство, шумарство и водостопанство заедно со Агенцијата за финансиска поддршка во земјоделството и руралниот развој ги информира земјоделските стопанства, дека во период од 10 мај до 1 јули ќе можат да поднесат барања по Програмата за финансиска поддршка во земјоделството за 2024 година.
Во наведениот период земјоделските стопанства можат да поднесуваат барања за: растително производство по обработлива земјоделска површина со поледелски и градинарски култури, за одржување на постоечки површини со овошни и лозови насади како и површина за производство на сертифициран семенски и саден материјал, сточарско производство за обележани грла говеда, овци и кози, за маторици, презимени пчелни семејства како и за заклани говеда во кланица, како и за органско земјоделско производство.
Земјоделските стопанства своите барања ги поднесуваат во електронскиот систем на АФПЗРР, а доколку имаат потреба од помош или поддршка можат да се обратат во подрачните единици на МЗШВ.
Аплицирањето е преку линкот www.ipardpa.gov.mk – Директни плаќања е-субвенции. Со отварање на овој линк, во полето „Известувања/упатства“ достапни се деталните упатства за поднесување на барањето, Листата на потребни документи како и Програмата и Уредбата за директни плаќања во кои детално се претставени условите и висината на финансиската поддршка.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.
Економија
Се намалува мазутот, цените на дизелот и бензините остануваат непроменети
Регулаторната комисија за енергетика, водни услуги и услуги за управување со комунален отпад донесе oдлука со која се врши намалување на малопродажните цени на нафтените деривати во просек за 0,53 % во однос на одлуката од 7.5.2024 година.
Од 10.5.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 86,00 (денари/литар)
Моторен бензин ЕВРОСУПЕР БС-98 – 88,00 (денари/литар)
Дизел-гориво ЕВРОДИЗЕЛ БС (Д-Е V) – 74,50 (денари/литар)
Масло за горење екстра-лесно 1 (ЕЛ-1) – 74,00 (денари/литар)
Мазут М-1 НС – 44,609 (денари/килограм)
Малопродажната цена на „мазутот М-1 НС“ се намалува 1,223 денар/кг и сега ќе изнесува 44,609 денари/кг.
Малопродажните цени на бензините ЕВРОСУПЕР БС-95 и ЕВРОСУПЕР БС-98, како и на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) не се менуваат.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините 2,939 %, кај дизелот 1,523 %, кај екстра-лесното масло 1,341 % и кај „мазутот“ намалувањето е 3,608 %.
Курсот на денарот во однос на доларот во изминатиот период по кој беа формирани цените со претходната пресметка е понизок 0,015 %.