БЕСТ Скопје (Борд на европски студенти по технологија) оваа година по втор пат го организира локалниот инженерски натпревар -LEC.

БЕСТ Скопје (Борд на европски студенти по технологија) оваа година по втор пат го организира локалниот инженерски натпревар -LEC. Натпреварот се одржува денес и утре на Факултетот за  електротехника и информациски технологии (ФЕИТ) и Машинскиот Факултет  (МФ). Овој натпревар е идеална можност за студентите да работат на  инженерски проблем, при што можат да ја изразат својата креативност, да  ги покажат своите знаења и да ги подобрат своите способности за работа во тим. Инженерскиот натпревар е настан каде тимови од студенти ги користат своите технички, социјални и комуникациски вештини за да се натпреваруваат во две категории:  тим дизајн  (Team Design), каде  тимовите  треба да решат даден технички проблем во рамките на даденото време,  со  материјали  кои  ќе  им бидат дадени од организаторите и како резултат ќе изградат направа која што треба да ја врши потребната функција, и  студии  на  случај  (Case  Study), каде тимовите треба да решат технички проблем, кој може да биде или реален, или фиктивен, при што на крајот, тимовите не ги имплементираат своите идеи практично, туку прават презентација за решението кое го разработиле. „Цел на натпреварот е да се постигне популаризација меѓу студентите за практично искуство, а и тие да се презентираат пред заинтересираните фирми„, вели Мартин Маневски, еден од организаторите на натпреварот.Оваа година на натпреварот се пријавиле 200 студенти од сите технички факултети, вели Дејан Мирчевски, организатор на натпреварот.„Идејата ни е да го подигнеме натпреварувачкиот дух, а и студентите добро да се дружат„, вели Мирчевски.Овогодишни покровители на локалниот инженерски натпревар се софтверската компанија  SEAVUS, која на победниците во  категоријата  Case  Study  ќе  им подари iPod Shuffle, и IT компанијата VISTA Group, која пак за победниците во категоријатаa Team Design има Nikon CoolPix.  БECT Скопје  е непрофитна и неполитичка студентска организација, организирана и водена исклучиво од студенти. Своите цели ги остварува преку бројни проекти во соработка со универзитетите и компаниите во цела Европа, се со цел да понуди дополнителна едукација, развој на  студентите и подобар квалитет на работодавците. Функционира на интернационално ниво, поточно на 89 универзитети во 31 земја, каде оваа година 3.000 учесници ќе се придружат на локалните инжeнерски натпревари на нивните локални универзитети. /крај/пд/