Економија
Околу 200.000 Македонци имаат дополнителен приход

Околу 200.000 граѓани на Македонија, покрај примањата на име плата или пензија, оствариле лани дополнителен приход, за што се должни да достават годишна даночна пресметка.
Околу 200.000 граѓани на Македонија, покрај примањата на име плата или пензија, оствариле лани дополнителен приход, за што се должни да достават годишна даночна пресметка.Ова денеска го соопшти Управата за јавни приходи (УЈП), потсетувајќи ги граѓаните дека на 15 март истекува рокот, до кој што можат да ја исполнат нивната законска должност за поднесување на даночна пријава.Портпаролот на УЈП Весна Новаковиќ на денешната прес конференција информираше дека заклучно со вчерашниот ден, биле поднесени само околу 50.000 пријави и покрај тоа што рокот за поднесување на пријавите започнал на 01 јануари.„Оваа бројка е мала со оглед на тоа што останува уште неполна седмица до истекот на рокот. Очекуваме во наредните денови, до 15 март, да бидат поднесени уште 150.000 годишни даночни пријави“, изјави Новаковиќ, додавајќи дека вкупната бројка на даночни пријави се очекува да достигне 200.000.Таа информираше дека досега најмногу годишни даночни пријави биле доставени во Скопје, околу 20.000, а најмалку во Тетово, каде што околу 2.500 граѓани ја исполниле оваа обврска.Новаковиќ потсети дека обврска да поднесат годишна даночна пријава имаат сите оние кои оствариле дополнителен приход, покрај платата и пензијата, додека она лице кое што остварило приход само по основа на плата, или по основа на пензија, нема ваква обврска.Како примери за дополнителен приход, Новаковиќ ги посочи авторските договори, кириите, приходите од продажба на хартии од вредност, дивиденди, игри на среќа и останато предвидено со законот. Предмет на пријавување се и непаричните добивки од игри на среќа, како телевизори и патувања, чија вредност надминува 10.000 денари.„Во годишната даночна пријава, покрај остварениот дополнителен приход, задолжително се пријавува и приходот од платата или од пензија“, рече Новаковиќ, додавајќи дека ова прашање најчесто ги буни граѓаните.Македонските граѓани кои повеќе од шест месеци работат во странство немаат обврска да пријават годишна даночна пријава во Македонија, додека за резидентите кои што добиваат пензии од странство состојбата е различна во зависност од тоа дали постои договор за двојно оданочување со државата каде што е стекната пензијата.Парите примени преку трансфери од странство од роднини или пријатели не се пријавуваат во годишната даночна пријава за персонален данок.Лицата кои што работеле во пописна комисија имаат обврска да го пријават остварениот приходот, додека лицата кои што работат во изборна комисија се ослободени од оваа обврска.Секој исплатител на приход во Македонија има обврска на граѓанинот да му издаде даночна пресметка, врз која подоцна се пополнува даночната пријава, појаснуваат од УЈП. /крај/со/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дурмиши од Струга: Инвестираме 40 милиони евра за граѓаните да останат и напредуваат дома

Денеска во Струга, Министерството за економија и труд и Агенцијата за вработување ја одржаа јавната презентација на Оперативниот план за вработување 2025. Настанот привлече голем интерес кај граѓаните, бизнисите и локалните институции, а главниот фокус беше ставен на мерките што директно ја засилуваат вработеноста и ја стимулираат економијата.
На презентацијата присуствуваше и министерот за економија и труд, Бесар Дурмиши, кој порача дека Владата вложува во граѓаните – нивните идеи, капацитети и амбиции.
„Не нудиме празни ветувања, туку конкретни мерки, средства и поддршка. Оперативниот план е алатка за секој кој сака да започне, да се дообучи или да се вработи. Целта е јасна – да создадеме можности тука, дома“, истакна министерот Дурмиши.
Планот за 2025 година предвидува инвестиција од 40 милиони евра, насочена кон повеќе од 10.000 граѓани, а oд Министерството велат дек досегашниот одѕив покажува дека мерките веќе го даваат посакуваниот ефект.
Мерката за практикантство обезбедува вклучување на 1.352 млади лица до 29 години, од кои 40 преку онлајн практикантство. Секој учесник ќе добива месечен надомест од 12.000 денари во период од три месеци.
„Субвенционираното вработување за микро, мали и средни претпријатија веќе има над 2.000 апликации – доказ за високиот интерес на приватниот сектор да учествува во креирање нови работни места“, велат од Министерството.
Се додава и дека финансиската поддршка за започнување сопствен бизнис е успешно затворена со над 6.000 апликации, а во тек е селекцијата на корисниците, додека мерката 3.1 – Обука кај познат работодавач и понатаму останува една од најефикасните алатки за вработување.
„Овие бројки не се само статистика – зад секоја апликација стои приказна, надеж и одлука да се направи чекор напред. Нашата задача е да ја поддржиме таа одлука со реални алатки“, додаде министерот Дурмиши.
Настанот во Струга е дел од поширока теренска кампања, со која Министерството и Агенцијата за вработување ги претставуваат мерките директно пред граѓаните. Следуваат презентации во Гостивар, Кичево, Сарај, Липково и други општини со висока стапка на невработеност.
Економија
Франција го казни „Шеин“ со 40 милиони евра за лажни попусти

Франција го казни кинескиот онлајн-продавач на облека „Шеин“ со 40 милиони евра за заведување на клиентите со тврдења за попусти.
Од 1 октомври 2022 година до 31 август DGCCRF анализира наводно намалени цени за илјадници производи на француската веб-страница на „Шеин“.
Истрагата откри дека некои цени на платформата биле зголемени непосредно пред попустите или не ги вклучувале претходните попусти, објави регулаторот. Цените на повеќе од половина од анализираните производи, 57 проценти, воопшто не биле намалени, откри DGCCRF, а речиси една петтина од попустите биле помали од рекламираните.
Во 11 проценти од случаите цената била уште повисока, објави DGCCRF. „Шеин“ исто така не успеа да достави докази на својата веб-страница за да ги поткрепи своите тврдења за еколошки свесно работење, како што е намалувањето на емисиите на стакленички гасови за 25 проценти.
(Фото: ЕПА)
Економија
(Видео) Николовски: Власта удри по земјоделците, крати 478 милиони денари во ребалансот

Власта предлага антинароден и расипнички ребаланс на буџетот, со кој се кратат 478 милиони денари од поддршката за земјоделците. Во најголемиот буџет власта нема пари за земјоделците, нема пари за поголеми субвенции, но затоа има повеќе пари, 30 милиони евра за владиниот луксуз, обвини пратеникот од СДСМ, Љупчо Николовски.
Тој додаде дека во време кога земјоделците се соочуваат со драстично зголемени трошоци за нафта, ѓубрива, механизација и работна рака, власта им го завртува грбот. Наместо поддршка, рече Николовски, добиваат игнорирање.
„Спротивно на оваа антинародна политика, СДСМ останува цврсто на страната на земјоделците. Пратеничката група на СДСМ поднесува амандмани со кој бара да се врати предвидената сума за субвенции и дополнително бара конкретни мерки за реална поддршка на земјоделското производство“, рече тој.
Николовски додаде дека СДСМ предлага враќање на поддршката од 12.000 денари по грло говедо за сточарите; зголемување на поддршката за оризова арпа за реколта 2024; интервентна субвенција од 8 денари по килограм сончоглед; поддршка од 5 денари по килограм за предадена пченица; мерка од 3 денари за продадена пченка во откупни капацитети; враќање на мерката од 1.000 денари за предадено јагне и итна распределба на картичките за зелена нафта за 50.000 земјоделци.
Николовски кажа дека СДСМ и во време на ковид пандемија и војна во Украина не кратела од земјоделците туку напротив, интервенирала со дополнителни субвенции, закони и програми.
„Апелираме до Владата: наместо да уриваат што е создадено, продолжете ги добрите практики кои функционираа. Не ги оставате земјоделците сами, не им кратете од она што им припаѓа! Земјоделството не смее да биде жртва на вашата расипничка политика“, рече Николовски.