Министерот за економија Ваљон Сараќини заедно со министерот за труд и социјална политика Спиро Ристовски се обратија на 9. Директорска конференција на тема „Премостување на јазот меѓу системот на образование и потребите на работни места“, во организација на Агенцијата за вработување на Република Мак

„Во последниве неколку години, посебно поради влијанието на светската економска криза, научната јавност и креаторите на политиките посветуваат значително внимание на односот меѓу основањето на нови фирми, самовработувањето и економскиот напредок. Во Западна Европа, високите стапки на невработеност, во комбинација со ограничениот економски раст, претставуваат предизвик за креаторите на политиките да дадат поголемо значење на претприемништвото и самовработувањето, како начини да се поттикне економскиот раст и да се намали невработеноста“, истакна министерот Сараќини во своето обраќање.

Општоприфатено е мислењето дека претприемништвото е движечка сила на секоја национална економија, бидејќи претприемачите не само што самите се вработуваат, туку истовремено креираат нови работни места и на тој начин играат важна улога во економскиот и општествениот живот.

Министерство за економија, информираше Сараќини, имајќи го значењето на претприемништвото и малите и средни претпријатија, превзема разни мерки и активности за поддршка и развој на МСП и претприемништвото и тоа преку поддршка на старт-ап центрите, регионалните бизнис центри, бизнис инкубаторите, но и преку давање на услуги на МСП за воведување на стандарди, вршење промоција на нивните производи, поддршка и развој на кластерско здружување, кофинансирање на компаниите за воведување на стандарди за квалитет. Министерството за економија започна и со директна финансиска поддршка на жени – претприемачи, но исто така прави напори за промовирање на претприемништвото и претприемачкото учење со тоа што неколку години наназад кофинансира и организира обуки за студенти и средношколци за подготовка на бизнис план, трибини за самовработување, Европски ден на претприемачот итн.

„Притисокот за вработување кој се чувствува во актуелното бизнис опкружување, особено со зголемувањето на бројот на млади невработени луѓе, би можел во голема мерка да биде олеснет доколку бизнисот и образовниот систем работат многу поблиску во подготвувањето на граѓаните и општеството за работните предизвици кои ги носи иднината“, истакна Сараќини.

Министерот за труд и социјална политика Спиро Ристовски во своето излагање подвлече:

„Владата прави сериозни напори да направи баланс помеѓу понудата и побарувачката на трудот. Во изминатите неколку месеци во неколку наврти најавивме корекции на овој систем“.

Токму конференцијата, според Ристовски, покажува колку се сериозни намерите на Владата за регулирање на понудата и побарувачката на трудот.

„Неодамна со министерот за образование и наука и со директорот на Агенцијата за вработување најавивме пилот проект за тестирање на средношколците во периодот пред да се запишат на факултет, односно правилно насочување на основците во процесот на нивно запишување во средно училиште, токму со цел да ги насочиме кон оние гранки кои можат најлесно да бидат употребени на пазарот“, посочи Ристовски. Истото, нагласи, се случува и ќе се случува и понатаму со квотите на факултетите.

„За факултетите, кои врз основа на анализите продуцираат кадар кој не може да најде соодветно работно место, ќе препорачаме намалување на квотите. Тоа ќе го направиме од причина да не се доведеме во ситуација свесно да продуцираме невработени висококвалификувани кадри“, појасни Ристовски на денешната конференција. /крај/со/мф