Економија
МЗШВ: Вложувањата во земјоделството не ги гледа само тој што не ги разбира
Зацртаните политики на континуирана и зголемувачка поддршка на земјоделството и руралниот развој на Владата ги даваат своите резултати, а нив може да не ги види само тој што не го разбира секторот или работите сака да ги прикаже поинаку.
Вака гласи заклучокот од писмената реакција на Министерството за земјоделство, шумарство и водостопанство (МЗШВ) на изјавата на Зоран Шапуриќ од Либерално-демократската партија (ЛДП)
„И покрај огромните стимулации во земјоделството, и постојано зголемување на стимулациите од буџетот, земјоделското производство бележи сè полоши резултати“, изјави во вторникот на прес-конференција Зоран Шапуриќ.
Според министерството за земјоделство, зголемените износи на средства се насочени кон поттикнување на нови инвестиции во земјоделскиот сектор, но и кон покривање на дел од зголемените трошоци на производството како резултат на повисоката цена на нафтата и другите инпути на светските пазари.
„Со ваквата засилена поддршка, се успеа да се запре континуираниот тренд на пад на земјоделското производство во последните 15 години кој беше резултат на отсуство на било какви политики на поддршка на земјоделството во услови кога сите други земји засилено инвестираат големи средства во овој сектор, кога се упропастија големите витални земјоделски комплекси како носители на развојот, и кога паралелно се либерализираше домашното неопреструктуирано и ослабено производство“, потенцираат од Министерството за земјоделство, шумарство и водостопанство.
Поставување на земјоделството како приоритет на владините политики во последниве пет години кај добар дел од подсекторите, особено оние со конкурентна предност, тутунот, виното, овошјето и зеленчукот, овчарството, козарството и друго, обезбедило и зголемување на обемот на производството во однос на изминатиот период на постојан пад, се потцртува во соопштението на МЗШВ.
Додаваат дека зголемениот износ на обемот на производство се рефлектира и врз постојаниот пораст на извозот на земјоделските и прехрамбени производи последните неколку години, а особено изминатата година кога достигнал „историски највисоки 468 милиони евра или двојно повеќе од периодот од пред пет години“.
Одговарајќи на бројките што ги изнесе Шапуриќ, од министерството наведуваат дека земјоделството како економска гранка, со поддршката обезбедена од Владата и во услови на криза обезбедува континуиран раст на своето производство кој во првиот квартал од годинава изнесувал 2,3 отсто а за следниот квартал се очекува раст од 2,5 проценти.
Од МЗШВ најавуваат дека и во следниот период со покривањето на 50 отсто на трошоците на инвестициите и обезбедувањето поволни кредити за земјоделците со ниво на каматна стапка од 3 отсто, Владата ќе продолжи да ги поддржува сите учесници во земјоделскиот сектор. Потсетуваат дека во таа насока покрај субвенционирањето, преземени се и мерките за ослободување од персонален данок или само 2 отсто данок за приходи од 1,3 милиони денари, најмали месечни уплати за пензиско и здравствено осигурување за земјоделците итн./крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Почна пријавувањето за директни плаќања по програмата за финансиска поддршка во земјоделството за 2024 година
Министерството за земјоделство, шумарство и водостопанство заедно со Агенцијата за финансиска поддршка во земјоделството и руралниот развој ги информира земјоделските стопанства, дека во период од 10 мај до 1 јули ќе можат да поднесат барања по Програмата за финансиска поддршка во земјоделството за 2024 година.
Во наведениот период земјоделските стопанства можат да поднесуваат барања за: растително производство по обработлива земјоделска површина со поледелски и градинарски култури, за одржување на постоечки површини со овошни и лозови насади како и површина за производство на сертифициран семенски и саден материјал, сточарско производство за обележани грла говеда, овци и кози, за маторици, презимени пчелни семејства како и за заклани говеда во кланица, како и за органско земјоделско производство.
Земјоделските стопанства своите барања ги поднесуваат во електронскиот систем на АФПЗРР, а доколку имаат потреба од помош или поддршка можат да се обратат во подрачните единици на МЗШВ.
Аплицирањето е преку линкот www.ipardpa.gov.mk – Директни плаќања е-субвенции. Со отварање на овој линк, во полето „Известувања/упатства“ достапни се деталните упатства за поднесување на барањето, Листата на потребни документи како и Програмата и Уредбата за директни плаќања во кои детално се претставени условите и висината на финансиската поддршка.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.
Економија
Се намалува мазутот, цените на дизелот и бензините остануваат непроменети
Регулаторната комисија за енергетика, водни услуги и услуги за управување со комунален отпад донесе oдлука со која се врши намалување на малопродажните цени на нафтените деривати во просек за 0,53 % во однос на одлуката од 7.5.2024 година.
Од 10.5.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 86,00 (денари/литар)
Моторен бензин ЕВРОСУПЕР БС-98 – 88,00 (денари/литар)
Дизел-гориво ЕВРОДИЗЕЛ БС (Д-Е V) – 74,50 (денари/литар)
Масло за горење екстра-лесно 1 (ЕЛ-1) – 74,00 (денари/литар)
Мазут М-1 НС – 44,609 (денари/килограм)
Малопродажната цена на „мазутот М-1 НС“ се намалува 1,223 денар/кг и сега ќе изнесува 44,609 денари/кг.
Малопродажните цени на бензините ЕВРОСУПЕР БС-95 и ЕВРОСУПЕР БС-98, како и на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) не се менуваат.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините 2,939 %, кај дизелот 1,523 %, кај екстра-лесното масло 1,341 % и кај „мазутот“ намалувањето е 3,608 %.
Курсот на денарот во однос на доларот во изминатиот период по кој беа формирани цените со претходната пресметка е понизок 0,015 %.