Премиерот Никола Груевски заедно со владиниот економски тим во понеделник престојува во Москва, како дел од неколкудневната посета на Русија чија цел е презентација на инвестициските можности на Македонија.

Предвидено е Груевски, заедно со делегацијата во која се и Зоран Ставрески, министер за финансии, Ваљон Сарачини, министер за економија и Бил Павлески, министер без ресор задолжен за привлекување на странски инвестиции, да присуствува и да се обрати на бизнис форум во Москва организиран од Трговско-индустриската Комора на Русија.

Премиерот Груевски ќе оствари средба со губернаторот на Московската област, Сергеј Шојгу, а ќе се сретне и со менаџерскиот тим на компанијата „Протек Груп“.

Покрај посетата на Москва, предвидено е владината делегација во следните неколку дена да престојува и во Владимир, Нижњиј Новогород и Санкт Петерсбург.

Република Македонија и Руската Федерација имаат воспоставено дипломатски односи на 31 јануари 1994 година, под уставното име. Политичките односи меѓу двете земји ги карактеризира позитивен развоен тренд во сите подрачја од заемен интерес. Значителна карактеристика на билатералните односи е интензивирањето на размената на посети на високо ниво.

Шестата седница на мешовитата меѓувладина Комисијата за трговско-економска и научно-техничка соработка, која е закажана да се одржи на 2-3 јули во Нижниј Новогород, се очекува да доведе до натамошно интензивирање на соработката во овие областите на економијата, земјоделството, културата, образованието и во други сектори. Во постапка се повеќе инцијативи за склучување на нови билатерални договори и други документи за уредување на односите и соработката во поголем број области од заемен интерес.

Културната соработка се одвива согласно Спогодбата за соработка во областа на образованието, културата и науката. Во рамките на соработката во областа на образованието и науката, приоритет е потпишување на Спогодба за заемно признавање на дипломите и титулите. Во однос на соработката во областа на внатрешните работи постои размена на информации и искуства и соработка меѓу МВР на двете земји во борбата против нелегалната трговија со наркотични средства и за контрола на нивното движење, како и во други области за сузбивање на криминални активности.

Руската Федерација е значаен трговски партнер на Република Македонија. Најзастапени производи во извозот за Русија се: лекови за малопродажба, феросилициум, зелка и сличен зеленчук, свеж или разладен, кајсии, цреши, вишни, праски и сливи, свежи, јаболки, свежи, делови и прибор за каросерии, производи од камен или други минерални материи , компир, освен сладок компир, домати итн.

Најголем дел од увозот на стоки од Русија во 2011 година се однесува на нафта и масла добиени од битуменозни минерали, природен гас во гасовита состојба, плоснато валани производи од железо или нелегиран челик итн.

Во трговската размена со земјоделско прехранбени производи реализирано е зголемување на позитивниот трговски биланс во 2011 година, за повеќе од три пати (остварени 9,3 милиони евра во 2011 година спрема 2,8 милиони евра во 2010 година, извозот бележи пораст од 120,1%, а увозот намалување од 81,6%).

Според податоците од НБРМ, од вкупниот кумулативен прилив на странските директни инвестиции, околу 10 милиони евра се од Руската Федерација. Во 2011 година вкупниот прилив на инвестициите од оваа земја, изнесува 5,19 милиони евра, што е значително поголем од целокупниот прилив до 2010 година. Во 2011 година во ТИРЗ – Скопје 1, рускиот фармацевтски холдинг „Протект Груп“ ја отпочна градбата на фабриката „Продис ДОО“ инвестиција во вредност од 5 милиони евра. Фабриката ќе произведува хомеопатски производи, чаеви, минерали, органски и неоргански житарки.

Во однос на енергетиката, соработката со Руската Федерација во досегашниот период се одвиваше преку следните активности: Испорака на природен гас со руската компанија ОАО „Гаспром“, потпишан е Меморандум помеѓу Владата на Република Македонија и руската компанија „Лукоил“ за изградба на бензински пумпи во Републиката, се пристапи кон реализација на изградбата на гасна електрана-топлана ТЕ-ТО Скопје, од страна на АД „Топлификација“ – Скопје и руската компанија „Синтезис“, кои за таа цел формираа акционерско друштво.

Предлог на нови проекти за соработка во енергетиката е изградба на дел од Националниот гасоводен систем на Македонија со средства обезбедени со Спогодбата меѓу Владата на Република Македонија и Владата на Руската Федерација. Со средства во висина од 60.560.242.44 US$ обезбедени со Спогодбата и средства како учество на Македонија во висина од 15.140.060 US$, Владата утврди да се финансира изградбата на дел од приоритетниот магистрален правец Клечовце – Штип – Хамзали – Стојаково – граница со Република Грција, вклучувајќи и крак до Неготино- ТЕЦ Неготино, во вкупна должина од 210 километри.

Владата формира експертски тим за водење на преговори на техничко ниво со компании предложени од Руската Федерација. Двете страни во моментов разменуваат соодветни технички, правни и останати елементи, важни за трасата, предвидената цена на нејзина реализација и рокот на изведба.

Соработката во областа на туризмот да се одвива според Спогодбата за туристичка соработка помеѓу двете земји. Туристичката соработка помеѓу агенциите и угостителските капацитети од двете земји, се интензивира во 2009 година преку вклучување на туристичката понуда на Македонија во програмите на руски туроператори, како и продажба на аранжмани за посета на Русија во програмите на туристички агенции од земјава. Во однос на финансиите, склучен е Договор за одбегнување на двојното оданочување и заштита на фискална евазија по однос на данокот од доход и данокот на капитал, и Договор за поттикнување и заемна заштита на инвестициите.

Постои и Спогодба за соработка и взаемна помош во царинските работи. /крај/со/ач