Потрошувачката на финална енергија во Република Македонија во наредниот период од пет години се очекува да расте за околу 2,3 до 3 отсто просечно на годишно ниво.

Ова го изјави министерот за економија Ваљон Сараќини на стручната расправа по предлог текстот на Програмата за реализација на Стратегијата за развој на енергетиката на Република Македонија за периодот 2012-2016 година, што Министерството за економија во понеделникот ја организираше во Македонската академија на науките и уметностите.Стратегијата за развој на енергетиката на Република Македонија до 2030 година Владата на Република Македонија ја донесе во април 2010 година. “Во периодот од нејзиното донесување истата се имплементира од страна на надлежните органи и чинители, меѓутоа со оваа програма за нејзина реализација поконкретно се уредуваат мерките, условите, начинот и динамиката на реализација на Стратегијата, како и обврските на државните органи, органите на единиците на локалната самоуправа и вршителите на енергетските дејности што имаат обврска за обезбедување на јавна услуга, информираше министерот.Програмата за реализација на стратегијата во рамките на ГЕФ Проектот за одржлива енергија ја изработи Македонската академија на науките и уметностите која со тим од внатрешни и надворешни експерти изработи предлог текст на Програмата за реализација. Со цел да се задоволат потребите од енергија, се превземаат интензивни активности за изградба на производствени капацитети, меѓутоа се посветува и значително влијание за интерконективно енергетско поврзување со соседните земји со цел да се обезбеди пристап и до повеќе различни извори на енергија, односно да се обезбеди диверсификација на изворите.“Потрошувачите на енергија се соочуваат со сложена енергетска состојба, каде што цените на различни видови на енергија и енергенси генерално имаат нагорен тренд“ посочи министерот.Сараќини оцени дека ваквата состојба е резултат на глобалните трендови поврзани со структурните промени во снабдувањето со енергија и зголемените потреби од модернизација на постојната инфраструктура и инвестирање во нови технологии и енергетски извори.Според академиците кои беа вклучени во изготвувањето на Програмата, Македонија мора да се насочи кон редовно обезбедување јаглен за термоцентралите и кон обезбедувањето дополнителен извор на снабдување со природен гас. Користењето на обновливите извори на енергија и отворањето на рудниците исто така треба да се приоритет. Професорот Константин Димитров од Машинскиот факултет смета дека претстојните пет години во кои, согласно проекцијата, треба да се вложат 1,2 милијарди евра, ќе бидат само подготовка за новите енергетски капацитети. Методолошки планот е добро подготвен, но останува да се види дали ќе успееме да ги обезбедиме потребните средства, смета Димитров. “Ако имаме доволно пари, ќе вложиме веднаш во сите објекти и мерки предвидени со Програмата. Не очекуваат жешки и тешки години, но во енергетиката мора да се вложува. Добро би било Владата да ги заинтересира приватните инвеститори за концесии преку јавно приватно партнерство“, нагласи Димитров. /крај/со/ап/