Инвестиции од околу два милиони евра за два проекта во насока на поддршка на десетици села, и руралниот развој, најави во четвртокот македонската влада.

Како што информираше владиниот портпарол Александар Ѓорѓиев, владата на последната седница одлучила од локалните самоуправи да го преземе финансирањето на проекти во изградба на селски патишта, селски мостови, пристапни патишта до нивите и пристап до земјоделско земјиште, како и за урбанизација на централните делови на селата.Одлуката е донесена, откако општините ја известиле Владата дека заради европската должничка криза и нејзиното влијание врз Македонија имаат притисок и потешкотии да ги исполнат договорите, да ги исплатат средствата, со што се доведени во опасност проектите.„За таа цел се измени програмата за рурален развој и се определија 100 милиони денари кои Владата, наместо на општините ќе ги исплати на изведувачите на проектите. Значи, на општините ќе остане да го исплатат само својот дел од инвестицијата во висина не повеќе од 30% од инвестицијата, а некаде и во помал процент. Тие немаат обврска да го исплатат инвеститорот па да бараат рефундација, затоа што исплатата ќе ја направи Владата, во висина од најмалку 70% а некаде и повеќе“, информираше Ѓорѓиев.Тој додаде дека на овој начин ќе се обезбеди вкупно 40 инвестициони проекти да бидат реализирани без застој.Исто така, во насока на поддршка на инвестициите во селата, регионите и подрачјата со специфични развојни потреби, Владата одлучи да кофинансира  проекти за која цел на општините ќе им бидат префрлени дополнителни околу 20 милиони денари.Овие средства ќе бидат наменети за кофинансирање на проекти колектори, резервоари, краци од водоводна и канализациска мрежа, плански проекти итн…распоредени во 30-ина различни општини по доставени проекти од општините, појасни Ѓорѓиев.Двата проекти значат инвестиции од околу два милиони евра во насока на поддршка на десетици села, и руралниот развој, наменети за проекти од непосреден интерес за граѓаните во овие места. Со овие инвестиции се дава и поддршка на градежништвото и вработувањата, истакна владиниот портпарол.Покрај ова, Владата одлучи во следниот период од три месеци да бидат посетени околу 250 села. Селата ќе бидат посетени од страна на 4 стручни тимови од Министерството за земјоделство, шумарство и водостопанство и АПРЗ кои ќе бидат составени од стручни профили од сите области на земјоделството. Во секое од селата стручните тимови ќе имаат советувања со земјоделците при што ќе се разговара за предизвиците и нивното надминување. Еднаш месечно Владата ќе биде информирана за најголемите предизвици, и ќе бидат предлагани мерки за нивно решавање. Посебен акцент ќе биде ставен на едукација на земјоделците за процедурите за легализација на нивната механизација и за легализација на нивните фарми, процедури кои треба да завршат до август следната година. /крај/со/ап/