Имплементација на проекти од областа на енергетската ефикасност и обновливи извори на енергија може да отворат работни места, порача министерот за економија, Ваљон Сараќини, на Конференцијата на тема „Финансирање на енергетска ефикасност и обновливи извори на енергија“.

„Развојот и имплементацијата на проектите во областа на енергетската ефикасност и обновливите извори на енергија имаат капацитет да создадат нови работни места, да го подобрат квалитетот на животот на граѓаните, да го намалат увозот на енергија и да го забрзаат процесот на пристапување во ЕУ. Освен тоа, унапредувањето на енергетската ефикасност, која е економично изводлива под тековните околности, како и поголемото искористување на обновливите извори на енергија, придонесуваат кон заштита на животната средина“ рече Сараќини притоа потсетувајќи дека Владата во септември 2010 година ги донесе Стратегијата за искористување на обновливите извори на енергија и Стратегијата за унапредување на енергетската ефикасност во Република Македонија, и двете за периодот до 2020 година“, рече министерот Сараќини.

Како што објасни министерот за економија, целта на Стратегија за унапредување на енергетската ефикасност е да го идентификува потенцијалот за рационална потрошувачка на енергијата, за да се постигнат енергетски заштеди во резиденцијалниот, комерцијалниот и секторот на јавни услуги, како и индустрискиот и транспортниот сектор.

„Министерството за економија во досегашниот период реализираше неколку проектни активности во областа на енергетската ефикасност и обновливите извори на енергија, и тоа Реализацијата на ГЕФ Проектот за одржлива енергија со кој се реконструирани 18 училишни објекти во шест општини, а петта година по ред ќе објави јавен повик за субвенционирање за инсталирани сончеви колектори бидејќи досега субвенционирани се околу 2.000 домаќинства“, информираше министерот Сараќини.

Стремежот на град Скопје, како што истакна градоначалникот, е во иднина да има повеќе енергетски ефикасни проекти, кои ќе придонесат за подобар и одржлив живот на граѓаните, но и подобра животна средина. Трајановски нагласи дека за Скопје се преземаат мерки за енергетска ефикасност, потсетувајќи дека Град Скопје отвори Инфоцентар за енергетска ефикасност, во кој граѓаните може да ги добијат сите почетни информации.

„Минатата година Советот усвои Акциски план за одржлив развој на енергијата до 2020 година, преземани се мерки за енергетска ефикасност во повеќе основни училишта, во центарот на градот поставен е соларен полнач за мобилни телефони“, истакна Трајановски.

Конференцијата на тема „Финансирање на енергетска ефикасност и обновливи извори на енергија“ се одржа во рамки на манифестацијата „Недела на енергетика 2012“, а е под покровителство на Министерството за економија, Град Скопје и ЕВН, во организација на Центарот за енергетска ефикасност на Македонија -МАЦЕФ и меѓународниот проект „ЕУБилд Енергетска ефикасност“, Канцеларијата на ГИЗ во Македонија и МОМЕЕ – Македонска општинска мрежа за енергетска ефикасност./крај/со/бб