Со свечена заклетва за совесно работење, во саботата министерот за економија Ваљон Сараќини додели 68 лиценци за започнување со вршење на проценителска дејност на идните проценителите.

Идните проценители завршија почетна обука и го положија стручниот испит за четири области за кои e надлежно Министерството за економија: Трговско друштво, јавно претпријатие и други правни лица, Машини и опрема, Подвижни предмети и Индустриска сопственост.“Министерството за економија прво започна со активностите за проценувачи во четирите споменати области. Имавме дури 420 кандидати на спроведената обука и над 305 на испитите, кои се состоеја од писмен тест, практичен пример и усмен испит. Значајно е што со донесениот Закон за процена за првпат се регулира областа на процена во и за првпат се определува процената како професија, преку воведување на посебни услови, кои во досегашната пракса не беа предвидени” изјави Сараќини. Тој истакна дека со доделувањето на лиценците се финализира цел досегашен процес, а во меѓувреме, требаше да се исполни уште еден услов, покрај положениот испит, а тоа е регистрирање на кандидатите како трговец – поединец или друштво за процена. Со ова се создаде основата за профилирање на посебна професија, која преку своето стручно здружение ќе се грижи за контиунирана обука на проценувачите, а тоа е Комората на проценувачи.“Досега не постоеше стручно здружение кое ќе се грижеше за обука, контрола на квалитетот на извршените процени и професионалните стандарди на проценувачите, што беше причина за дијаметрално различни пристапи и процени. Со воведување на Комората, како здружение на проценувачи, ќе се овозможи континуирана обука, дисциплина во вршење на дејноста и одговорност при вршење на конкретна процена” објасни министерот.Во насока на професионализација на професијата проценител од особена важност е и законски воведената можност за ревизија на извршена процена, во случај странката – нарачател на процената да не е задоволна со извршената процена. За таа цел предвидено е формирање на посебна комисија која ќе има задача да оцени дали процената е изработена по усвоените методологии и меѓународни стандарди за процена. Доколку оценката на комисијата биде негативна, односно се оцени дека процената  не е во согласност со наведените стандарди, следува соодветна санкција за проценителот. Уште еден екслузивитет е овозможен со законот, а тоа е осигурување од професионална одговорност во вршење на дејноста. Ова би значело дека ако проценувачот предизвика штета на странката, таа ќе може да се наплати од неговото осигурување. /крај/со/ап/