На денешната седница Владата даде согласност на предлогот на Меѓународниот монетарен фонд (ММФ) нејзините членки да учествуваат во отпишување на долгот на Сомалија по надминувањето на долготрајната граѓанска војна и политичката криза и нејзините напори повторно да ја изгради економијата и покрај тешките околности со кои се соочува.

Со согласноста да учествува во овој процес, Владата заедно со донаторската заедница и меѓународните институции ги отстапува своите средства во покривањето на долгот на Сомалија во висина од 138.000 долари за да испрати позитивен сигнал кон меѓународната заедница дека нашата земја има волја и е способна да се справи со меѓународните обврски, како и со обврските што се наметнуваат со членството во меѓународните финансиски институции.

На денешната седница Владата донесе решение за формирање централна комисија за следење на спроведувањето и имплементирањето на еколошката мерка за субвенционирање на граѓаните со високоефикасни инвертер клима-уреди за потребите на домаќинствата во општините Битола, Кичево, Тетово и во Скопје, а кои користат енергетски неефикасни уреди за греење во своите домаќинства, кои влијаат на зголемување на концентрација на ПМ 10 и ПМ 2,5.

Владата ги задолжи Министерството за животна средина и просторно планирање, канцеларијата на заменик-претседателката задолжена за економски прашања, Министерството за економија, Министерството за информатичко општество и администрација, кои се во функција на исполнување на оваа мерка, да именуваат по еден член и негов заменик и тоа го препорача и до АД „Електрани на Северна Македонија“.

Во комисијата рамноправни членови се и по еден претставник од граѓанските организации „Движење за околината Молика – ДОМ Битола“, еколошкото здружение „Движење екогерила Тетово“ и од Македонската платформа против сиромаштија – МППС и сите тие се задолжени за постојана контрола и мониторинг на целиот процес на имплементација на оваа мерка.

Министерството за финансии утре ќе врати 166,4 милиони евра по основ доспеани долгови, и тоа 155 милиони евра за втората рата на ПБГ-заемот земен 2013 година и 700 милиони денари по основ издадени државни хартии од вредност.

Од Министерството соопштија дека годинaва треба да се отплатат стари долгови во износ од 702,7 милиони евра, од кои кон надвор, односно надворешен долг – 437, 8 милиони евра и домашен долг од 264,9 милиони евра.

„Покрај ПБГ-заемот, во декември треба да се отплати останатиот дел од еврообврзницата од 2015 година во износ од 180 милиони евра со каматна стапка од 4,9%. Вкупната вредност на еврообврзницата издадена во 2015 година е 270 милиони евра, од кои во 2018 година со издавањето на еврообврзницата со најниска камата досега од 2,75%, беа рефинансирани 92 милиони евра од еврообврзницата од 2015 или за првпат беше предвреме отплатена која било од еврообврзниците и воедно намален товарот за отплата во 2020 година“, соопштија од МФ.

Од таму велат дека јавниот долг е стабилизиран. „Ако во 2016 година тој изнесувал 48,8%, согласно последната состојба, јавниот долг изнесува 47,7% и тоа со вклучен негарантиран долг, кој порано не бил вкалкулиран“, велат од Министерството.