Економија
Инвестиција од 400.000 евра и 10 вработувања во замена за македонски пасош и државјанство
Секој странец што во Македонија ќе инвестира 400.000 евра во капацитет (освен во угостителство и трговија) и во него ќе вработи најмалку 10 лица веднаш ќе може да добие македонско државјанство и пасош.
Ова е предвидено со една од двете мерки што Владата ги усвои со цел реално олеснување на процедурите и стимулација на странските државјани при одлуката за инвестиции на средства во Македонија.
Со другата мерка, пак се предвидува измена на Законот за странци, во насока на овозможување на странските државјани кои се жители на земјите на ЕУ и ОЕЦД, а имаат купено недвижност (куќа или стан) во Македонија во вредност над 40.000 евра, да добијат поголем временски интервал за престој во Македонија.
Со претходно усвоени закони на странските државјани им се дозволи да купуваат недвижности во Македонија, но оваа појава не е доволно развиена и заживеана. Бугарија пред влезот во ЕУ имаше голем раст во оваа дејност, а сега Турција, Хрватска, Црна Гора.
„Анализите покажаа дека сериозен ограничувачки фактор е законски дозволениот интервал за престој за странските државјани“, изјави Александар Ѓорѓиев, портпарол на Владата.
Досега законот налагаше странски државјанин кој ќе купи куќа или стан во Македонија да не може постојано да престојува во Македонија, туку можеше да добие најмногу туристички престој во траење од најмногу 3 месеци, период по кој тој требаше да ја напушти државата, и потоа доколку сака повторно да се врати во Македонија да поминат уште три месеци, за да може повторно да престојува во нашата земја уште најмногу три месеци.
„Ова се појави како проблем, односно пречка странските државјани да се анимираат и носат одлуки да купуваат недвижност во нашата земја, односно тие се помалку заинтересирани да купат недвижност во која може да престојуваат најмногу шест месеци во текот на една година, и тоа на три месеци да треба да излегуваат и влегуваат во Македонија“, рече Ѓорѓиев.
„Со оваа можност ќе се зголеми атрактивноста за купување на имот во Македонија од страна на странски државјани. Граѓаните на скандинавските земји покажуваат интерес за инвестиции во оваа сфера, чии резиденти практикуваат зимскиот период во нивните земји да го искористат и подолг период да живеат во јужна Европа во нивни претходно купени имоти“, рече владиниот портпарол.
„Ние сме заинтересирани што поголем број странци да купат имот во Македонија, затоа што на тој начин прво, нашите граѓани ќе добијат приходи од продажбата на имот кој им е за продажба, ќе се зголеми цената на становите за странци, а со нивниот престој, имајќи ја предвид нивната куповна моќ, ќе имаат корист и други сектори, угостителство, трговија, туризам итн“, изјави Ѓорѓиев.
Преку ДКП-ата и промоторите, Владата ќе ја промовира оваа поволност во странски фокус земји и до пазарите на недвижности во западна и северна Европа, Русија, затоа што, како што велат од владата, претходните анализи покажаа дека има интерес за купување на куќа или стан, и тоа особено во туристичките места, Охрид, Преспа, Маврово, Крушево и слично. /крај/мф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Меморандум за соработка во полето на гасниот сектор помеѓу Македонија и Србија: ќе се испитува можноста за развој на нова директна врска меѓу двата системи за гас
Министерство за енергетика, рударство и минерални суровини на Република Северна Македонија склучи Меморандум за соработка во полето на гасниот сектор со Министерството за рударство и енергетика на Република Србија, во просториите на Владата.
Гасниот интерконектор Северна Македонија – Србија е означен како Водечки проект за енергетиски мрежи во рамки на ЕУСАИР (EU Strategy for the Adriatic and Ionian Region) со што ќе се обезбеди сигурност во снабдувањето за регионот на Југоисточна Европа и ЕУ по пат на имплементација на проектите од Јужниот гасен коридор на ЕУ и Трансбалканскиот гасен прстен, преку диверзификација на рутите и изворите за снабдување со гас.
Со меморандумот се предвидува испитување на можноста за развој на нова директна врска меѓу двата системи за гас. Во рок од 9 месеци ќе се изработи Физибилити студија и Студија за оценка на влијание на проектот врз животната и социјалната средина за новата гасна интерконекција помеѓу државите.
Врз основа на резултатите од техничките и пазарни истражување и земајќи ја во предвид постојната инфраструктура за пренос на гас кај двете страни, Страните ќе ги анализираат и ќе превземат соодветни одлуки за реализација на проектот и координирање на понатамошни дејствија.
Економија
Зголемување на цената на горивата
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 1,81% во однос на одлуката од 30.9.2024 година.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 1,00 ден/лит.
Малопродажната цена на Екстра лесното масло за домаќинство на (ЕЛ-1) се зголемува за 1,50 ден/лит.
Малопродажната цена на Мазутот М-1 НС се зголемува за 1,108 ден/кг и сега ќе изнесува 42,780 ден/кг.
Економија
Претседателката на ММФ: Живееме во свет на бавен економски раст и високи долгови
Меѓународниот монетарен фонд може да им помогне на земјите да се приспособат на бавниот економски раст и високиот долг бидејќи ова е светот во кој моментно живееме, изјави денеска претседателката на Меѓународниот монетарен фонд (ММФ), Кристалина Георгиева, на конференцијата за одржливост во Хамбург.
Според неа, тоа значи дека реформите што придонесуваат за раст, подобрување на инвестициската клима и напредок на пазарот на трудот треба безмилосно да се одложат.
„Меѓународниот монетарен фонд може да им помогне на своите членки да ги спроведат неопходните реформи, со што овие земји ќе имаат потенцијал да го зголемат растот на БДП во текот на четири години за осум отсто“, додаде Георгиева, пренесува „Танјуг“.
Конференцијата беше отворена со говорот на германскиот канцелар, Олаф Шолц.