Економија
Министерот за економија Сараќини додели награда за СПА дестинација
Доделување на Спа награди за Македонија, како дел од балканските Спа награди во саботата се одржа во Скопје во организација на Иницијативниот комитет со кој претседава д-р Жан Митрев и меѓународната организација “Спа номинации“, а под покровителство на Министерство за економија.
Целта на манифестацијата е започнување на кампањата за развој на Спа туризмот во Македонија и промоција на Македонија како значајна Спа дестинација на Балканот.
На свеченоста се обрати министерот за економија Ваљон Сараќини, кој ја додели и главната награда во категоријата „Спа дестинација на Македонија“.
Еден од значајните туристички производи кои може Македонија да ги понуди на меѓународниот пазар е развојот на бањскиот туризам, во чии рамки посебен акцент се дава на развојот на СПА и рехабилитацискиот туризам. Развивајќи го овој сегмент од туристичката индустрија, посебен акцент и внимание се посветува на одржливиот туристички развој, кој освен задоволувањето на потребите на туристите и на регионите кои се домаќини на тие туристи, истовремено ги чува и зголемува потенцијалите за економски раст и развој и за во иднина.
„Според некои проценки, Република Македонија има 64 извори на геотермални и минерални води со различна температура и богат минерален состав од сулфур, фосфор, арсен, јод и друго, познати во регионот, но и пошироко. Наспроти тоа, има само 8 бањски центри, и тоа, Банско, Кежовица, Негорци, Бања Кочани, Катланово, Кумановска бања и Дебарски бањи – Цапа, но радува фактот што и онаму каде нема класичен бањски извор, никнуваат спа и велнес центри, со понуда на холистички и интегративни програми за лечење и превенција. Ме радува што дел влегоа и во листата на номинирани во неколкуте категории на првите македонски спа награди“, информираше Сараќини.
Секако, неопходни се и нови домашни и странски инвестиции, со кои овој сегмент од туризмот ќе се развие на повисоко ниво, особено имајќи ја предвид традицијата на развој на спа и велнес туризмот во регионот, како што се Србија, Бугарија, Унгарија.
„Затоа, како Влада, покрај инвестициските олеснувања и субвенциите во туризмот, кои придонесоа минатата година и годинава да достигнеме еден од најголемите порасти во туризмот за изминативе 10 години, работиме и на промовирање на овој спа туризмот, но и олеснување на постапките за давање на концесија на минералните и геотермалните води и нивно користење за овој вид на туризам“, истакна Сараќини, додавајќи дека наградите ќе бидат мотив повеќе за создавање на нови велнес центри, кои ќе придонесат за регионален туристички развој и збогатување на понудата на постојните спа центри, со цел покрај третманите на домашните туристи да се привлечат и туристите од странство и тоа преку континуирана соработка на Владата со туристичкиот и бизнис секторот, како двигател на економијата, со цел успешно заокружување на постојните и започнување на нови проекти само во овој сегмент.
Интернационалната организација „Спа Номинации“ поседува патентирана марка за организирање Спа награди за Балканот. /крај/мф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Меморандум за соработка во полето на гасниот сектор помеѓу Македонија и Србија: ќе се испитува можноста за развој на нова директна врска меѓу двата системи за гас
Министерство за енергетика, рударство и минерални суровини на Република Северна Македонија склучи Меморандум за соработка во полето на гасниот сектор со Министерството за рударство и енергетика на Република Србија, во просториите на Владата.
Гасниот интерконектор Северна Македонија – Србија е означен како Водечки проект за енергетиски мрежи во рамки на ЕУСАИР (EU Strategy for the Adriatic and Ionian Region) со што ќе се обезбеди сигурност во снабдувањето за регионот на Југоисточна Европа и ЕУ по пат на имплементација на проектите од Јужниот гасен коридор на ЕУ и Трансбалканскиот гасен прстен, преку диверзификација на рутите и изворите за снабдување со гас.
Со меморандумот се предвидува испитување на можноста за развој на нова директна врска меѓу двата системи за гас. Во рок од 9 месеци ќе се изработи Физибилити студија и Студија за оценка на влијание на проектот врз животната и социјалната средина за новата гасна интерконекција помеѓу државите.
Врз основа на резултатите од техничките и пазарни истражување и земајќи ја во предвид постојната инфраструктура за пренос на гас кај двете страни, Страните ќе ги анализираат и ќе превземат соодветни одлуки за реализација на проектот и координирање на понатамошни дејствија.
Економија
Зголемување на цената на горивата
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 1,81% во однос на одлуката од 30.9.2024 година.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 1,00 ден/лит.
Малопродажната цена на Екстра лесното масло за домаќинство на (ЕЛ-1) се зголемува за 1,50 ден/лит.
Малопродажната цена на Мазутот М-1 НС се зголемува за 1,108 ден/кг и сега ќе изнесува 42,780 ден/кг.
Економија
Претседателката на ММФ: Живееме во свет на бавен економски раст и високи долгови
Меѓународниот монетарен фонд може да им помогне на земјите да се приспособат на бавниот економски раст и високиот долг бидејќи ова е светот во кој моментно живееме, изјави денеска претседателката на Меѓународниот монетарен фонд (ММФ), Кристалина Георгиева, на конференцијата за одржливост во Хамбург.
Според неа, тоа значи дека реформите што придонесуваат за раст, подобрување на инвестициската клима и напредок на пазарот на трудот треба безмилосно да се одложат.
„Меѓународниот монетарен фонд може да им помогне на своите членки да ги спроведат неопходните реформи, со што овие земји ќе имаат потенцијал да го зголемат растот на БДП во текот на четири години за осум отсто“, додаде Георгиева, пренесува „Танјуг“.
Конференцијата беше отворена со говорот на германскиот канцелар, Олаф Шолц.