Народната банка на Македонија (НБМ) ја намали максималната каматна стапка на благајничките записи за 0,25 процентни поени, на 3,5 отсто, што се очекува да доведе до намалување на цената на кредитите.

Покрај ова, НБМ ја намали и каматната стапка на расположливите депозити на 7 дена, од 2% на 1,75%.„Се очекува дека понатамошното олабавување на монетарната политика ќе придонесе за олеснување на кредитните услови и поголема економска активност“, се вели во соопштението што во средата го објави Централната банка. Ваквата одлука НБМ ја донесе откако констатираше намалени инфлациски ризици, поволни движења кај девизните резерви, бавно закрепнување на реалниот сектор и забавување на активноста на кредитниот пазар.„Движењата во македонската економија, гледано од аспект на монетарната политика, и натаму се релативно поволни. Имено, продолжи трендот на релативно поволни движења кај инфлацијата и девизните резерви“, се вели во соопштението. Податоците за инфлацијата за декември покажуваат понатамошна стабилизација на ценовното ниво. Просечната инфлација за целата година е во рамки на проекциите, додека годишниот раст на цените во декември е понизок, во споредба со претходните очекувања. Ваквата динамика на домашните цени упатува на постепено смирување на инфлациските притисоци и намалување на ризиците околу идната инфлација. Имајќи ги предвид сегашните претпоставки, последните оцени покажуваат дека инфлацијата во 2013 година би била пониска од претходно очекуваната, се вели во соопштението. Воедно се истакнува дека поволниот девизен пазар во декември овозможи повисок раст на девизните резерви, во споредба со очекувањата, покажувајќи подобра појдовна позиција на девизните резерви на крајот на годината во однос на очекувањата. Се очекува дека поволните движења кај девизните резерви ќе продолжат и во текот на 2013 година, при што тие и понатаму ќе се одржуваат околу адекватното ниво. И покрај подобрувањето на состојбата во третото тримесечје, активноста во реалниот сектор е релативно слаба и укажува на отсуство на притисоци врз инфлацијата и девизните резерви преку побарувачката. Кредитната поддршка на економијата преку банкарски кредити и понатаму е присутна, но сепак банките покажуваат воздржаност за поголемо кредитирање. Најновите податоци за кредитниот пазар покажуваат понатамошно забавување на кредитниот раст.Евентуалното влошување на глобалниот економски амбиент, како и  неизвесноста околу преносните ефекти врз инфлацијата во наредниот период сè уште се главните ризици за макроекономските движења во претстојниот период, констатира НБМ и најавува дека ќе продолжи внимателно да ги следи идните макроекономски движења. /крај/со/ап/