Реализацијата на тековните проекти на македонската влада поддржани од ЕБОР и можностите за продлабочување на соработката и поддршка на стратешки проекти биле тема на средбата што ја имаше македонскиот премиер Никола Груевски со претседател на Европската банка за обнова и развој (ЕБОР), Сума Чакрабарти.

Како што соопшти владината прес служба, премиерот Груевски искажал благодарност и задоволство за досегашната плодна соработка и поддршката која доаѓа од страна на Европската банка за обнова и развој, а која се одвива во повеќе полиња како што се проектите од инфраструктурен карактер, изградбата на патишта, реконструкција на железницата како и повеќе проекти и инвестиции од сферата на енергетиката.Груевски истакнал дека проектите кои се реализираат со поддршка на ЕБОР обезбедуваат конкретни вработувања, унапредување на економијата, нови финансиски средства и раст во градежништвото, што резултира со подобрување на компетитивноста на економската понуда. Соговорниците се согласиле дека таа соработка ќе продолжи преку активна поддршка на нови конкретни проекти како што е отпочнувањето на проектот за изградба на пругата од делницата Куманово – Бељаковце што треба да не поврзе со Бугарија, потоа изградбата на делницата Демир Капија – Смоквица од Коридорот 10 и воведувањето на електронски систем на наплата на патарините на патиштата, проектот за обновување на возниот парк во Македонски железници со цел да се обезбеди поефикасен и поекономичен транспорт на стока и патници, како и преку поддршка на процесот на гасификација на земјата, изградбата на хидроелектричната централа Бошков Мост и повеќе други клучни проекти од енергетиката.Премиерот Груевски и Претседателот на ЕБОР Чакрабарти заеднички се согласија дека во последниве години ЕБОР има обезбедено значителна поддршка за македонската економија, финансирајќи повеќе проекти за одржлива енергија како енергетска ефикасност и обновливи извори на енергија, во сферата на транспортот преку изградба и реконструкција на патиштата и железницата, директна или индиректна поддршка преку партнерските банки инвестиции во земјоделието, агробизнисот, поддршка на мали и средни претпријатија.Претседателот на ЕБОР Сума Чакрабарти, изразувајќи високи оценки за политиките кои ги реализира македонската Влада посочи дека ЕБОР продолжува да биде цврст и стратешки партнер на Владата на Република Македонија, и изрази убеденост дека во идниот период со заедничката реализација на проекти ќе се оствари економски развој на државата.Чакрабарти истакна и дека Банката има намера да остане целосно ангажирана подобрувајќи ја конкурентноста и олеснувањето на приватните инвестиции во корпоративниот и општинскиот сектор, да се промовира енергетската ефикасност и инвестиции во обновливите извори на енергија и унапредување на регионалната интеграција преку инвестиции во патниот, железнички и енергетскиот сектор. /крај/со/ап/