Грција и Кипар објавија во петокот дека постигнале договор според кој грчките банки ќе ги откупат локалните филијали на паднатите кипарски банки, кои така би ги добиле потребните средства што беше еден од условите на еврозоната за пакетот помош за оваа медитеранска островска земја да го избегне банкротот.

Најмалку три грчки банки, од кои сигурни се „Alpha Bank” и „Piraeus” се подготвени да ги купат филијалите на три кипарски кредитора во Грција, а фондот за поддршка на банките ќе се состане подоцна о петок за да го одобри купецот, пренесува Reuters повикувајќи се на неименувани функционери.

„Кипарските филијали в Грција ќе бидат продадени на една грчка банка. Фондот ќе ги оцени доставените понуди на грчките банки”, изјавил за агенцијата висок функционер од Грчкиот фонд за финансиска за стабилност кој барал да остане анонимен.

Со тоа грчките банки би се заштитиле од кипарската криза, а воедно и да се намали пренапумпаниот кипарски банкарски сектор. Таквите трансакции беа и еден од условите на еврозоната за финансиска помош на Кипар, кој кипарскиот парламент неодамна го одби бидејќи го опфаќаше и непопуларното оданочување на банкарските штедни влогови.

Кипар во петокот објави дека договорот вклучува „најповолни услови,имајќи ги предвид актуелните околности”.

Трите водечки кипарски банки, „Bank of Cyprus”, „Cyprus Popular Bank” – CPB (поранешната „Laiki” банка) и „Hellenic Bank” имаат според обемот мали, но значајни работи во Грција. Нивните грчки филијали се затворени веќе една седмица откако кипарските власти донесоа таква одлука за да ги избегнат бранот повлекување на депозитите од страна на граѓаните и компаниите. Кипарските филијали заедно држат осум отсто од грчките банкарски депозити, 10 отсто од кредитите и имаат околу 300 ограноци.

Инаку министрите за финансии на земјите членки на еврозоната ги исклучија филијалите на кипарските банки во Грција од еднократниот данок на кипарските банкарски влогови под услов нив да ги преземат грчките банки, коишто исто така се докапитализирани со пакетот помош од европската унија и Меѓународниот монетарен фонд.

Вкупната актива на „Bank of Cyprus” и CPB само во Грција изнесува околу 22 милијарди евра, што претставува 1,2 пати повеќе од вредноста на кипарското стопанство.

Доколку нивните грчки филијали бидат продадени, вредноста на активите на кипaрските банки повеќе нема да биде осум пaти поголема од кипaрскиот бруто домашен производ (БДП) туку „само” 6,8 пати, напомнуваат банкарите и економските аналитичари, што според меѓународните кредитори преставува чекор во вистинската насока./крај/мф/сн