Економија
Сараќини: Придобивките од евроатланската интеграција на Македонија се двонасочни
Интенција на македонската економска и трговска политика е создавање хоризонтална рамка, која треба да ги поврзе постојаното подобрување на деловната клима, привлекувањето на инвестиции и зголемувањето иновации, преку програми и мерки насочени кон развој на мали и средни претпријатија; имплементација на индустриска политика; развој на кластери, зголемување на извозот, рече во средата министерот за економија Ваљон Сараќини на конференцијата на евроинтеграциите
„За Владата на Република Македонија, еден од клучните стратешки приоритети за 2013 година, покрај интеграцијата во ЕУ и НАТО, останува зголемување на економскиот раст и конкурентноста на трајна основа, повисока стапка на вработеност, пораст на животниот стандард и квалитетот на живеење”, рече министерот за економија Ваљон Сараќини.
Интегрирањето на Република Македонија во светската економија е неопходно за економскиот просперитет на земјата, каде влијанието на евроатланските интеграции врз економијата на Република Македонија е повеќеслојно , нагласи министерот .
Силната регионална насоченост и зависност на економијата на Македонија од земјите-членки на ЕУ и НАТО, рече Сараќини, упатува на висока условеност на трансакциските трошоци на македонските претпријатија од тие што важат во ЕУ, а тоа значи дека евроатлантската интеграција на Република Македонија ќе води кон отстранување на најголемиот дел од постојните пречки и кон приспособување на уште поголем број домашни административни и деловни процедури кон тие што важат во ЕУ.
„Интензивирањето на трговските односи на Република Македонија со земјите-членки на ЕУ и НАТО ќе придонесе за зголемување на таканаречената ‘економија на обем’, со директно влијание врз зголемувањето на обемот на домашното производство, извозот и вработеноста во земјата”, рече Сараќини.
Притоа македонскиот министер за економија потенцираше дека во ток правец ќе дејствуваат субвенциите кои редовно се составен дел на Буџетот на Европската унија, а кои се наменети за поттикнување на економијата на новопримените членки и за постепено израмнување на нивниот степен на економски развој со просечниот во земјите – членки на евро-атланската алијанса.
Министерот за економија, меѓу другото, заклучи дека зачленувањето на Република Македонија во ЕУ и НАТО ќе го поткрене меѓународниот рејтинг на земјата, ќе ги поттикне и инвеститорите да ги реализираат планираните и најавените инвестиции, со што ќе се зголеми економскиот раст на земјата што ќе резултира со подигање на животниот стандард на среден и на долг рок на населението во РМ и негово доближување до просечниот животен стандард во ЕУ и НАТО.
„Конечно, да не заборавиме дека и Република Македонија им е потребна на ЕУ и на НАТО, како потврда за реализацијата на нивните политики и принципите врз кои се формирани. Тоа се демократија и владеење на правото, почитување на фундаменталните права, економска интеграција на земјите во функција на развој на единствениот пазар, а со цел зачувување и промовирање на стабилноста, безбедноста и просперитетот на целиот регион кој е во непосредното соседство на ЕУ”, рече министерот Ваљон Сараќини.
Вицепремиерот за европски интеграции, Фатмир Бесими претходно истакна дека регионот е типичен пример за крајности, од конфликти и војни до стабилизација. Тој посочи дека не е важно да се воспостави мирот, туки и тој да стане одржлив.
„За тоа да се оствари потребни се четири работи – мир и стабилност во регионот, либерализација на пазарите за слободно движење на стоки услуги и човечки капитал, функционирање на правната држава и предвидливоста на системот”, рече Бесими во своето воведно обраќање.
Конференцијата под мотото „Влијанието на евро-атланските интеграции врз економијата во Република Македонија”, организирана од Евро-атланскиот совет на Македонија, Стопанската комора на Македонија и Факултетот за безбедност Скопје, на која беше продискутирано влијанието на евроатланските интеграции врз националната економија од граѓански, истражувачки, деловен, академски и политички аспект. На конференцијата свои обраќања имаа вицепремиерот за европски прашања Фатмир Бесими, државниот секретар во Министерство за одбрана Сашо Стефановски, потпретседателот на Стопанската комора на Македонија Горан Рафајловски, деканот на Факултетот за безбедност Скопје, Борис Мургоски и потпретседателот на Евро-атланскиот совет на Македонија, Исмeт Рамадани./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Почна пријавувањето за директни плаќања по програмата за финансиска поддршка во земјоделството за 2024 година
Министерството за земјоделство, шумарство и водостопанство заедно со Агенцијата за финансиска поддршка во земјоделството и руралниот развој ги информира земјоделските стопанства, дека во период од 10 мај до 1 јули ќе можат да поднесат барања по Програмата за финансиска поддршка во земјоделството за 2024 година.
Во наведениот период земјоделските стопанства можат да поднесуваат барања за: растително производство по обработлива земјоделска површина со поледелски и градинарски култури, за одржување на постоечки површини со овошни и лозови насади како и површина за производство на сертифициран семенски и саден материјал, сточарско производство за обележани грла говеда, овци и кози, за маторици, презимени пчелни семејства како и за заклани говеда во кланица, како и за органско земјоделско производство.
Земјоделските стопанства своите барања ги поднесуваат во електронскиот систем на АФПЗРР, а доколку имаат потреба од помош или поддршка можат да се обратат во подрачните единици на МЗШВ.
Аплицирањето е преку линкот www.ipardpa.gov.mk – Директни плаќања е-субвенции. Со отварање на овој линк, во полето „Известувања/упатства“ достапни се деталните упатства за поднесување на барањето, Листата на потребни документи како и Програмата и Уредбата за директни плаќања во кои детално се претставени условите и висината на финансиската поддршка.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.
Економија
Се намалува мазутот, цените на дизелот и бензините остануваат непроменети
Регулаторната комисија за енергетика, водни услуги и услуги за управување со комунален отпад донесе oдлука со која се врши намалување на малопродажните цени на нафтените деривати во просек за 0,53 % во однос на одлуката од 7.5.2024 година.
Од 10.5.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 86,00 (денари/литар)
Моторен бензин ЕВРОСУПЕР БС-98 – 88,00 (денари/литар)
Дизел-гориво ЕВРОДИЗЕЛ БС (Д-Е V) – 74,50 (денари/литар)
Масло за горење екстра-лесно 1 (ЕЛ-1) – 74,00 (денари/литар)
Мазут М-1 НС – 44,609 (денари/килограм)
Малопродажната цена на „мазутот М-1 НС“ се намалува 1,223 денар/кг и сега ќе изнесува 44,609 денари/кг.
Малопродажните цени на бензините ЕВРОСУПЕР БС-95 и ЕВРОСУПЕР БС-98, како и на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) не се менуваат.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините 2,939 %, кај дизелот 1,523 %, кај екстра-лесното масло 1,341 % и кај „мазутот“ намалувањето е 3,608 %.
Курсот на денарот во однос на доларот во изминатиот период по кој беа формирани цените со претходната пресметка е понизок 0,015 %.