Социјалдемократскиот сојуз очигледно изненаден дека веднаш беа доставени на јавен увид сите детали од Договорот со компанијата „Sahara Pure Eatables Corporation Limited“, компанија основана од Сахара Индија Паривар, за долгогодишен закуп на земјоделско земјиште во државна сопственост, бара контроверзии таму каде што не може да ги најде.

Ова се вели во реакцијата на Министерството за земјоделие, шумарство и водостопанство на денешната прес-конференција на најголемата опозициска партија СДСМ, на која беше кажано дека договорот со споменатата индиска компанија не претпоставувал никакви инвестициски обврски, туку дека бил само обичен договор за закуп кој можел да биде раскинат во секое време.

„Транспарентноста на Министерството е секако доказ дека во овој случај, како и во другите активности кои ги спроведува согласно своите надлежности, нема што да крие, напротив“, се вели во соопштението на министерството.

Се нагласува и дека договорот бил склучен согласно постапките уредени со одредбите од Законот за земјоделско земјиште, додека обврските коишто ги преземал инвеститорот, текот на овие денови започнуваат да се спроведуваат согласно предвидената динамика.

„Како и секој друг земјоделски производител во Република Македонија кој ќе ги исполни условите пропишани со годишните програми, ова земјоделско стопанство може да биде корисник на финансиска поддршка за земјоделството. Разликата во однос на изминатиот период е што, спротивно на очекувањата, односно надежите на СДСМ дека новиот закупец на земјиштето ќе ‘произведе исто колку што произвел Агрокомбинатот Џумајлија’, Договорот го обврзува реално да инвестира ‘само’ 200 милиони евра во фарми со вкупен капацитет од 20 илјади грла и во нов преработувачки капацитет годишно да произведе 75.000 тони сточна храна и во нов капацитет за преработка на млеко да оствари 80 илјади литри производство на млеко на дневна основа во период до три години“, се вели уште во одговорот на МЗШВ.

Истовремено, се посочува изјавата, инвеститорот во согласност со Договорот, се обврзува да вработи две илјади лица во следниот три годишен период, а во согласност со утврдената динамика на активности за следните 18, 27 и 36 месеци.„Како пред тоа функционираше АК „Џумајлија“ со претходните сопственици, кои покрај другото се познати како блиски соработници на претседателката на собраниската Комисија за земјоделство, многу добро им е познато на македонските граѓани. Поразителните ефекти се видливи во постапките на ликвидацијата и тековниот судски спор и секако во распродажбата на капацитетите на комплексот кој беше еден од поголемите во македонскиот аграр. Со задоволство ќе се обидеме на загрижувачки неупатените во СДСМ повторно да им објасниме повеќе факти“, се заклучува во реакцијата на Министерството за земјоделие, шумарство и водостопанство во чие продолжение се појаснува дека лицето Субхиндер Сингх Хир е управител на „Sahara Pure Eatables Corporation Limited“ ДООЕЛ од Скопје, компанија која е основана од „Сахара Индија Паривар“ и се повторуваат одредбите од Договорот објавен во неделата.

„Доколку господата од СДСМ присуствувале на јавното отворање (местото и времето на јавното отворање беше објавено во самиот јавен оглас) би биле изворно информирани за сите детали околу постапката која во целост е спроведена согласно закон. Висината за концесискиот надоместок е во рамките на законските износи за земјоделско земјиште од I-IV и V-VIII класа. На СДСМ секако им е познато дека и претходниот закупец Агрокомбинатот ‘Џумајлија’ беше обврзан дури и помал, кој во целост беше наплатен од страна на МЗШВ до раскинување на Договорот за концесија“, додаваат од министерството.

Во реакцијата се тврди дека доколку се споредат податоците за земјиштето во однос на износот на вкупната закупнина ќе се заклучи дека за земјоделското земјиште од I-IV класа закупнината изнесува над 25 евра/ха, а за катастратска класа од V-VIII закупнината изнесува над 15 евра/ха. Што значи дека во целост се запазени законските износи за висината на закупнина по катастраска класа. Според МЗШВ, имајќи ја предвид „површината која е издадена под концесија висината на концесискиот надоместок не е на штета на државните интереси“.

Додаваат, исто така, дека во огласот објавен на веб страницата на Министерството за земјоделство се наведени сите катастарски податоци за земјоделското земјиште предмет на Огласот, а во Договорот истите се негов составен дел.

„Интересна е математичката гимнастика на СДСМ и повторно тотално непознавање на законската регулатива и Програмата за директна финансиска поддршка во земјоделството. За појаснување, за културите за кои е издаден договорот, под услов сите да се обработени, согласно овогодишната Програма, закупецот би добил максимално 85 илјади евра, што е далеку од износите кои СДСМ ги наведува, односно тоа би било 10 отсто од вкупниот износ на вкупниот износ на субвенцијата. Секако услов е закупецот да аплицира за субвенции“, се вели натаму.Од МЗШВ поставија и прашање за СДСМ „под кои услови до 2006 година тие ги потпишувале договорите за закуп на 30 и повеќе години на огромни земјоделски обработливи површини?!“

Кога станува збор за регулативата, се прецизира дека во завршните одредби од Договорот е предвидена јуриздикцијата на македонското право, а двете страни се запознаени за Спогодбата меѓу владите на Македонија и Индија.

„Наводната загриженост на СДСМ за склучениот Договор ја разбираме и ја сфаќаме како дел од нивниот страв од вкупните ефекти од неговата реализација и желбата по секоја цена сите позитивни трендови во македонското земјоделство да се закочат или да се сведат на состојбите до 2006 година до кога истите тие покажаа колку вистински се загрижени за земјоделските политики и проблеми“, заклучуваат од МЗШВ./крај/мф