Активностите на компаниите во производствениот и во услужниот сектор забележале во август најголем скок во изминатите повеќе од две години, благодарејќи на првиот раст на новите нарачки од средината на 2011 година, покажа конечниот извештај на лондонскиот институт Markit, кој сугерира благ раст на економиите во вториот квартал од 2013 година.

Збирниот индекс на менаџерите на набавката PMI кој го изработува лондонскиот истражувачки институт Markit а ги опфаќа производствениот и секторот на услугите во 17-члената еврозона, во август достигнал 51,5 поени, за разлика од јулските 50,5 поени. Тоа е неговото највисоко ниво од јуни 2011 година, иако е нешто пониско во споредба со првично проценетите 51,7 поени, се наведува во соопштението на институтот од средата.

Индексот на новите нарачки, притоа, е зголемен за 51 поен, со што првпат од јули 2011 година го надмина нивото од 50 поени коешто ги дели растот од падот. Тоа би можело да претставува добра вест за Европската централна банка (ECB) којашто во четврток на редовното месечно заседание ќе одлучува за чекорите што ќе ги презема во иднина во сферата на монетарната политика.

„Заздравувањето на еврозоната изгледа раширен на сé поширока основа, со излегување од рецесијата на сé поголем број сектори и земји. Иако сликата за ситуацијата се подобрува, новиот извештај и натаму сугерира само многу скромен раст на економијата“, вели главниот економист на Markit, Крис Вилијамсон.

Меѓу двете најголеми економии во еврозоната и натаму се забележуваат големи разлики. Така, збирниот индекс PMI за Германија скокна на 53,5 поени, највисокото ниво во изминатите седум месеци, додека францускиот PMI е намален на 48,8 поени, од јулските 49,1 поени, што значи дека активностите таму и натаму се во пад.

Вилијамсон додава дека збирниот индекс PMI за еврозоната, добиен на основа на резултатите од анкетите меѓу илјадници компании, сугерира дека економијата ќе порасне за 0,2 отсто во овој квартал.

Индексот PMI за секторот услуги скокна на 50,7 поени, од јулските, 49,8 поени, што е првпат да ја минува границата од 50 поени, од почетокот на 2012 година. Притоа, очекувањето на деловните челници за индиската достигнала највисоко ниво во последните 17 месеци.

Во врска со вработувањето на новите работници, компаниите во еврозоната сé уште се многу колебливи. Во август, така, бројот на вработените дополнително е намален, и до веќе дваесет месеци со ред, со дури и нешто поголемо темпо на откази отколку во јули.

„Продолженото губење на работните места сугерира дека клучниот фокус на ECB ќе биде на тоа да ги убеди пазарите дека каматните стапки нема да растат во догледна иднина“, заклучува Вилијамсон./крај/мф/сн