Раст на извозот од 5 отсто во првите седум месеци и раст на европскиот извоз за 17,5 отсто придонесува зголемување на нарачки за македонски производи од западните земји, порача министерот за економија, Ваљон Сараќини на конференцијата на тема: „Како до поголем извоз“.

На конференцијата се дискутираше за активностите кои се преземаат за поддршка на извозот, но и за пристапот до финансии и промоција на извозот.

„Она што радува во последниов период е раздвижување на трговијата, а со тоа и на економијата, бидејќи според податоците состојбата на извозот драстично се менува во 2013 година, па можеме да забележиме дека имаме раст на извозот од 5% за седумте месеци од оваа година. Особено е значаен растот на извозот во ЕУ од 17,5 отсто. Покрај ова, растот на извозот, особено во 2013 година, во однос на растот на увозот, значително влијае на намалувањето на трговскиот дефицит“, рече Сараќини.

Оваа состојба, според него, е резултат на излезот од кризата, како и на владините мерки кои придонесоа на амортизација на негативните ефекти од светската економска криза.

„Благодарение на сето ова имаме зголемување на нарачките за наши производи од западните земји, ја продолжуваме поддршката на малите и средни претпријатија за подобрување на нивната конкурентност, обезбедивме ефтини кредити по поволни услови, креиравме мерки кои го најдоа своето место во Стратегијата за промоција и поддршка на извозот. За нас е значајно што 16 земји од Еврозоната бележат економски раст во првата половина на 2013, а главна е Германија, со најголем економски раст од 0,7 отсто во вториот квартал на 2013 година, земја која е воедно и наш главен извозен партнер. Но, овој раст не е доволен. Ние како Влада, очекуваме компаниите да играат клучна улога во потрагата по нови пазари, да ја подобрат конкурентноста, да бидат иновативни, да создаваат брендови со кои ќе ја промовираат Македонија во странство, што практично би значело интернационализација на економијата“, рече Сараќини пред бизнисмените.

Перспективите на економскиот развој, според него се во оживување на нашата индустрија, а еден од економските потенцијали, гледано на долг рок, за да се развие конкурентноста на приватниот сектор со цел да биде конкурентен на извозниот пазар, претставува развојот на вештини и комерцијализација на иновациите, поради што Владата подготви сеопфатна Стратегија за развој на иновациите за периодот 2012-2020, како и Закон за поттикнување на иновациите, со кој меѓу другото се предвидува формирање Фонд за иновации и технолошки развој, што значи се планира преку Фондот да се обезбедуваат средства за поттикнување на иновациската дејност во вид на: грантови за кофинансирање на новоосновани старт-ап и спин-офф компании, кофинансирани грантови и условени заеми за комерцијализација на иновации, еквити инвестиции, кофинансирани грантови за трансфер на технологии и техничка помош. Со поддршката на овој Фонд, Република Македонија ќе може постепено да го исполни критериумот од Лисабонската стратегија на ЕУ, што значи 3 отсто од БДП да се обезбедат за инвестиции во истражување и развој. Имено, според статистиката европските земји учествуваат со 2 отсто, а Република Македонија со 0,4 отсто.

Освен Фондот, постојат поволни кредитни линии за компаниите преку Македонската Банка за поддршка на развојот, која пред бизнисмените ги претстави своите производи. Досега, од кредитните линии во претходните три фази, одобрени се средства во вкупен износ од 250 милиони евра, повлечени се вкупно 222 милиони евра или 88 отсто реализација за 761 проект и за отворање на нови 4.782 работни места, а набрзо се планира да започне со реализација четвртата кредитна линија во износ од нови 100 милиони евра, со што ќе продолжи поддршката на компаниите со квалитетни кредитни средства по поволни услови, со фиксна годишна стапка од 5,5 отсто и со рокови на отплата до осум години за инвестиции, и до три години за обртни средства.

Претставникот на Стопанската комора на Македонија, Антони Пешев, истакна дека најважно е окрупнување на нашата економија, здружување на помалите компании во поголеми и заеднички напори за наоѓање на поголеми инвеститори.

Претседателот на Стопанската комора на Северозападна Македонија, Мендерес Кучи, појасни дека успешноста на една економија се мери по конкурентноста, дека нашите компании треба да инвестираат во знаење, да станат поконкурентни на пазарот, а воедно ја поздрави иницијативата на Министерството за економија за одржување на оваа конференција, бидејќи преку дијалог со компаниите ќе можат да се лоцираат проблемите со кои се соочуваат компаниите при извоз./крај/со/бб