Високата стапка на невработеност кај младите има големо влијание врз социјалниот и економски живот во земјата. Неискористениот млад човечки потенцијал претставува голема загуба за едно општество , беше речено на трибиината на тема „Дали е потребна поголема поддршка при вработувањето на младите во Македонија“.Панел дискусијата беше одржана во организација на Коалицијата на младински организации СЕГА, а како дел од програмата за млади во ЕУ Инфо центарот.

„Нашите истражувања покажуваат дека повисокото образование обезбедува подобри резултати за младите на пазарот на трудот и стапката на невработеност прогресивно се намалува со секој дополнителен степен на образование. Тоа ни покажува дека младите треба да вложуваат во своето образование и развивање на сопствени вештини бидејки така се многу поконкуренти на пазарот на трудот и шансата да се вработат или започнат свој бизнис се многу поголеми“, вели Зоран Илиески, извршен менаџер на Коалицијата СЕГА.

„Високата стапка на невработеност кај младите има големо влијание врз социјалниот и економски живот во земјата. Неискористениот млад човечки потенцијал претставува голема загуба за едно општество. Доколку еден млад човек не успее да најде работа брзо по завршувањето на школувањето (средно или високо) неговиот вкупен животен приход ќе страда многу. Затоа е многу значајно да се скрати тој транзициски период од образование до вработување. А тоа може да се потпомогне со разни активни мерки кои од една страна треба да го мотивираат и активираат младиот, и уште за време на студирањето подобро да се подготви за влез во пазарот на трудот и од друга страна да се креираат подобри услови за работодавачите да отвораат работни места за младите“, Урим Касапи, менаџер на програмата за вработување во УНДП.

Целта на оваа панел дискусија која е дел од програмското работење на Коалицијата СЕГА за вработување на младите во Македонија имаше за цел да се унапреди процесот и да се зголеми процентот на младите луѓе кои ќе се вработат, како и да се зголемат и подобрат работните вештини кај нив со цел поголема конкурентност. Податоците кои се презентираа на панелот говорат дека стапката на невработеност кај младите (на возраст 15-24) е речиси двојно повисока од таа на возрасните, со 52,1 проценти во третото тримесечје на 2012 г. Односот 1,7 меѓу стапките на невработеност на младите и возрасните останува непроменета во периодот меѓу 2011 и 2012 г. (третите тримесечја). Националниот акциски план за вработување на младите (НАПВМ) кој е донесен во 2012 година нуди тригодишен акциски план за промовирање на повеќе и подобри работни места за младите на возраст 15-29 години, и во изработката на тој план беа вклучени и социјалните партнери. Фокусот на акциски план за вработување на младите е кон зајакнување на политиките за вработување, вклучувајќи програми за образование, обука и млади, со цел зголемување и подобрување на можностите за вработување и социјална инклузија на младите. Акциониот план нуди ефективните политики за подобро образование и зголемување на видовите и различноста на обукит, со ставање на акцент на реформата на наставните планови за стручното образование и обука, со цел да се опфатат нестручните вештини и учењето засновано на работа.

Коалицијата на младински организации СЕГА е формирана во 2004 година со цел да придонесе кон процесот на креирање и имплементација на Националната стратегија за млади на Р.Македонија и да помогне во исполнување на потребите на младите. Коалицијата ја сочинуваат 29 членки./крај/со/бб