Eдинствениот начин за привлекување на инвестиции се цврстите и конзистентни реформи за олеснување на бизнис климата, посочил министерот за финансии Зоран Ставрески во интервју за лондонски The Banker, анализирајќи го привлекувањето инвеститори и рангирањето на Македонија на 25. место во извештајот на Светска банка за условите за водење бизнис.

„Прво треба да ги средите работите, треба значително да го подобрите деловното окружување, постојната инфраструктура, и, исто така треба да имате квалификувана работна сила, а не само конкурентна работна сила во смисла на трошоците, туку и со добар квалитет. Така што, ова е она што го направивме во последните неколку години. Инвестиравме многу во инфраструктурата, исто така инвестиравме и во образованието, околу 6 проценти од БДП е инвестирано во образованието, но спроведовме и бројни реформи за поедноставување на постапките, намалување на бирократијата, со цел да го направиме деловното окружување што е можно полесно и поедноставно”, потенцира Ставрески.

Според него, воведувањето на рамниот данок била една од најважните реформи во 2006 година, по што следеа реформи во регулаторното окружување, катастарот и имотните права, судството и сите други области кои се важни за инвеститорите.

За Ставрески, предизвикот за Владата е да остане конзистентна и постојано да го приспособува и да го подобри деловното окружување, бидејќи на тој начин се одговара на потребите на приватниот сектор.

„На тој начин ние се справуваме со постојните предизвици и со потребите на приватниот сектор. Ова ни помогна да привлечеме некои глобални компании, како што се „Џонсон Мети”, „Џонсон Контролс”, како и други компании, кои не само што инвестираа за првпат во Македонија, туку повторно инвестираат по неколку години, што покажува дека се задоволни со деловното окружување”, истакнал министерот.

Ставрески додава Македонија има динамична економија, а растот од 3,3 проценти беше највисок пораст во Европа. Невработеноста е намалена, а Буџетот и јавните финансии се стабилни и вкупниот долг е на одржливо ниво, под Мастришките критериуми и значително под просекот во регионот.

Вицепремиерот исто така навел дека банкарскиот сектор бил еден од столбовите за порастот, во смисла на тоа да се одржи сигурен и стабилен во услови на криза, обезбедувајќи ја потребната кредитна поддршка за приватниот сектор.

Во однос на кредитната активност, Ставрески посочува дека таа не била толку силна како во некои други земји, така што соодносот помеѓу кредитите и БДП во Македонија е сè уште понизок во споредба со други земји.

„Тоа покажува дека има простор за зголемување, меѓутоа, секако, само за профитабилни проекти кои нема да ги зголемат нефункционалните заеми на банкарскиот сектор. Она што го гледаме како перспектива за банкарскиот сектор најверојатно е консолидација на банкарскиот сектор, што не значи многу банки туку повеќе здрави банки. Во овој контекст, отворени сме за нови инвеститори кои се подготвени да ги купат постојните банки или да бидат присутни во банкарскиот сектор во Македонија”, објаснува Ставрески./крај/мф/бс