Економија
Г7 одлучија за нови санкции за Русија
Челниците на седумте најразвиени земји во светот (G7) се договорија во саботата итно да воведат нови санкции за Русија поради украинската криза, при што секоја земја сама ќе одлучува за видот на санкциите, се наведува во соопштението објавено во јужнокорејската престолнина Сеул.
„Се договоривме итно да ѝ наметнеме дополнителни санкции на Русија”, се наведува во соопштението што го цитираат агенциите.
Според неименуван американски функционер, секоја земја од групата Г7 самата ќе одлучи кои насочени санкции ќе ги спроведе, а иако мерките ќе бидат координирани, тие не мораат нужно да бидат идентични. Санкциите можат да се воведат кон поединци или компании кои имаат влијаени во специфичните сектори од руската економија, како што се енергетиката и банкарството.
„Имајќи ја предвид итност ада се загарантира следниот месец (25-ти мај) на украинските претседателски избори да се спроведе мирно и демократско гласање коешто ќе биде успешно, се договоривме итно да дејствуваме за да ги зајакнеме насочените санкции и мерки”, се додава во соопштението на Г7.
Во соопштението се поздравуваа воздржаноста која новата прозападна власт во Киев реагирала на вооружените проруски народни милиции за самоодбрана кои западот ги нарекува „сепаратисти” а кои бараат федерализација на Украина, и како и демонстрантите против прорускиот претседател Виктор Јанукович во февруари и март во Киев, во десетина градови во проруската Донецка област заземаа згради на регионалните и на државните институции.
„Од друга страна, Русија не преземала никаква конкретна акција со којашто би го спровела договорот од Женева. Таа јавно не го поддржа договорот, не ги осуди акциите на сепаратистите кои сакаат да ја дестабилизираат Украина, не ги повика вооружените милитанти мирно да ги напуштат зградите на владата и да го положат оружјето”, се вели уште во соопштението на Г7.
Се заклучува, исто така, дека Г7 „цврсто ги осудува руските обиди да го анектира Крим и Севастопол, што не го признаваме”.
САД и Европската унија би требале во понеделник наутро да и објават своите мерки. Американскиот претседател Барак Обама разговарал во петокот со европските лидери за новите санкции за Русија, велејќи дека треба итно да се дејствува, им изјавил на новинарите функционерот на американската безбедносна служба Бен Родс во авионот „Air Force One” во текот на летот на Обама од Јужна Кореја за Малезија, третата дестинација на неговата азиска турнеја./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.
Економија
Финансиска и енергетска стабилност како приоритет – средба на министерката Божиновска со гувернерот Славески

На работната средба на министерката за енергетика, Сања Божиновска, со гувернерот на Народната банка, Трајко Славески, се разговараше за тековните енергетски проекти и нивните финансиски импликации врз компаниите и економијата.
Во фокусот на разговорот беа влијанијата на новите регулативи за декарбонизација и зелената енергетска транзиција на Европската Унија, кои носат значајни предизвици, но и можности за развој на обновливите извори на енергија во нашата земја, како и нивното значење за домашните компании и целокупната економија. Беше нагласено дека за компаниите е потребна поддршка во приспособувањето кон овие промени, за да се намалат финансиските оптоварувања и да се зачува конкурентноста на домашниот пазар.
Гувернерот Славески и министерката Божиновска се согласија дека финансискиот сектор е главен поддржувач на транзицијата кон поголема енергетска одржливост, соодветно соработката помеѓу Министерството за енергетика и Народната банка е значајна за креирање на мерки кои ќе ја поддржат економијата во целина, особено во услови на глобални економски предизвици.
На средбата беше истакнато дека развојот на енергетскиот и рударскиот сектор е од клучно значење за зајакнување на финансиската независност на земјата и обезбедување енергетска стабилност која ќе ги штити интересите на граѓаните и компаниите и ќе обезбеди отпорност на земјата кон надворешни економски шокови.
Во наредниот период ќе се работи на конкретни иницијативи и политики за олеснување на пристапот до финансиски средства за инвестиции во зелена енергија и технолошки модернизации, со цел да се поддржи економскиот раст и одржливоста, но за да се обезбедат ефективни решенија кои ќе ги поддржат компаниите во процесот на прилагодување, како и стабилноста на националната економија.
Економија
Божиновска: Меѓународни експерти за енергетика и Германското друштво за меѓународна соработка со поддршка за енергетскиот форум

Министерката Сања Божиновска оствари работна средба со Давид Оберхубер, директор на Германското друштво за меѓународна соработка (GIZ) во нашата земја.
Средбата беше фокусирана на зајакнување на тековната соработка меѓу министерството и ГИЗ, со посебен акцент на подготовките за претстојниот 14. Меѓународен форум за енергија за одржлив развој кој ќе се одржи од 28 до 30 октомври 2025 година во Скопје, под мотото „Од цели до акција: Напојување на иднината со одржлива енергија“
Настанот е организиран од Министерството за енергетика, рударство и и минерални суровини, во партнерство со Програмата за развој на Обединетите нации (УНДП) и петте регионални комисии на Обединетите нации.
ГИЗ, како долгорочен партнер на Македонија во областа на одржливиот развој и енергетиката, ја потврди својата подготвеност да даде активна поддршка на настанот – преку мобилизација на меѓународни и домашни експерти, како и учество во концептуализација и организација на тематски панел-дискусии, информираат од кабинетот на министерката.
Во рамките на средбата, беше направен преглед на тековните проекти што се реализираат со поддршка на Германското друштво за меѓународна соработка, особено во доменот на енергетската ефикасност. Двете страни изразија задоволство од досегашните резултати, кои покажуваат конкретен напредок во унапредувањето на националните капацитети и подобрување на условите за поефикасно управување со енергетските ресурси.
Покрај актуелните иницијативи, разговарано беше и за идните правци на стратешка соработка. Притоа, беа разгледани можности за развој на нови заеднички проекти за 2026 година, кои би се фокусирале на поддршка на процесот на енергетска транзиција, дигитализација на енергетскиот сектор, како и унапредување на институционалните капацитети преку техничка и експертска помош.
Божиновска ја нагласи важноста на континуираната поддршка од страна на ГИЗ, оценувајќи ја оваа соработка како исклучително вредна за унапредување на одржливите и инклузивни политики во енергетскиот сектор. Таа додаде дека Министерството останува отворено за понатамошно продлабочување на партнерството, со цел обезбедување стабилна, зелена и иновативна енергетска иднина за граѓаните на Македонија.