Русија, Белoрусија и Казахстан во казахстанската престолнина Астана во четвртокот го потпишаа договорот за Евроазиската економска унија (ЕАЕС) кој ќе стапи на сила од 1-ви јануари 2015 година, организација којашто има цел да ги јакне односите и економската соработка меѓу овие три поранешни советски републики кои веќе се поврзани со царинската унија на која и’ беше понудено да пристапи и Украина пред соборувањето на претседателот Виктор Јанукович.

Како што пренесуваат агенциите, документот во Астана го потпишаа на заседанието на на високиот Евроазиски економски совет, челниците на трите земји, Владимир Путин, Александар Лукашенко и Нурсултан Назарбаев. Станува збор за економски и трговски блок кој би требало да претставува заштита од, но и конкуренција на светските економски гиганти како Европската унија, САД и Кина.

„Нашата денешна средба има посебна и, без претерување, епохално значење”, изјавил Путин по потпишувањето на договорот.

„Оваа унија е економска и нема да се однесува на суверенитетите на земјите учеснички”, истакна Назарбаев, додавајќи дека организацијата претставува „мост меѓу Истокот и Западот”.

Формирањето на Унијата ги издигнува на повисоко ниво интеграциите меѓу земјите потписнички на договорот кој треба да стапи на сила од 1-ви јануари 2015 година, откако ќе го ратификуваат парламентите на Русија, Белорусија и Казахстан, истакнале тројцата претседатели, пренесува РИА Новости.

Со договорот, трите држави, исто така, преземаат обврски да го гарантираат слободното движење на стоки, услуги, капитал и работна сила, спроведување на координирани политики во клучните сектори како енергетиката, индустријата, земјоделието, транспортот… Со тоа, всушност, се завршува формирањето на најголемиот заеднички пазар на просторот од Заедницата на независни држави (ЗНД – независни државни настанати со распаѓањето на Советскиот сојуз), од 170 милиони население, кој треба да според планот „да претставува нов моќен центар на економскиот развој”.

До потпишувањето на договорот Москва, Минск и Астана водеа повеќегодишни комплексни преговори. Според советникот на рускиот претседател Јуриј Ушаков, пред потпишувањето на договорот за формирањето на ЕАЕС останале нерешени неколку прашања коишто ќе бидат разгледувани на ниво на замениците премиери на трите земји и кои мора да бидат надминати. Првиот руски вицепремиер Игор Шувалов во четвртокот претпладне пред состанокот на челниците на трите земји изјави за руските медиуми дека делегациите ги надминале сите разлики.

Русија се надеваше претходно дека на Унијата ќе и’ се приклучи и Украина, но нејзините односи беа замрзнати по избувнувањето на протестите коишто во ноември 2013 година ги започна прозападната украинска опозиција којашто подоцна го собори претседателот Виктор Јануковиќ, обвинувајќи го дека земјата ја врти кон Москва поради тоа што одлучи да го суспендира потпишувањето на Спогодбата за придружување и слободна трговија со Европската унија.

Другите земји произлезени од советскиот сојуз засега не влегуваат да влезат во ЕАЕС, иако Ерменија и Киргистан најавија дека ја разгледуваат можноста за влегување во оваа асоцијација./крај/мф/сн